ଇସ୍ତାନବୁଲ,୯।୨ : ତୁର୍କୀ ଏବଂ ସିରିଆରେ ହୋଇଥିବା ଭୂକମ୍ପ ଯୋଗୁଁ ପ୍ରାଣ ହରାଇଥିବା ଲୋକଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି। ନୂତନ ଆକଳନ ଅନୁଯାୟୀ, ଏପର୍ଯ୍ୟନ୍ତ ୧୫ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଛି। ଆହତଙ୍କ ସଂଖ୍ୟା ୮୦ ହଜାରରୁ ଅଧିକ ହୋଇଛି। ବହୁ ସଂଖ୍ୟକ ଲୋକ ଏପର୍ଯ୍ୟନ୍ତ ମାଟି ତଳେ ଦବି ରହିଛନ୍ତି। ଏଭଳି ପରିସ୍ଥିତିରେ ମୃତ ଓ ଆହତଙ୍କ ସଂଖ୍ୟା ବହୁଗୁଣିତ ହୋଇପାରେ ବୋଲି ଆଶଙ୍କା ପ୍ରକାଶ ପାଇଛି।
ଏହି ସମୟରେ ତୁର୍କୀର ବିଭିନ୍ନ ସହରରେ ବାରମ୍ବାର ଭୂକମ୍ପ ଅନୁଭୂତ ହେଉଛି। ଭୂକମ୍ପରୁ ବଞ୍ଚିଯାଇଥିବା ଲୋକଙ୍କ ଖୋଜିଲା ଖୋଜିଲା ଆଖି ନିଜ ପ୍ରିୟପରିଜନଙ୍କୁ ଖୋଜିବାରେ ଲାଗିଛି। ଆଖିରେ ଲୁହ ମନରେ କୋହ ଭରି ରହିଛି। ଦିନେ ଚଳପ୍ରଚଳ ଥିବା ଅଞ୍ଚଳର ଚାରିଆଡେ ଖାଁ ଖାଁ ଲାଗୁଛି। ମାଟି ତଳେ ଜୀବନର ସନ୍ଧାନ ନେଇ ଉଦ୍ଧାର କାର୍ଯ୍ୟ ଜାରି ରହିଛି। ପୃଥିବୀର ବିଭିନ୍ନ ରାଷ୍ଟ୍ରରୁ ସହାୟତାର ହାତ ବଢ଼ିବାରେ ଲାଗିଛି।