କେନ୍ଦୁଝର,୧୭ା୫(ସ୍ବ.ପ୍ର.): ସଦର ତହସିଲ ଅନ୍ତର୍ଗତ ନୂଆଗାଁ ପଞ୍ଚାୟତର ବୀରକିଶୋରପୁର ଗ୍ରାମରେ ସରକାରୀ ଜମିର କିସମ ପରବର୍ତ୍ତନ ଏବଂ ଉଚ୍ଛେଦ ପାଇଁ ଗ୍ରାମବାସୀଙ୍କୁ ନୋଟିସ୍ କରାଯାଇଛି। ଏହି ଜମିକୁ ଇଡ୍କୋ ମାଧ୍ୟମରେ ଅଧିଗ୍ରହଣ ପରେ ଏକ ଇସ୍ପାତ କାରଖାନା ପାଇଁ ହସ୍ତାନ୍ତର କରାଯିବ। ନୋଟିସ କରାଯିବା ପୂର୍ବରୁ କିସମ ପରିବର୍ତ୍ତନ କରାଯାଇ କାରଖାନା କରାଯାଉଛି। ଏଥିପାଇଁ କିସମ ପରିବର୍ତ୍ତନ ଓ ଜବରଦଖଲ ଉଚ୍ଛେଦ ପାଇଁ ସର୍ବସାଧାରଣ ଇସ୍ତାହାର କରାଯାଇଛି। ଏହି ନୋଟିସରେ ସାରଦ(୧),ସାରଦ(୨),ଗୋଚର ସରକାରୀ ଜମି ରହିଛି। ଅଭିଯୋଗର ଶୁଣାଣି ନ କରି କାରଖାନା କିସମ ପରିବର୍ତ୍ତନ କରିଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏହି ଜମିରେ ଚାଷ କରି ଉକ୍ତ ଗ୍ରାମର ଲୋକ ଜୀବନଜୀକିବା ନିର୍ବାହ କରୁଛନ୍ତି। ୮ ବର୍ଷ ପୂର୍ବରୁ ଜଳ ସମ୍ପଦ ବିଭାଗ ପକ୍ଷରୁ ହାତିକୁଚା ଗ୍ରାମରେ ଛିଟିଙ୍ଗା ନାଳରେ ଏକ ବନ୍ଧ କରାଯାଇଛି। ଏହି ବନ୍ଧ ଉପରେ ହାତିକୁଚା, ନୂଆଗାଁ, ବୀରକିଶୋରପୁର, ଡିମିରିଡିହା, ତାରତଖମଣ, ବିସ୍ତାପାଳ,ମଙ୍ଗଳାପଶି ଗ୍ରାମର ଚାଷୀ ନିର୍ଭରଶୀଳ। ଏହି ବନ୍ଧକୁ ସଂଯୋଗ କରି କେନାଲ ପାଇଁ ଜମି ଅଧିଗ୍ରହଣ ଚାଲିଛି। କେନାଲ ପାଇଁ ଜମି ଅଧିଗ୍ରହଣ ଚାଲିଥିବା ବେଳେ ଉକ୍ତ ସ୍ଥାନକୁ ପୁଣି କାରଖାନା ପାଇଁ ଇଡକୋ ଜରିଆର ଅଧିଗ୍ରହଣ କରାଯାଉଛି। ଯାହାକୁ ଗ୍ରାମବାସୀ ବିରୋଧ କରି ବୁଧବାର ସଦର ତହସିଲଦାରଙ୍କ କାର୍ଯ୍ୟାଳୟକୁ ଯାଇ ଏହାର ପ୍ରତିବାଦ କରିଛନ୍ତି। ଗ୍ରାମବାସୀ ଅଭିଯୋଗ କରିଛନ୍ତି ଯେ, ଏହି ଜମି ଦେବାକୁ ଗ୍ରାମବାସୀ ପୂର୍ବରୁ ବାରମ୍ବାର ବିରୋଧ କରି ଆସୁଛନ୍ତି। ଉକ୍ତ ଅଞ୍ଚଳରେ ୪ଟି କାରଖାନା ରହିଥିବାରୁ ବହୁ ପରିମାଣର ବାୟୁ ଏବଂ ଜଳ ପ୍ରଦୂଷଣ ହେଉଛି। ଏଣୁ ଏଠାରେ କାରଖାନା ହେଲେ ପ୍ରଦୂଷଣ ମାତ୍ରା ବଢିବ ବୋଲି ଗ୍ରାମବାସୀ କହିଛନ୍ତି। ବୀରକିଶୋରପୁର ଗ୍ରାମର ୧୯୭ ଏକର ସରକାରୀ ଜମି ରହିଛି। ଏହି ଜମିରେ ଗ୍ରାମବାସୀ ଚାଷ,ରାସ୍ତା,ପୋଖରୀ,ବୋରଓ୍ବେଲ, ଖେଳପଡ଼ିଆ ମଧ୍ୟ ରହିଛି। ଗ୍ରାମରେ ୨୫୦୦ରୁ ଅଧିକ ଲୋକ ବସବାସ କରୁଥିବାରୁ ଚାଷବାସରେ ସମସ୍ୟା ଦେଖାଦେବ। ତେଣୁ ସରକାର ତାଙ୍କ ଅଭିଯୋଗକୁ ବିଚାର ଉପଯୁକ୍ତ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି।