ପାଟନା,୧୬।୧୦: ଜମି ବଦଳରେ ଚାକିରି ଦେବା ମାମଲାରେ ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ସୋମବାର କୋର୍ଟରୁ ଆଉ ଏକ ଆଶ୍ୱସ୍ତି ପାଇଛନ୍ତି। କୋର୍ଟ ତେଜସ୍ବୀଙ୍କୁ ବିଦେଶ ଯିବାକୁ ଅନୁମତି ଦେଇଛନ୍ତି।
ସୂଚନାଯୋଗ୍ୟ, ଆରଜେଡି ସୁପ୍ରିମୋ ଲାଲୁ ଯାଦବଙ୍କ ପୁଅ ତଥା ବିହାରର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ଏକ ସରକାରୀ ଗସ୍ତରେ ଅକ୍ଟୋବର ୨୪ରୁ ନଭେମ୍ବର ୧ପର୍ଯ୍ୟନ୍ତ ଜାପାନ ଯିବାକୁ ଦିଲ୍ଲୀର ରୌଜ୍ ଏଭେନ୍ୟୁ କୋର୍ଟରୁ ଅନୁମତି ମାଗିଥିଲେ।
ଏହାପୂର୍ବରୁ ସୋମବାର ଲାଲୁଙ୍କ ପରିବାର ଜମି ବଦଳରେ ଚାକିରି ଦେବା ମାମଲାରେ କୋର୍ଟରେ ଶୁଣାଣି ସମୟରେ ଦୁଇଟି ବଡ଼ ଆଶ୍ୱସ୍ତି ପାଇଥିଲେ। ପ୍ରଥମଟି ଲାଲୁ ଯାଦବ ପରିବାରକୁ ଶୁଣାଣି ପାଇଁ କୋର୍ଟରେ ହାଜର ହେବାକୁ ପଡ଼ିବ ନାହିଁ। ସେହିପରି ଦ୍ୱିତୀୟଟି ହେଉଛି କୋର୍ଟ ଏହି ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୨ ତାରିଖ ଦେଇଛନ୍ତି।