ପାଟନା,୧୪।୧୨: ରାଷ୍ଟ୍ରୀୟ ଜନତା ଦଳ (ଆରଜେଡି) ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ସାନ ପୁଅ ତେଜସ୍ବୀ ଯାଦବ ନିକଟରେ ଦିଲ୍ଲୀରେ ବିବାହ କରିଛନ୍ତି। ଦୀର୍ଘଦିନର ବନ୍ଧୁ ରିଚେଲଙ୍କୁ ବିବାହ କରିଛନ୍ତି। କିନ୍ତୁ ବିବାହ ପରେ ରିଚେଲଙ୍କ ନାମ ପରିବର୍ତ୍ତନ ହୋଇ ରାଜଶ୍ରୀ ହୋଇଛି। ଲାଲୁ ଯାଦବ ନିଜେ ସାନ ବୋହୂଙ୍କ ନାଁ ଦେଇଛନ୍ତି। ତେଜସ୍ବୀ ନିଜେ ଏହା ପ୍ରକାଶ କରିଛନ୍ତି। ଗତ ସପ୍ତାହରେ ଦିଲ୍ଲୀରେ ବିବାହ ଶେଷ କରି ବିରୋଧୀଦଳର ନେତା ତେଜସ୍ବୀ ସୋମବାର ତାଙ୍କ ସ୍ତ୍ରୀଙ୍କ ସହ ବିହାର ଯାଇଥିଲେ। ଉଭୟଙ୍କ ଦେଖିବା ପାଇଁ ପାଟନା ବିମାନବନ୍ଦର ବାହାରେ ଏକ ବିରାଟ ଜନସମାଗମ ଦେଖିବାକୁ ମିଳିଥିଲା। ତାଙ୍କ ସ୍ତ୍ରୀଙ୍କ ନାମ ସମ୍ବନ୍ଧରେ ଚାଲିଥିବା ରହସ୍ୟ ବିଷୟରେ ତେଜସ୍ବୀଙ୍କୁ ଉପସ୍ଥିତ ଖବରଦାତା ମାନେ ପଚାରିଥିଲେ। ଏହାର ଜବାବରେ ସେ କହିଥିଲେ, ତାଙ୍କ ନାମ ରିଚେଲ। ସେ ବର୍ତ୍ତମାନ ରାଜଶ୍ରୀ ନାମରେ ପରିଚିତ ହେବେ, ଯାହା ମୋ ବାପା ବାଛିଛନ୍ତି। ତେଜସ୍ବୀ ଯାଦବଙ୍କ ମା’ ତଥା ପୂର୍ବତନ ମୁଖ୍ୟମନ୍ତ୍ରୀ ରାବ୍ରି ଦେବୀ ଏହି ଦମ୍ପତିଙ୍କୁ ୧୦, ସର୍କୁଲାର ରୋଡ ବାସଭବନରେ ପାରମ୍ପରିକ ଢଙ୍ଗରେ ସ୍ବାଗତ କରିଥିଲେ।
