ପାଟନା,୨୯ ।୮: ଆର୍ଜେଡି ମୁଖ୍ୟ ଲାଲୁ ପ୍ରସାଦ ଯାଦବଙ୍କ ବଡ ପୁଅ ତେଜ ପ୍ରତାପ ଏବେ ଖୁବ୍ ଚର୍ଚ୍ଚାରେ । କେବେ ବାବା ଭୋଳାନାଥ ଭାବେ ତ ପୁଣି କେବେ କୃଷ୍ଣଙ୍କ ରୂପରେ ବଂଶୀ ବଜେଇ ଚର୍ଚ୍ଚାକୁ ଆସୁଥିବା ତେଜ ପ୍ରତାପ ମଡଲିଂ ଦୁନିଆରେ ବି ପାଦ ରଖିବାକୁ ଚେଷ୍ଟା କରିଛନ୍ତି । ସକ୍ରିୟ ରାଜନୀତିଠାରୁ ସାମାନ୍ୟ ଦୂରେଇ ଯାଇଥିବା ତେଜ ପ୍ରତାପ କିଛି ନା କିଛି କାରନାମା କରି ଲାଇମଲାଇଟରେ ରହିବାକୁ ପସନ୍ଦ କରନ୍ତି । ଏଥର ସେ କପିଲ ଶର୍ମାଙ୍କ କମେଡି ଶୋରେ ନଜର ଆସିବେ ବୋଲି ଜଣାପଡିଛି । ନିକଟରେ ସେ ଦିଲ୍ଲୀରୁ ଫେରି ଏହି ସୂଚନା ଦେଇଛନ୍ତି । ତେଜ ପ୍ରତାପ କହିଛନ୍ତି କମେଡି ଶୋ’ରୁ ମୋତେ ଯୋଗାଯୋଗ କରିଥିଲେ । ହେଲେ ସେମାନେ ଯଦି ଫ୍ଲାଇଟ୍ ଟିକେଟ ପଠାନ୍ତି ତେବେ ମୁଁ ସେଠାକୁ ନିଶ୍ଚିତ ଭାବେ ଯିବି । ବଡ ଭାଇ ରାଜନୀତିଠାରୁ ସାମାନ୍ୟ ଦୂରେଇ ରହୁଥିବା ବେଳେ ସାନଭାଇ ତେଜସ୍ୱୀ କିନ୍ତୁ ପିତାଙ୍କ ମଙ୍ଗ ସମ୍ଭାଳିବାକୁ ପ୍ରସ୍ତୁତ ଅଛନ୍ତି । ଏବେ ସେ ବିରୋଧି ଦଳ ନେତା ଭାବେ କାର୍ଯ୍ୟ କରୁଛନ୍ତି । ଦୁଇ ଭାଇଙ୍କ ମଧ୍ୟରେ ସମ୍ପର୍କ ଏତେ ମଧୁର ନ ଥିବା ବେଳେ ତେଜପ୍ରତାପ କେବେ ତେଜସ୍ୱୀଙ୍କ କାମରେ ହସ୍ତକ୍ଷେପ କରନ୍ତି ନାହିଁ ବୋଲି କୁହାଯାଏ ।
