![](https://www.dharitri.com/wp-content/uploads/2023/11/fgfg-3.jpg)
ହାଇଦ୍ରାବାଦ୍,୨୭।୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଏକ ବଡ ଦାବି କରିଛନ୍ତି। ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ (କେସିଆର) ଭାଜପା ସହ ମେଣ୍ଟ କରିବାକୁ ଚାହୁଁଥିଲେ, କିନ୍ତୁ ଆମେ ଏହା କରିବାକୁ ଦେଇ ନାହୁଁ ବୋଲି ପ୍ରଧାନମନ୍ତ୍ରୀ କହିଛନ୍ତି।
ତେଲଙ୍ଗାନାର ମହାବୁବାଦ୍ରେ ଏକ ନିର୍ବାଚନ ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦି କହିଛନ୍ତି, ଭାଜପାର ଶକ୍ତି ବଢୁଥିବା ନେଇ କେସିଆରଙ୍କୁ ବହୁ ପୂର୍ବରୁ ଜଣାଥିଲା। ଦୀର୍ଘ ସମୟ ଧରି ସେ କୌଣସି ପ୍ରକାରେ ଭାଜପା ସହିତ ବନ୍ଧୁତା କରିବାକୁ ଚେଷ୍ଟା କରୁଥିଲେ। ଥରେ ଦିଲ୍ଲୀ ଆସିଥିବାବେଳେ କେସିଆର ମୋତେ ଭେଟିଥିଲେ। ମେଣ୍ଟ କରିବା ନେଇ ସେ ମୋତେ ଅନୁରୋଧ କରିଥିଲେ, କିନ୍ତୁ ତେଲଙ୍ଗାନାବାସୀଙ୍କ ଇଚ୍ଛା ବିରୋଧରେ ଭାଜପା କିଛି କରିପାରିବ ନାହିଁ। ଯେବେଠାରୁ ଭାଜପା କେସିଆରଙ୍କୁ ମନା କରିଦେଇଛି, ସେବେଠାରୁ ଭାରତ ରାଷ୍ଟ୍ର ସମିତି (ବିଆରଏସ) ମୋତେ ଦୁର୍ବ୍ୟବହାର କରିବାର ସୁଯୋଗ ଛାଡୁନାହିଁ। ତେଲଙ୍ଗାନାକୁ ବିଆର୍ଏସ୍ର କବଳରୁ ମୁକ୍ତ କରିବା ଆମର ଦଳ ଏହାର ଦାୟିତ୍ୱ ବୋଲି ମୋଦି କହିଛନ୍ତି।
ତେଲଙ୍ଗାନାରେ ବିଧାନସଭା ନିର୍ବାଚନ ପାଇଁ ଭୋଟ ନଭେମ୍ବର ୩୦ ରେ ହେବ ଏବଂ ଫଳାଫଳ ଡିସେମ୍ବର ୩ ରେ ଆସିବ।