ହାଇଦ୍ରାବାଦ, ୧୬।୪: ହାଇଦ୍ରାବାଦ୍ରେ ଭାରତୀୟ ସମ୍ବିଧାନ ପ୍ରଣେତା ଡ. ବି.ଆର୍. ଆମ୍ବେଡ୍କରଙ୍କ ୧୨୫ ଫୁଟର ପ୍ରତିମୂର୍ତ୍ତି ଅନାବରଣ କରାଯାଇଛି। ଏ ନେଇ ଆୟୋଜିତ ଭବ୍ୟ କାର୍ଯ୍ୟକ୍ରମରେ ତେଲଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ଏବଂ ଆମ୍ବେଡ୍କରଙ୍କ ଅଣନାତି ପ୍ରକାଶ ଆମ୍ବେଡ୍କର ସାମିଲ ହୋଇଥିଲେ। ମୁଖ୍ୟମନ୍ତ୍ରୀ କେସିଆରଙ୍କ ନେତୃତ୍ୱରେ ଭାରତ ଇତିହାସରେ ତେଲଙ୍ଗାନା ଏକ ନୂଆ ଅଧ୍ୟାୟ ରଚିଛି। ଶୁକ୍ରବାର ଆମ୍ବେଡ୍କରଙ୍କ ଜନ୍ମବାର୍ଷିକୀ ଅବସରରେ ପ୍ରତିମୂର୍ତ୍ତି ଅନାବରଣ କରାଯାଇଥିଲା। ସ୍ବତନ୍ତ୍ର ହେଲିକପ୍ଟର ଯୋଗେ ପ୍ରତିମୂର୍ତ୍ତିରେ ପୁଷ୍ପବର୍ଷା କରାଯାଇଥିଲା। ମଞ୍ଚାସୀନ ହେବା ସମୟରେ ସେଠାରେ ଉପସ୍ଥିତ ଲୋକେ ଜୟ ଭୀମ, ଜୟ ତେଲଙ୍ଗାନା ଜୟ କେସିଆର୍ ସ୍ଲୋଗାନ୍ ହେଇଥିଲେ। କାର୍ଯ୍ୟକ୍ରମରେ ଭାଷଣ ଦେଇ ମୁଖ୍ୟ ଅତିଥି ପ୍ରକାଶ ଆମ୍ବେଡ୍କର କହିଥିଲେ, ମୁଖ୍ୟମନ୍ତ୍ରୀ କେସିଆର୍ ଭବିଷ୍ୟତରେ ଜଣେ ରାଷ୍ଟ୍ରନେତା ଭାବେ ଉଭା ହେବେ। ତେଲଙ୍ଗାନାରେ ହେଉଥିବା ବିକାଶ ସାରା ଦେଶ ପାଇଁ ଦୃଷ୍ଟାନ୍ତ ପାଲଟିଛି। ଦେଶର ବିଭିନ୍ନ ପ୍ରାନ୍ତରେ ଆମ୍ବେଡ୍କରଙ୍କ ପ୍ରଶଂସକ ରହିଛନ୍ତି। ୨୦୨୪ ଲୋକ ସଭା ନିର୍ବଚାନରେ ବିଆର୍ଏସ୍ ବହୁମତରେ ବିଜୟ ହାସଲ କରିବ ବୋଲି କେସିଆର୍ ଭାଷଣରେ କହିଛନ୍ତି। ବିକାଶକୁ ଶତ୍ରୁ ହଜମ କରିପାରୁ ନାହାନ୍ତି। ମହାରାଷ୍ଟ୍ରରେ ବିଆର୍ଏସ୍ ଦଳକୁ ବିପୁଳ ସମର୍ଥନ ମିଳିଛି। ଦେଶ ଶାସନର ସୁଯୋଗ ନିଶ୍ଚିତ ମିଳିବ ବୋଲି ମୁଖ୍ୟମନ୍ତ୍ରୀ କେସିଆର୍ କହିଛନ୍ତି।