ନୂଆଦିଲ୍ଲୀ,୧୨।୭: ତେଲଙ୍ଗାନା କଂଗ୍ରେସ ବିଧାୟକ ତଥା ପୂର୍ବତନ ମନ୍ତ୍ରୀ ଦାନମ ନାଗେନ୍ଦ୍ର ଭାରତ ରାଷ୍ଟ୍ର ସମିତି (ବିଆରଏସ) ଦଳ ବିଷୟରେ ଏକ ବଡ଼ ତଥ୍ୟ ଦେଇଛନ୍ତି। ଦେଶର ସର୍ବ ପୁରାତନ ଦଳ କଂଗ୍ରେସ ସହିତ ବିଆରଏସ ଖୁବ ଶୀଘ୍ର ମିଶ୍ରଣ ହେବ ବୋଲି ନାଗେନ୍ଦ୍ର କହିଛନ୍ତି। ସେ ଦାବି କରିଛନ୍ତି ଯେ କେ ଚନ୍ଦ୍ରଶେଖର ରାଓଙ୍କ ଦଳର ଅନେକ ନେତା ଆଗାମୀ ଦିନରେ ଦଳବଦଳ କରିବାକୁ ପ୍ରସ୍ତୁତ ଅଛନ୍ତି। କଂଗ୍ରେସ ନେତା କହିଛନ୍ତି ଯେ ଆସନ୍ତା ଦୁଇ ଦିନ ମଧ୍ୟରେ ପ୍ରାୟ ୬ଜଣ ବିଧାୟକ ଯୋଗଦେବେ ଏବଂ ଆସନ୍ତା ୧୫ ଦିନ ମଧ୍ୟରେ ସମ୍ପୂର୍ଣ୍ଣ ବିଆରଏସ କଂଗ୍ରେସ ସହିତ ମିଶ୍ରଣ ହେବ। କେବଳ ତିନି କିମ୍ବା ଚାରିଜଣ ବିଧାୟକ କେସିଆରଙ୍କ ସହିତ ରହିବେ।
ସୂଚନାଯୋଗ୍ୟ, ଚଳିତ ବର୍ଷ ମାର୍ଚ୍ଚରେ ହୋଇଥିବା ଲୋକ ସଭା ନିର୍ବାଚନ ପୂର୍ବରୁ ଦାନମ ନାଗେନ୍ଦ୍ର ନିଜେ ବିଆରଏସ ଛାଡି ତେଲଙ୍ଗାନାରେ କଂଗ୍ରେସରେ ଯୋଗ ଦେଇଥିଲେ। ସେ ୨୦୦୯ରୁ ୨୦୧୪ ପର୍ଯ୍ୟନ୍ତ ମିଳିତ ଆନ୍ଧ୍ରପ୍ରଦେଶରେ କଂଗ୍ରେସ ସରକାରରେ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ୨୦୧୮ରେ ସେ ଟିଆରଏସ (ବର୍ତ୍ତମାନ ବିଆରଏସ) ରେ ଯୋଗ ଦେଇଥିଲେ ଏବଂ ଖଇରାବାଦରୁ ବିଧାନସଭାକୁ ନିର୍ବାଚିତ ହୋଇଥିଲେ।
