ସୋନପୁର,୧୧।୧୧(ନି.ପ୍ର.): ରାଜ୍ୟ ଭିନ୍ନକ୍ଷମ ଆୟୁକ୍ତ ସୁଲୋଚନା ଦାଶଙ୍କ ଦ୍ୱାରା ସୋନପୁରଠାରେ ଭିନ୍ନକ୍ଷମଙ୍କ ପାଇଁ ଟେଲି ଥଇଥାନ ସେବା ବୁଧବାର ଉଦ୍ଘାଟିତ ହୋଇଯାଇଛି। ଭିନ୍ନକ୍ଷମ ଆୟୁକ୍ତ ଦାଶ ଏହା ଭିନ୍ନକ୍ଷମଙ୍କ ପାଇଁ ଏକ ଭିନ୍ନ ପ୍ରୟାସ ତଥା ଏକ ନିଆରା କାର୍ଯ୍ୟକ୍ରମ ବୋଲି କହିଥିଲେ। ମାତାପିତାମାନେ ଏହି କାର୍ଯ୍ୟକ୍ରମ ସମ୍ପର୍କରେ ଅଧିକ ଜାଣି ନିୟମିତ ଉପଯୋଗ କଲେ ଭିନ୍ନକ୍ଷମ ବ୍ୟକ୍ତିମାନେ ଉପକୃତ ହୋଇପାରିବେ ବୋଲି ସେ ମତପ୍ରକାଶ କରିଥିଲେ। ଭିନ୍ନକ୍ଷମମାନେ ସେମାନଙ୍କ ଅଧିକାର କ୍ଷୁର୍ଣ୍ଣ ହେଲେ ସ୍ବେଚ୍ଛାସେବୀ ସଂଗଠନର ସହାୟତା କିମ୍ବା ସିଧାସଳଖ ଆୟୋଗ ସହ ଯୋଗାଯୋଗ କରିବାକୁ କହିଥିଲେ। ଏହି ଅବସରରେ ଭିନ୍ନକ୍ଷମ ଆୟୁକ୍ତଙ୍କ ଦ୍ୱାରା ୧୭ ଜଣ ମାନସିକ ଏବଂ ବୌଦ୍ଧିକ ଭିନ୍ନକ୍ଷମଙ୍କୁ ସ୍ମାର୍ଟଫୋନ ପ୍ରଦାନ କରାଯାଇଥିଲା। ସେହିପରି ଗତ ଦଶମ ଶ୍ରେଣୀରେ କୃତିତ୍ୱ ହାସଲ କରିଥିବା ପୂଜା ରାଉତ, ସୋମନାଥ ଦାଶ ଓ ଫିଲିପ ନାଗଙ୍କୁ ଆୟୁକ୍ତଙ୍କ ଦ୍ୱାରା ସମ୍ବର୍ଦ୍ଧିତ କରାଯାଇଥିଲା। ରେଆରର ପ୍ରତିଷ୍ଠାତା ଗୌରୀଶ୍ୟାମ ପଣ୍ଡା ଯୋଗଦେଇ ଅନୁଷ୍ଠାନର କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ। ଜିଲା ସାମାଜିକ ଅଧିକାରୀ ଗୋବିନ୍ଦ ବଲ୍ଲଭ ଷଡଙ୍ଗୀ ଏହି କାର୍ଯ୍ୟକ୍ରମ ଦ୍ୱାରା ଭିନ୍ନକ୍ଷମ ଶିଶୁଙ୍କ ଥଇଥାନ ପ୍ରକ୍ରିୟା ତ୍ୱରାନ୍ବିତ କରିବ ବୋଲି କହିଥିଲେ। ଭିନ୍ନକ୍ଷମ ଆୟୁକ୍ତଙ୍କ ପରାମର୍ଶଦାତା ଘାସିରାମ ପଣ୍ଡା, ଭିନ୍ନକ୍ଷମ ଓ ଅଭିଭାବକ ସଂଘ ସଭାପତି ତଥା ରେଆରର ବୋର୍ଡ ସଦସ୍ୟ ସୌଦାଗର ପାତ୍ର ଓ ସୌଦାମିନି ଜେନା ଉପସ୍ଥିତ ଥିଲେ। ଉପସଭାନେତ୍ରୀ ପଦ୍ମିନି ବକ୍ସି ସଭାରେ ଅଧ୍ୟକ୍ଷତା କରିଥିଲେ। ଅନଙ୍ଗ ନେଗୀ ସ୍ବାଗତ ଭାଷଣ ପ୍ରଦାନ ସହ କାର୍ଯ୍ୟକ୍ରମ ପରିଚାଳନା କରିଥିବା ବେଳେ ଅଞ୍ଜଳି ନେଗୀ ଧନ୍ୟବାଦ ପ୍ରଦାନ କରିଥିଲେ। ଏଥିରେ ଭୌତିକ ଚିକିତ୍ସକ ଡାକ୍ତର ବାଳକୃଷ୍ଣ କୁମ୍ଭାର, ଭୁବନଲାଲ ସତକାମି, ବ୍ୟବସାୟିକ ଚିକିତ୍ସିକା ଡାକ୍ତର ମିତାଲି ଶୁଭଦର୍ଶନୀ ସାହୁ, ଜ୍ୟୋତି ପ୍ରକାଶ ମିଶ୍ର ଓ ରଶ୍ମିତା ବାରିକ ସହଯୋଗ କରିଥିଲେ । ରାଷ୍ଟ୍ରୀୟ ନ୍ୟାସ ନୂଆଦିଲ୍ଳୀ ଏବଂ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ଓଡିଶା ସରକାରଙ୍କ ସହଯୋଗରେ ରେଆର ପରିଚାଳିତ ସୋନପୁର ଡେ କେଆର ଥେରାପି କେନ୍ଦ୍ର ଏବଂ ଦିଶା ତଥା ବିକାଶ କେନ୍ଦ୍ରରେ ଅପହଞ୍ଚ ଅଞ୍ଚଳରେ ରହୁଥିବା ମାନସିକ ଏବଂ ବୌଦ୍ଧିକ ଭିନ୍ନକ୍ଷମ ବ୍ୟକ୍ତିମାନଙ୍କୁ ଅନଲାଇନ ମାଧ୍ୟମରେ ଭୌତିକ ଚିକିତ୍ସା, ବ୍ୟବସାୟିକ ଚିକିତ୍ସା, ବାକ୍ଶିକ୍ଷା ଏବଂ ସ୍ବତନ୍ତ୍ର ଶିକ୍ଷା ପ୍ରଦାନ କରାଯିବ।