ନୂଆଦିଲ୍ଲୀ,୮।୨: ଜ୍ଞାନବାପି ମାମଲାରେ କୋର୍ଟଙ୍କ ନିଷ୍ପତ୍ତି ପ୍ରସଙ୍ଗରେ ଅଲିଗଡ ମୁସଲିମ୍ ୟୁନିଭର୍ସିଟିର ପ୍ରଫେସର ତଥା ଜଣାଶୁଣା ଐତିହାସିକ ଇରଫାନ ହବିବଙ୍କ ବିବୃତ୍ତି ସାମ୍ନାକୁ ଆସିଛି। ମଥୁରା ଏବଂ କାଶୀର ମନ୍ଦିର ଭାଙ୍ଗି ମସଜିଦ ର୍ନିମାଣ କରାଯାଇଛି। ଅନେକ ଇତିହାସ ପୁସ୍ତକରେ ଏହାର ଉଲ୍ଲେଖ କରାଯାଇଛି। ଏହାକୁ ପ୍ରମାଣ କରିବାକୁ କୌଣସି ସର୍ଭେ କିମ୍ବା କୋର୍ଟ କଚେରୀର ଆବଶ୍ୟକତା ନାହିଁ ବୋଲି ସେ କହିଛନ୍ତି। ସେହିଭଳି ୧୯୯୧ରେ ପୂଜାପାଠ ସ୍ଥାନ ଭାବରେ ଏହାର ବର୍ତ୍ତମାନର ସ୍ବରୂପକୁ ସଂରକ୍ଷିତ କରାଯାଇଛି, ଯାହା ଅନୁଯାୟୀ ୧୯୪୭ର ସ୍ଥିତିକୁ ବଜାୟ ରଖିବାକୁ ପଡିବ। ଯଦି କୌଣସି ପରିବର୍ତ୍ତନ କରିବାକୁ ହୁଏ ତେବେ ଏଥିପାଇଁ ଆଇନକୁ ପରିବର୍ତ୍ତନ କରିବାକୁ ପଡିବ ବୋଲି ସେ ମଧ୍ୟ କହିଛନ୍ତି।
ହବିବ କହିଛନ୍ତି, ୧୯୯୧ର ପ୍ଲେସ ଅଫ ଓରସିପ୍ ଅଧିନିୟମ ଅନୁଯାୟୀ ଏହାର ବର୍ତ୍ତମାନର ସ୍ବରୂପ ସୁରକ୍ଷିତ ଅଛି। ତଦନୁଯାୟୀ ୧୯୪୭ର ସ୍ଥିତି ବଜାୟ ରଖିବାକୁ ପଡିବ। କିନ୍ତୁ ଏଥିରେ କିଛି ପରିବର୍ତ୍ତନ କରିବାକୁ ପଡିବ। ଏଥିପାଇଁ ଆଇନକୁ ମଧ୍ୟ ପରିବର୍ତ୍ତନ କରିବାକୁ ପଡିବ। ତିନି ଶହ, ଚାରି ଶହ ବର୍ଷ ପରେ ସେଗୁଡ଼ିକର ମରାମତି କରିବାର ଅର୍ଥ କ’ଣ? ଏହା ସହିତ ସେ ଏକ ଉଦାହରଣ ଭାବରେ କହିଛନ୍ତି ଯେ ଭାରତରେ ହଜାର ହଜାର ବୌଦ୍ଧମଠଗୁଡ଼ିକୁ ଭାଙ୍ଗି ମନ୍ଦିର ନିର୍ମାଣ କରାଯାଇଥିଲା। ଏହା ପରେ ତୁମେ ସେଗୁଡ଼ିଙ୍କୁ ମଧ୍ୟ ଭାଙ୍ଗିବ କି? ଗୟାର ମହାବୋଧି ମନ୍ଦିର ଏହାର ତାଜା ଉଦାହରଣ। ଯେଉଁଠାରେ ଶୈବ ଧର୍ମର ଲୋକମାନେ କବ୍ଜା କରିଛନ୍ତି। ହେଲେ ବର୍ତ୍ତମାନ ଉଭୟ ହିନ୍ଦୁ ଏବଂ ବୌଦ୍ଧ ଧର୍ମାବଲମ୍ବୀ ଏଠାରେ ପୂଜା କରନ୍ତି।
