ରସୁଲପୁର,୨୫ା୧୨(ଡି.ଏନ.ଏ.): ରସୁଲପୁର ବ୍ଲକ ଅନ୍ତର୍ଗତ କୁଆଖିଆ ବାଜରର ବିଜୁ ଗ୍ରାମୀଣ ବଜାର ବିଏସ୍ ଆଗ୍ରୋ ଡିଲର ପଏଣ୍ଟ୍ ସମ୍ମୁଖରେ ମୁକୁଳା ଟ୍ରାନ୍ସଫର୍ମର ଚାରିପଟେ ଅସ୍ଥାୟୀ ବାଉଁଶବାଡ଼ ବୁଲାଇବା ଦିଗରେ ବିଦ୍ୟୁତ ବିତରଣ କମ୍ପାନୀ ଟାଟା ପାୱାର ଅଧିକାରୀ ତପତ୍ରତା ଦେଖାଇଛନ୍ତି। ବିଭାଗର ଅବହେଳା ଯୋଗୁ ଏକ ଜନଗହିଳପୂର୍ଣ୍ଣ ଓ ଲକ୍ଷ୍ମୀନାରାୟଣ ପୂଜା ଅବସରରେ ଭକ୍ତଙ୍କ ସମାଗମ ସ୍ଥାନରେ ଟ୍ରାନ୍ସଫର୍ମରଟି ବିପଦପୂର୍ଣ୍ଣ ଭାବରେ ଖୋଲା ପଡିଥିଲା। ଏନେଇ ଧରିତ୍ରୀରେ ଶୁକ୍ରବାର ଖବର ପ୍ରକାଶ ପାଇଥିଲା। ପରେ ଟ୍ରାନ୍ସଫର୍ମର ଚତୃପାର୍ଶ୍ୱରେ ଏକ ଅସ୍ଥାୟୀ ବାଡ଼ ବୁଲାଇ ଟ୍ରାନ୍ସଫର୍ମର ସ୍ଥଳକୁ ସୁରକ୍ଷିତ କରାଯାଇଛି। ଲକ୍ଷ୍ମୀନାରାୟଣ ପୂଜା ଅବସରରେ ଉକ୍ତ ଟ୍ରାନ୍ସଫର୍ମର ଚାରିପଟେ ଦୋକାନ ବଜାର ଘେରି ରହିଛି। ଭକ୍ତଙ୍କର ଭିଡ ଜମୁଥିବାରୁ ଏହି ସ୍ଥାନରେ ସ୍ଥାୟୀ ଲୁହାବାଡ ଲଗାଇବା ସମ୍ଭବପର ହେଉନାହିଁ। ପୂଜା ସରିଯିବା ପରେ ଅସ୍ଥାୟୀ ବାଡକୁ ହଟାଇ ଦିଆଯାଇ ଏକ ସ୍ଥାୟୀ ବାଡ଼ ଲଗାଇବା ବ୍ୟବସ୍ଥା କରାଯିବ ବୋଲି ବିଭାଗୀୟ ଅଧିକାରୀଙ୍କ ସୂତ୍ରରୁ ଜଣାଯାଇଛି। ତେବେ ଖବର ପ୍ରସାରଣ ପରେ ସମସ୍ୟା ସମାଧାନ ହୋଇପାରିଥିବାରୁ ଜନସାଧାରଣଙ୍କୁ ଚିନ୍ତାରୁ ମୁକ୍ତି ମିଳିଛି।
