ଛତ୍ରପୁର,୨।୭(ଡି.ଏନ୍.ଏ.): ଗଞ୍ଜାମ ଜିଲାରେ ଦିନକୁ ଦିନ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ଏ ନେଇ ଗତ ୩୦ ଜୁନ ମଧ୍ୟରେ ବିଭିନ୍ନ ପଞ୍ଚାୟତରେ ଚାଲୁ ରହିଥିବା ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରଗୁଡ଼ିକ ବନ୍ଦ କରାଯାଇ, ନୂତନ ଭାବେ ଗଠନ ହୋଇଥିବା କ୍ଲଷ୍ଟର ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରର ଖୋଲିବାକୁ ଜିଲାପାଳ ବିଜୟ ଅମୃତା କୁଲାଙ୍ଗେ ନିର୍ଦ୍ଦେଶ ଦେଇଛନ୍ତି। ସହରାଞ୍ଚଳ ଓ ବିଜ୍ଞାପିତ ଅଞ୍ଚଳରେ ୨୦ଟି ଶଯ୍ୟା ବିଶିଷ୍ଟ କ୍ଲଷ୍ଟର ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ସ୍ଥାପନ ହୋଇଛି । ସମ୍ପ୍ରତି ଆକ୍ଟିଭ କଣ୍ଟାକ୍ଟ ଟ୍ରେସିଂ କରିବା ଅତି ଜରୁରୀ ବିଷୟ। ବ୍ଲକ ସ୍ତରୀୟ ସ୍ବାବ ସଂଗ୍ରହ ବୃଦ୍ଧିକରିବାକୁ ସେ ନିର୍ଦ୍ଦେଶ ଦେଇଛନ୍ତି । ଅପରାହ୍ନ ୪ଟା ପରେ ସମସ୍ତ ଦୋକାନ ଯେମିତି ବନ୍ଦ ରହିବ ସେଥିପ୍ରତି କଡ଼ା ନଜର ରଖାଯିବ । ଦୋକାନ ସମ୍ମୁଖରେ ବ୍ୟାରିକେଟ ବ୍ୟବସ୍ଥା, ସାମାଜିକ ଦୂରତ୍ୱ, ମାସ୍କ ପିନ୍ଧିବା, ଦୋକାନୀ ଗ୍ଲୋବସ ପିନ୍ଧିବା, ମାସ୍କ ନାହିଁ ତ ସାମଗ୍ରୀ ନାହିଁ ପୋଷ୍ଟ ଲଗାଇବା, କେଉଁ ମାନଙ୍କୁ ସାମଗ୍ରୀ ବିକ୍ରି କଲେ ତାର ତଥ୍ୟ ରଖିବା ଇତ୍ୟାଦି ବିଷୟ ନେଇ ଅବମାନନା କରୁଥିବା ଦୋକାନ ବନ୍ଦ ହେବ। ଗାଁ ଗହଳିରେ ଲୋକେ ଏକାଠି ବସି ତାସ ଖେଳିବା ନଜର ଆସୁଛି । ସେମାନେ କୋଭିଡ ଆଇନ ଉଲ୍ଲଂଘନ କରୁଥିବା ହେତୁ ସେମାନଙ୍କୁ କ୍ୱାରାଣ୍ଟାଇନ ସେଣ୍ଟରରେ ରଖାଯିବା ପାଇଁ ସତର୍କ କରାଇଦିଆଯାଛି। ପନିପରିବା ବଜାର ବନ୍ଦ କରି ସାହିସାହିରେ ବିକ୍ରି କରିବା ଉପରେ ପୁଣିଥରେ ଗୁରୁତ୍ୱ ଦିଆଯାଇଛି । ମାଛ ବେପାରୀମାନେ ମାଛବିକ୍ରି କଲା ବେଳେ ବାରିକେଟ କରି ସାମାଜିକ ଦୂରତ୍ୱ ବଜାୟ ରଖିବାକୁ ପରାମର୍ଶ ଦିଆଯାଇଛି। ଏହା ସହ କୋଭିଡ ଯୋଦ୍ଧାମାନଙ୍କର ସ୍ବାସ୍ଥ୍ୟ ପ୍ରତି ଦୃଷ୍ଟି ଦେବାକୁ କୁହାଯାଇଛି ।