ମୁନିଗୁଡ଼ା,୯ା୪(ଡି.ଏନ୍.ଏ.): ମୁନିଗୁଡ଼ାରେ ଅସ୍ଥାୟୀ ଜେଏମ୍ଏଫସି କୋର୍ଟ ଓ ସବ୍ ରେଜେଷ୍ଟ୍ରି ଅଫିସ ତୁରନ୍ତ କାର୍ଯ୍ୟକ୍ଷମ କରାଯିବାକୁ ଦାବି ହୋଇଛି। ଗତ ଅକ୍ଟୋବର ଶେଷ ସପ୍ତାହରେ ରାୟଗଡ଼ା ଜିଲାଜଜ୍ ବିକ୍ରମ କେଶରୀ ପଟ୍ଟନାୟକଙ୍କ ସହ ଏକ ପ୍ରତିନିଧିଦଳ ମୁନିଗୁଡ଼ା ଆସି କୋର୍ଟ ପାଇଁ ଜାଗା ଓ ପାରିପାଶର୍ବିକ ବ୍ୟବସ୍ଥା ତଦାରଖ କରିଥିଲେ। ତତ୍କାଳୀନ ମୁନିଗୁଡ଼ା ତହସିଲଦାର ଦେବାଶିଷ ଗୌଡ଼,ମୁନିଗୁଡାର ବରିଷ୍ଠ ଅଧିବକ୍ତା ବୃନ୍ଦାବନ ଗୌଡ଼,ସୁଧାକର ମହାରଣା ପ୍ରମୁଖଙ୍କ ସହିତ ପ୍ରେସ କ୍ଲବର ସଭ୍ୟମାନଙ୍କ ସହିତ ତହସିଲ ପୁରୁଣା କୋଠାରେ ଅସ୍ଥାୟୀ କୋର୍ଟ ଚାଲୁ କରିବା ପାଇଁ ଆଲୋଚନା ହୋଇଥିଲା। ତତ୍କାଳୀନ ତହସିଲଦାର ସମସ୍ତ ଆନୁଷଙ୍ଗିକ ବ୍ୟବସ୍ଥା ଯୋଗାଇ ଦେବାକୁ ସମ୍ମତି ଜଣାଇଥିଲେ। ପରେ ଏକ ମାସ ପରେ ପୁରୁଣା ତହସିଲ କାର୍ଯ୍ୟାଳୟକୁ ଅସ୍ଥାୟୀ କୋର୍ଟ କରିବା ଲାଗି ୧୨ଲକ୍ଷ ଟଙ୍କା ବ୍ୟୟ ଅଟକଳରେ ଆର.ଡି ଡିପାର୍ଟମେଣ୍ଟ ଦ୍ୱାରା କାର୍ଯ୍ୟ ଆରମ୍ଭ ହୋଇଥିଲା। ତେବେ ଜେଏମଏଫସି କୋର୍ଟ ନିର୍ମାଣ କାର୍ଯ୍ୟ ବିଳମ୍ବକୁ ନେଇ ସାଧାରଣରେ ଉଦବେଗ ପ୍ରକାଶ ପାଉଛି। ଏ ନେଇ ଆରଡି ବିଭାଗର ଉପଖଣ୍ଡ ଯନ୍ତ୍ରୀ ବ୍ରଜକିଶୋର ପଟ୍ଟନାୟକଙ୍କୁ ପଚାରିବାରୁ ଆସନ୍ତା ୧୫ତାରିଖ ସୁଦ୍ଧା କାର୍ଯ ଶେଷ ହେବ ବୋଲି ଜଣାଇଥିଲେ।ସେହିପରି ମୁନିଗୁଡ଼ାରେ ସବ ରେଜେଷ୍ଟ୍ରି କାର୍ଯ୍ୟାଳୟ ପାଇଁ ବିଜ୍ଞପ୍ତି ପ୍ରକାଶ ପାଇଥିବା ଶୁଣିବାକୁ ମିଳୁଥିଲେ ମଧ୍ୟ ତାହା ହୋଇ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଉଛି। ଏଥିପାଇଁ ମୁନିଗୁଡ଼ା ବିକାଶ ପରିଷଦ,ପ୍ରେସ କ୍ଲବ,ବଜରଙ୍ଗ ଦଳ,ମର୍ଚ୍ଚାଣ୍ଡ ଆସୋସିଏଶନ ସହ ଅନେକ ସାମାଜିକ ଅନୁଷ୍ଠାନ ଜିଲାପାଳ ତଥା ବିଭାଗୀୟ ଅଧିକାରୀ ମାନଙ୍କୁ ଭେଟି ବହୁବାର ଲିଖିତ ଓ ମୌଖିକ ଭାବେ ଜଣାଇଥିଲେ ମଧ୍ୟ ତାହା କାର୍ଯ୍ୟକାରୀ ହୋଇନାହିଁ। ତେଣୁ ଯଥାଶୀଘ୍ର ମୁନିଗୁଡ଼ା ଜେଏମଏଫସି କୋର୍ଟ ମୁନିଗୁଡାର ଜନ ସାଧାରଣଙ୍କ ସେବାରେ କାର୍ଯ୍ୟକାରୀ କରାଇବା ସହିତ ଯଥାଶୀଘ୍ର ସବ ରେଜିଷ୍ଟ୍ରି ଅଫିସ କାର୍ଯ୍ୟକାରୀ କରିବା ପାଇଁ ଦାବି ଜୋର୍ ଧରିଛି।
