ଭୁବନେଶ୍ୱର,୭।୯ : ଭରତପୁର ଥାନା ରୁଚିକା ମାର୍କେଟ ମହାବୀର ବସ୍ତିର ଏକ ଭଡାଘରୁ ମଙ୍ଗଳବାର ମିଳିଛି ଜଣେ ଯୁବତୀଙ୍କ ମୃତଦେହ। ପାରିପାର୍ଶ୍ୱିକ ସ୍ଥିତିରୁ ଏହା ଏକ ହତ୍ୟାକାଣ୍ଡ ବୋଲି ପୋଲିସ ସ୍ପଷ୍ଟ କରିଛି। ଅପରାହ୍ନରେ ଘର ମାଲିକଙ୍କଠୁ ଖବର ପାଇ ପୋଲିସ ପହଞ୍ଚିଥିଲା ଘଟଣାସ୍ଥଳରେ। ଘର ତାଲା ଭାଙ୍ଗି ଦେଖିବାରୁ ଭିତରେ ପଡ଼ିଥିଲା ଜଣେ ଯୁବତୀଙ୍କ ଗଳିତ ମୃତଦେହ। ମୃତ ଯୁବତୀଙ୍କର ବୟସ ୨୦ରୁ ୨୫ ବର୍ଷ ମଧ୍ୟରେ ହେବ।
ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ସାଇଣ୍ଚିଫିକ୍ ଟିମ୍ ପହଞ୍ଚି ପୂରା ଘରକୁ ଯାଞ୍ଚ କରି ପରୀକ୍ଷା କରିବା ସହ ବିଭିନ୍ନ ନମୁନା ସଂଗ୍ରହ କରିଛି। ମୃତଦେହ ଜବତ ପରେ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଯାଇଛି।
ପଡ଼ିଶା ଲୋକଙ୍କ ଅନୁଯାୟୀ, ଜଣେ ଯୁବକ ଓ ଜଣେ ଯୁବତୀ ୧୦ ଦିନ ହେଲା ଘରଭଡା ନେଇ ରହୁଥିଲେ। ଯୁବକଙ୍କ ବାଇକରେ ଯୁବତୀ ଜଣକ ବସି ସକାଳୁ ଯାଇ ରାତିକୁ ଆସୁଥିଲେ। ସେମାନେ କେଉଁ କାମ, କେଉଁଠାରେ କରନ୍ତି କେହି ଜାଣି ନ ଥିଲେ। ଦୁହେଁ ସବୁବେଳେ ମାସ୍କ ଲଗାଉଥିବାରୁ କାହା ମୁହଁ ସ୍ପଷ୍ଟ ଦେଖାଯାଉ ନ ଥିଲା। କିଛି ଦିନ ହେଲା ଘରଟି ବାହାର ପଟୁ ତାଲା ପଡିଥିଲା। ତେବେ ମଙ୍ଗଳବାର ଘରୁ ଅତ୍ୟଧିକ ଦୁର୍ଗନ୍ଧ ହେବାରୁ ଘରମାଲିକଙ୍କୁ ଖବର ଦେଇଥିଲେ ପଡ଼ୋଶୀମାନେ।