ମାଲକାନଗିରି,୧୧ା୭ (ଡି.ଏନ୍.ଏ.): ପଡୋଶୀ ଛତିଶଗଡ଼ରେ ଜଣେ ଦଶମାସର ଶିଶୁଙ୍କୁ ରେଳ ବିଭାଗରେ ଚାକିରି ମିଳିଛି। ଏହା ଆଶ୍ଚର୍ଯ୍ୟ ହେଲେ ମଧ୍ୟ ସତ୍ୟ। ତେବେ ଏତେ କମ ବୟସରେ ଚାକିରି ପାଇବା ରେକର୍ଡ ସୃଷ୍ଟି କରିଥିବା ବେଳେ ଏହା ପଛରେ ରହିଥିବା ଦୁଃଖଦ ଘଟଣା ସମସ୍ତଙ୍କୁ ବ୍ୟଥିତ କରିଛି। ଖବରରୁ ଜଣାପଡିଛି ରାଜେନ୍ଦ୍ର କୁମାର ଯାଦବ ନାମକ ବ୍ୟକ୍ତି ଭିଲାଇରେ ରେଲଓ୍ବେରେ ପିପି ୟାର୍ଡରେ ସହକାରୀ ଭାବେ କାର୍ଯ୍ୟ କରୁଥିଲେ। ସେ ଚୋରଡାରେ ସପରିବାର ରହୁଥିଲେ। ରାଜେନ୍ଦ୍ର ଗତ ଜୁନ୍ ୧ରେ ମୋଟରସାଇକେଲ ଯୋଗେ ସ୍ତ୍ରୀ ମଞ୍ଜୁଲତାଙ୍କୁ ଧରି ଭିଲାଇ ଯାଉଥିବା ବେଳେ ସଡକ ଦୁର୍ଘଟଣାରେ ଉଭୟ ସ୍ବାମୀ ସ୍ତ୍ରୀଙ୍କ ମୃତ୍ୟୁ ଘଟିଥିଲା। ସୌଭାଗ୍ୟବଶତଃ ତାଙ୍କର ୧୦ ମାସର ଶିଶୁକନ୍ୟା ରାଧିକା ବଞ୍ଚତ୍ୟାଇଥିଲେ। ଏହାକୁ ଦକ୍ଷିଣ ପୂର୍ବ କେନ୍ଦ୍ର ରେଳ ବିଭାଗ ଗୁରୁତର ସହ ନେଇ ଏକ ସ୍ବତନ୍ତ୍ର ବୋର୍ଡ ଦ୍ୱାରା ରେଳ ମନ୍ତ୍ରୀଙ୍କ ସହ ଯୋଗାଯୋଗ କରି ଏହି ଛୋଟ ଶିଶୁଙ୍କ ଲାଳନ ପାଳନ ପାଇଁ ପୁନର୍ବସତି ଯୋଜନାରେ ଚାକିରି ଦେବାକୁ ନିଷ୍ପତ୍ତି ନେଇଥିଲେ। ବୋର୍ଡର ଅନୁମୋଦନ ପରେ ଜୁଲାଇ ୭ ତାରିଖରେ ରାଧିକାଙ୍କୁ ନିଯୁକ୍ତିପତ୍ର ପ୍ରଦାନ କରାଯାଇଥିଲା। ନିଜର ସମ୍ପର୍କୀୟଙ୍କ ସହ କୁନି ଝିଅ ରାଧିକା ରେଳବିଭାଗର ବୋର୍ଡ ନିକଟକୁ ଆସିଥିଲେ। ସେଠାରେ ନିଯୁକ୍ତିପତ୍ରରେ ତାଙ୍କ ଟିପଚିହ୍ନ ନିଆଯାଇଥିଲା। ତେବେ ବୋର୍ଡ ନିଷ୍ପତ୍ତି ଅନୁସାରେ ଶିଶୁ ରାଧିକା ୧୮ ବର୍ଷ ହେବା ଯାଏ ତାଙ୍କର ସମ୍ପୂର୍ଣ୍ଣ ଦରମା ପାଇବେ। ୧୮ ବର୍ଷ ପରେ ତାଙ୍କୁ ରେଲଓ୍ବେରେ ଯୋଗ୍ୟତା ଅନୁଯାୟୀ ନିଯୁକ୍ତି ମିଳିବ ବୋଲି ନିଷ୍ପତ୍ତି ହୋଇଛି। ସ୍ବତନ୍ତ୍ର ଶିଶୁ ବିକାଶ ସଂସ୍ଥା ଏବଂ ତାଙ୍କ ସମ୍ପର୍କୀୟମାନେ ଶିଶୁଟିର ଲାଳନ ପାଳନ କରିବେ। ତାଙ୍କ ଦରମା ବ୍ୟାଙ୍କ ଏକାଉଣ୍ଟରେ ରହିବ ବୋଲି ଜଣାପଡିଛି। ଭାରତ ରେଲଓ୍ବେ ଇତିହାସରେ ଏତେ ଛୋଟ ଶିଶୁଙ୍କୁ ନିଯୁକ୍ତି ମିଳିବା ଘଟଣା ପ୍ରଥମ ବୋଲି ଜଣାପଡିଛି।