ଓ୍ବାଶିଂଟନ୍, ୨୪ା୩: ଆମେରିକାର କଲରାଡୋ ରାଜ୍ୟରେ ଆତତାୟୀଙ୍କ ଗୁଳିରେ ସୋମବାର ଜଣେ ପୋଲିସ ଅଫିସରଙ୍କ ସମେତ ମୋଟ ୧୦ ଜଣଙ୍କ ମୃତ୍ୟୁ ଘଟିଛି। ଜଣେ ବନ୍ଧୁକଧାରୀ ବୋଲ୍ଡର ସହରସ୍ଥିତ ଏକ ଗ୍ରସୋରୀ ମାର୍କେଟରେ ପଶି ଗୁଳି ଚଳାଇଥିଲେ। ପୋଲିସ ଜଣେ ସନ୍ଦିଗ୍ଧଙ୍କୁ ଅଟକ ରଖିଛି। କିଙ୍ଗ୍ ସୁପରମାର୍କେଟରେ ଘଟିଥିବା ଏହି ଘଟଣାର ଲାଇଭ୍ ଭିଡିଓ ସୋସିଆଲ ମିଡିଆରେ ପ୍ରତ୍ୟକ୍ଷଦର୍ଶୀମାନେ ଅପ୍ଲୋଡ୍ କରିଛନ୍ତି। ସ୍ଥାନୀୟ ଲୋକେ ଉକ୍ତ ମାର୍କେଟରେ ସାମଗ୍ରୀ କିଣାକିଣି କରୁଥିବାବେଳେ ଜଣେ ବନ୍ଧୁକଧାରୀ ହଠାତ୍ ସେଠାରେ ଗୁଳିଚାଳନା କରିଥିଲେ। ସେହି ସମୟରେ ପୋଲିସ ଅଫିସର ଏରିକ୍ ଟାଲି(୫୧) ପ୍ରଥମେ ସମ୍ପୃକ୍ତ ବ୍ୟକ୍ତିଙ୍କୁ ଅଟକାଇବାକୁ ଚେଷ୍ଟା କରୁଥିବାବେଳେ ଗୁଳି ବାଜି ଏରିକଙ୍କ ମୃତ୍ୟୁ ଘଟିଥିଲା। ପ୍ରାୟ ସପ୍ତାହେ ପୂର୍ବରୁ ଜର୍ଜିଆର ଆଟଲାଣ୍ଟା ଅଞ୍ଚଳରେ ହୋଇଥିବା ଗୁଳିକାଣ୍ଡରେ ୮ ଜଣଙ୍କ ମୃତ୍ୟୁ ଘଟିଥିଲା।