ମୁମ୍ବାଇ,୨ା୧୧(ପି.ଟି.): ଭାରତୀୟ କ୍ରିକେଟ କିମ୍ବଦନ୍ତୀ ସଚିନ୍ ତେନ୍ଦୁଲକରଙ୍କ ଏକ ପ୍ରତିମୂର୍ତ୍ତି ବୁଧବାର ଓ୍ବାଙ୍ଖଡେ ଷ୍ଟାଡିୟମରେ ଉନ୍ମୋଚିତ ହୋଇଛି। ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ମୁଖ୍ୟ ଅତିଥି ଭାବରେ ଯୋଗ ଦେଇ ପ୍ରତିମୂର୍ତ୍ତି ଉନ୍ମୋଚନ କରିଥିଲେ। ପତ୍ନୀ ଅଞ୍ଜଳି ଓ ଝିଅ ସାରାଙ୍କ ସହିତ ସଚିନ୍ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ଷ୍ଟ୍ରୋକ୍ ଖେଳୁଥିବା ମୁଦ୍ରାରେ ଏହି କିମ୍ବଦନ୍ତୀ ବ୍ୟାଟରଙ୍କ ପ୍ରତିମୂର୍ତ୍ତୀଟି ସଚିନ ତେନ୍ଦୁଲକର ଷ୍ଟାଣ୍ଡ ନିକଟରେ ରଖାଯାଇଛି। ତେନ୍ଦୁଲକରଙ୍କ ମୂର୍ତ୍ତି ଉନ୍ମୋଚନ ଅବସରରେ ପୂର୍ବତନ ବିସିସିଆଇ ଓ ଆଇସିସି ସଭାପତି ଶରଦ ପଓ୍ବାର, ବିସିସିଆଇ ସମ୍ପାଦକ ଜୟ ଶାହା, କୋଷାଧ୍ୟକ୍ଷ ଆଶିଷ ଶେଲାରଙ୍କ ସମେତ ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ) ଅଫିସିଆଲ, ସଭାପତି ଅମୋଲ କାଲେ ଓ ବିସିସିଆଇ ଉପ ସଭାପତି ରାଜୀବ ଶୁକ୍ଲା ପ୍ରମୁଖ ଉପସ୍ଥିତ ଥିଲେ। ଏହା ମୋ ପାଇଁ ଏକ ସ୍ବତନ୍ତ୍ର ମୂହୂର୍ତ୍ତ। ଏହି ଗ୍ରାଉଣ୍ଡ ସହିତ ମୋର ଅନେକ ସ୍ମୃତି ଜଡିତ ଥିବା ବେଳେ ଏଠାରେ ମୋର ପ୍ରତିମୂର୍ତ୍ତି ନିର୍ମାଣ ହେବା ମୋ ପାଇଁ ଏକ ସମ୍ମାନର ବିଷୟ ବୋଲି ତେନ୍ଦୁଲକର କହିଛନ୍ତି।