ନୂଆଦିଲ୍ଲୀ,୧୫।୧: ବର୍ଷର ପ୍ରଥମ ଗ୍ରାଣ୍ଡସ୍ଲାମ ‘ଅଷ୍ଟ୍ରେଲିୟ ଓପନ’ର ଠିକ ପୂର୍ବରୁ ଟେନିସ କିମ୍ବଦନ୍ତୀ ନୋଭାକ ଜୋକୋଭିକ ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ଷ୍ଟିଭ ସ୍ମିଥଙ୍କ ସହ କ୍ରିକେଟ ଖେଳିଥିଲେ। ଟେନିସ କୋର୍ଟରେ ଦୁହେଁ ମଧ୍ୟ ମୁହାଁମୁହିଁ ହୋଇଥିଲେ। ଏହା ପରେ ଜୋକୋଭିକ କ୍ରିକେଟ ସମ୍ବନ୍ଧୀୟ ଅନେକ ପ୍ରଶ୍ନର ଉତ୍ତର ଦେଇଥିଲେ। ଏଠାରେ ସେ ବିରାଟ କୋହଲିଙ୍କ ନାମ ମଧ୍ୟ ନେଇଥିଲେ। ଏହା ପରେ ଯେତେବେଳେ ବିରାଟଙ୍କୁ ଜୋକୋଭିକ ବିଷୟରେ ପଚରାଗଲା, ସେ ଏହି ଟେନିସ ଖେଳାଳିଙ୍କ ସହ ତାଙ୍କର ସମ୍ପର୍କ ବିଷୟରେ ବିସ୍ତୃତ ଭାବରେ କହିଥିଲେ। ଏହି ସମୟରେ କୋହଲି ଜୋକୋଭିକ୍ଙ୍କୁ ମଧ୍ୟ ବହୁତ ପ୍ରଶଂସା କରିଥିଲେ। କୋହଲିଙ୍କ ଏହି ପ୍ରଶଂସା ପରେ ଜୋକୋଭିକ ବର୍ତ୍ତମାନ ବିରାଟଙ୍କୁ ଧନ୍ୟବାଦ ଦେଇଛନ୍ତି।
ଜୋକୋଭିକ ଏକ ଇନଷ୍ଟା ଷ୍ଟାଟସ ଶେୟାର କରିଛନ୍ତି। ଏହି ଷ୍ଟାଟସରେ ସେ ଭାରତୀୟ କ୍ରିକେଟ ଦଳର ଏକ ରିଲ୍ସ ଶେୟାର କରିଛନ୍ତି। ଏଥିରେ ବିରାଟ କୋହଲି ତାଙ୍କୁ ପ୍ରଶଂସା କରୁଥିବା ଦେଖିବାକୁ ମିଳିଛି। ଏହି ରିଲ୍ସ ଶେୟାର କରି ଜୋକୋଭିକ ଲେଖିଛନ୍ତି, ଏହି ସୁନ୍ଦର ଶବ୍ଦ ପାଇଁ ବିରାଟଙ୍କୁ ଧନ୍ୟବାଦ। ଆମେ ଏକାଠି ଖେଳିବା ଦିନକୁ ଅପେକ୍ଷା କରିଛି।
ଇନ୍ଦୋରରେ ଆଫଗାନିସ୍ତାନ ବିପକ୍ଷରେ ଖେଳାଯାଇଥିବା ଟି-୨୦ ମ୍ୟାଚର ଗୋଟିଏ ଦିନ ପୂର୍ବରୁ ବିରାଟ କୋହଲି ବିସିସିଆଇ ଟିଭି ସହ ସାକ୍ଷାତକାରରେ ନୋଭାକ ଜୋକୋଭିକଙ୍କ ସହ ବନ୍ଧୁତା ସହ ଜଡିତ ଅନେକ ପ୍ରଶ୍ନର ଉତ୍ତର ଦେଇଛନ୍ତି। ବିରାଟ କୋହଲି କହିଥିଲେ, ମୁଁ ଇନଷ୍ଟାଗ୍ରାମରେ ନୋଭାକଙ୍କ ପ୍ରୋଫାଇଲକୁ ଦେଖୁଥିଲି। ତାଙ୍କୁ ମେସେଜ୍ ଦେବା ପାଇଁ ମୁଁ ଚାଟ ବକ୍ସ ଖୋଲି ଦେଖିଲି ଯେ ସେ ମୋତେ ମେସେଜ କରିସାରିଛନ୍ତି। ମୁଁ ପ୍ରଥମ ଥର ପାଇଁ ମୋର ଚାଟ ବକ୍ସ ଖୋଲିଲି। ତାଙ୍କର ମେସେଜ୍ ବହୁତ ଦିନ ପୂର୍ବରୁ ଆସିଥିଲା। ପ୍ରାରମ୍ଭରେ ମୁଁ ଭାବିଲି ଏହା ଏକ ନକଲି ଆଇଡିରୁ ଆସିଥାଇପାରେ, କିନ୍ତୁ ଯେତେବେଳେ ମୁଁ ପୁନର୍ବାର ଚେକ କଲି, ଦେଖିଲି ଯେ ରିଅଲ୍ ଆକାଉଣ୍ଟରୁ ବାର୍ତ୍ତା ଆସିଛି। ଏହା ପରେ ଆମର କଥାବାର୍ତ୍ତା ଆରମ୍ଭ ହେଲା। ସଫଳତା ପାଇଁ ଆମେ ପରସ୍ପରକୁ ଅଭିନନ୍ଦନ ଜଣାଉଛୁ।
ଏହା ପରେ ବିରାଟ ନୋଭାକଙ୍କୁ ବହୁତ ପ୍ରଶଂସା କରିଥିଲେ। ସେ କହିଥିଲେ, ମୁଁ ତାଙ୍କୁ ବହୁତ ସମ୍ମାନ କରେ। ତାଙ୍କର ଟେନିସ କ୍ୟାରିୟର ଉଜ୍ଜ୍ୱଳ। ତାଙ୍କର ଫିଟନେସ ମୋତେ ସବୁବେଳେ ପ୍ରେରଣା ଦେଇଥାଏ। ଶେଷରେ ସେ ଜୋକୋଭିକଙ୍କୁ ଅଷ୍ଟ୍ରେଲୀୟ ଓପନ ପାଇଁ ଶୁଭେଚ୍ଛା ଜଣାଇଛନ୍ତି।