ଗଞ୍ଜାମ,୨୪।୯(ବିଦ୍ୟାଧର ସାହୁ): ଗଞ୍ଜାମ ତହସିଲଦାର ଅରୁଣ କୁମାର ନାୟକ ସର୍ବଭାରତ ସ୍ତରରେ ଅନୁଷ୍ଠିତ ରାଜ୍ୟସ୍ତରୀୟ ଟେନିସ ଟୁର୍ନାମେଣ୍ଟରେ ଭାଗନେଇ ଜିଲା ଓ ରାଜ୍ୟ ପାଇଁ ଗୌରବ ଆଣିଛନ୍ତି। ରାଜସ୍ଥାନର ଉଦୟପୁରଠାରେ ଅନୁଷ୍ଠିତ ଟୁର୍ନାମେଣ୍ଟର ଏକ ମ୍ୟାଚ୍ରେ ପଞ୍ଜାବକୁ ହରାଇ ତହସିଲଦାର ଅରୁଣ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ତହସିଲଦାରଙ୍କ ଏହି ସଫଳତା ପାଇଁ ସରକାରୀ, ବେସରକାରୀ ତଥା ବିଭିନ୍ନ ସଂଗଠନ ପକ୍ଷରୁ ତାଙ୍କୁ ଶୁଭେଚ୍ଛା ଜ୍ଞାପନ କରାଯାଇଛି।
ପ୍ରକାଶଯୋଗ୍ୟ, ତହସିଲଦାର ଅରୁଣ ଭଲ କ୍ରିକେଟ୍ ଖେଳାଳି ଭାବେ ଅଞ୍ଚଳରେ ବେଶ ଜଣାଶୁଣା। ଏପରିକି ଟେନିସ୍ରେ ମଧ୍ୟ ତାଙ୍କର ପାରଦର୍ଶିତା ରହିଛି। ସ୍ବାଧୀନତା ଦିବସ ଅବସରରେ ଛତ୍ରପୁରଠାରେ ପ୍ରେସ ଏକାଦଶ ଏବଂ ପ୍ରଶାସନ ଏକାଦଶ ମଧ୍ୟରେ ଫ୍ରଣ୍ଡସ କ୍ରିକେଟ ଟୁର୍ନାମେଣ୍ଟ ଅନୁଷ୍ଠିତ ହୋଇଥିଲା। ଏଥିରେ ତହସିଲଦାର ନାୟକ ଉତ୍ତମ ଖେଳ ପ୍ରଦର୍ଶନ କରି ପ୍ରଶାସନ ଏକାଦଶକୁ ଚାମ୍ପିୟନ କରାଇଥିଲେ। ସେହିପରି ଭାରତୀ ବିଦ୍ୟାପୀଠ ମିନି ଷ୍ଟାଡିୟମରେ ଗଞ୍ଜାମ ପ୍ରେସକ୍ଳବ ସହ ଗଞ୍ଜାମ ତହସିଲ ମଧ୍ୟରେ ଅନୁଷ୍ଠିତ କ୍ରିକେଟ ମ୍ୟାଚରେ ତହସିଲଦାର ନାୟକ ଅତି ଚମତ୍କାର ଖେଳ ପ୍ରଦର୍ଶନ କରିଥିଲେ। ତହସିଲଦାରଙ୍କ ଏହି ସଫଳତା ପାଇଁ ତାଙ୍କୁ ଗଞ୍ଜାମ ପ୍ରେସ କ୍ଳବ ପକ୍ଷରୁ ଅଭିନନ୍ଦନ ଜଣାଯାଇଛି।