ସୁନ୍ଦରଗଡ/ଟେନ୍ସା/ବଣାଇଁ, ୫।୧ (ଡି.ଏନ୍.ଏ)/(ସ୍ବ.ପ୍ର ): ସୁନ୍ଦରଗଡ ଜିଲା କୋଇଡା ବ୍ଲକ ଟେନ୍ସା ଫାଣ୍ଡି ଅଧିକାରୀ ଙ୍କ ଉପରେ ମଙ୍ଗଳବାର ଅପରାହ୍ନ ପ୍ରାୟ ସାଢେ ୪ଟା ବେଳେ ତୀର ମାଡହୋଇଛି। ଫାଣ୍ଡି ଅଧିକାରୀ ଅଶୋକ କୁମାର ବେହେରା ପିସିଆର୍ ଭ୍ୟାନ୍ ଯୋଗେ ଜିରୋ ପଏଣ୍ଟ ହାଟିଂ (ବସ୍ତି)କୁ ଯାଇଥିଲେ। ଏହି ସମୟରେ ତାଙ୍କ ଡାହାଣପାଖକୁ ଲକ୍ଷ୍ୟ କରି ବସ୍ତି ଭିତରୁ କେହିଜଣେ ତୀରମାଡ କରିଥିଲେ। ତୀରଟି ତାଙ୍କ ଡାହାଣ ପେଟରେ ପଶି ଯାଇଛି। ତୀର ମାଡର ସଠିକ କାରଣ ଜଣାପଡି ନ ଥିବା ବେଳେ ଦେଶୀ ମଦ ଧରିବାକୁ ଯାଇଥିବା ବେଳେ ଏଭଳି ଅଘଟଣ ଘଟିଥିବା ଚର୍ଚ୍ଚା ହେଉଛି। ତେବେ ଆହତ ଅଧିକାରୀଙ୍କୁ ପିସିଆର୍ ଯୋଗେ ଟେନ୍ସା ଇସ୍ପାତ ହସ୍ପିଟାଲକୁ ନିଆଯାଇଥିଲା। ହେଲେ ସେଠାରେ ପ୍ରାଥମିକ ଚିକିତ୍ସା ପରେ ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ରାଉରକେଲା ଜେନେରାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଏହି ଘଟଣା ପରେ ପୋଲିସ ଭୟରେ ଜିରୋପଏଣ୍ଟ ହାଟିଂ ପୁରୁଷ ଶୂନ୍ୟ ହୋଇଯାଇଛି। ବରିଷ୍ଠ ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।
