ନୂଆଦିଲ୍ଲୀ, ୮।୯: ଭାରତ ଚାଇନା ମଧ୍ୟରେ ଏଲ୍ଏସିରେ ଉତ୍ତେଜନା ବଢ଼ି ଚାଲିଛି। ଏପରିସ୍ଥଳେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ୩ ଦିନିଆ ରୁଷ୍ ଗସ୍ତ ପରେ ଏବେ ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ୪ ଦିନିଆ ଗସ୍ତ ମଙ୍ଗଳବାରଠାରୁ ଆରମ୍ଭ ହୋଇଛି। ସେ ସେପ୍ଟେମ୍ବର ୧୦ରେ ସାଙ୍ଘାଇ କୋପରେଶନ ଅର୍ଗାନାଇଜେଶନ(ଏସ୍ସିଓ)ର ବହିର୍ବ୍ୟାପାର ମନ୍ତ୍ରୀ ସମ୍ମିଳନୀରେ ଯୋଗଦେବାର କାର୍ଯ୍ୟକ୍ରମ ରହିଛି। ଏହା ପୂର୍ବରୁ ରାଜନାଥ ଏସ୍ସିଓ ପ୍ରତିରକ୍ଷା ମନ୍ତ୍ରୀ ସମ୍ମିଳନୀରେ ଯୋଗଦେଇଥିଲେ। ରାଜନାଥ ଏଲ୍ଏସି ଉତ୍ତେଜନା ପ୍ରସଙ୍ଗରେ ନିଜ ପକ୍ଷ ରଖିଥିଲେ। ଏବେ ଜୟଶଙ୍କର ମଧ୍ୟ ଚାଇନା ପ୍ରତିପକ୍ଷ ଓ୍ବାଙ୍ଗ୍ ଓ୍ବିଙ୍କ ସହିତ ଆଲୋଚନା କରିବାର ସମ୍ଭାବନା ରହିଛି। ସୂଚନାଯୋଗ୍ୟ, ରାଜନାଥଙ୍କ ରୁଷ୍ ଗସ୍ତ କାର୍ଯ୍ୟକ୍ରମ ପୂର୍ବ ନିର୍ଦ୍ଧାରିତ ଥିଲା। ତେବେ ସେ ହଠାତ୍ ଇରାନ୍ ଗସ୍ତ କରି ପ୍ରତିପକ୍ଷ ବ୍ରିଗେଡ଼ିୟର ଜେନେରାଲ ଆମିର ହାତାମିଙ୍କ ସହିତ ସାକ୍ଷାତ୍ କରିଥିଲେ। ଚାଇନା ଇରାନ୍ ମଧ୍ୟରେ ସମ୍ପର୍କ ବଢୁଥିବାରୁ ହୁଏତ ରାଜନାଥ ଏପରି କରିଥିବା ନେଇ ଚର୍ଚ୍ଚା ହୋଇଥିଲା।