ସଇଁତଳା, ୨୦ା୧୨ (ଡି.ଏନ.ଏ.): ବଲାଙ୍ଗୀର ଜିଲା ସଇଁତଳା ଜେଏମ୍ଏଫସି କୋର୍ଟରେ ସୋମବାର ଜଣେ ଅଭିଯୁକ୍ତଙ୍କୁ ପୋଲିସ ହାଜର କରିବା ସମୟରେ ତୁମଳକାଣ୍ଡ ଘଟିଛି। ଜିଲା ଯୁବ କନ୍ଧ ସମାଜର କେତେଜଣ କର୍ମକର୍ତ୍ତା ସ୍ଥାନୀୟ କୋର୍ଟ ସମ୍ମୁଖରେ ପାରମ୍ପରିକ ଅସ୍ତ୍ରଶସ୍ତ୍ର ଧରି ନାରାବାଜି କରିଥିଲେ। ଏଥିଯୋଗୁ ଉପସ୍ଥିତ ବିଚାରପତି, ଓକିଲ ଓ କୋର୍ଟ କର୍ମଚାରୀ ଦୀର୍ଘ ସମୟ ଧରି କୋର୍ଟ ଭିତରେ କବାଟ ବନ୍ଦ କରି ରହିଥିବା ଦେଖିବାକୁ ମିଳିଥିଲା। ଖବର ପାଇ ଏସ୍ପି ନୀତିନ କୁଶଲକର ଟିଟିଲାଗଡ଼ ଏସ୍ଡ଼ିପିଓ ଅଙ୍କିତା କୁମ୍ଭାର, ସଇଁତଳା ଥାନାଧିକାରୀ ଅବନୀ କୁମାର ସାହୁ, ଟିିଟିଲାଗଡ଼ ଥାନାଧିକାରୀ ରଞ୍ଜନ ବରିହାଙ୍କ ସହ ଘଟଣାସ୍ଥଳରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣାଧୀନ କରିଥିଲେ। ବିଶୃଙ୍ଖଳିତ ଆଚରଣ ପାଇଁ ପୋଲିସ ଧନେଶ୍ୱର ମାଝି, ଲାଲୁ ମାଝିଙ୍କ ସମେତ ୧୩ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ହେବାରୁ ସମସ୍ତଙ୍କୁ ଟିଟିଲାଗଡ଼ ଜେଲକୁ ପଠାଇ ଦିଆଯାଇଛି। ଏସପି କୁଶଲକରଙ୍କୁ ଏନେଇ ପଚାରିବାରୁ ଅଭିଯୁକ୍ତମାନଙ୍କ ନାମରେ ପୂର୍ବରୁ ମାମଲା ରହିଛି ବୋଲି କହିଛନ୍ତି। ଓକିଲ ସଂଘ ସଭାପତି ହିଜକ୍ଷ ତାଣ୍ଡି, ବରିଷ୍ଠ ଆଇନଜୀବୀ ରାଧେଶ୍ୟାମ ସାହୁ, ଦେବରାଜ ପଣ୍ଡା, ସୁବୋଧ ମିଶ୍ର, ଜପେଶ୍ୱର ଜାନୀ, ସତ୍ୟନାରାୟଣ ସାହୁ, ପ୍ରଶାନ୍ତ ପୁଟେଲ, ଫିରୋଜ ବଗର୍ତ୍ତି ପ୍ରମୁଖ କୋର୍ଟ ପରିସରରେ ଏଭଳି ଘଟଣାର ତୀବ୍ର ନିନ୍ଦା କରିଛନ୍ତି।
ପୋଲିସ ସୂଚନା ଅନୁସାରେ ସଇଁତଳା ବ୍ଲକ ଡୁଙ୍ଗୁରିପାଲି ପଞ୍ଚାୟତ ଅଞ୍ଚଳରେ ଆଦିତ୍ୟ ବିର୍ଲା କମ୍ପାନୀ ତରଫରୁ ନିର୍ମାଣାଧୀନ ସୌର ପ୍ରକଳ୍ପକୁ ଦୀର୍ଘଦିନରୁ ଜିଲା ଯୁବ ଆଦିବାସୀ କର୍ମକର୍ତ୍ତାମାନେ ବିରୋଧ କରି ଆସୁଛନ୍ତି। ରବିବାର ଅପରାହ୍ନରେ ସଂଘ ତରଫରୁ ପ୍ରଦର୍ଶନ ଜାରି ରହିଥିବାବେଳେ ଖୁସୀରାମ ଜାନୀ ପାରମ୍ପରିକ ଅସ୍ତ୍ରଶସ୍ତ୍ର ଧରି ଉପସ୍ଥିତ ପୋଲିସ ଅଧିକାରୀଙ୍କ ପ୍ରତି ବିଶୃଙ୍ଖଳିତ ଆଚରଣ ପ୍ରଦର୍ଶନ କରିବା ଅଭିଯୋଗରେ ଗିରଫ ହୋଇଥିଲେ। ସୋମବାର ପୂର୍ବାହ୍ନରେ ଜାନୀଙ୍କୁ ସଇଁତଳା ସିଭିଲ କୋର୍ଟ ପରିସରରେ ଥିବା ଜେଏମ୍ଏଫସି ଅଦାଲତରେ ହାଜର କରାଯାଇଥିଲା। ଏହି ସମୟରେ ସଂଘର ଧନେଶ୍ୱର ମାଝି, ଲାଲୁ ମାଝିଙ୍କ ସମେତ ଶତାଧିକ ମହିଳା ଓ ପୁରୁଷ ଅସ୍ତ୍ରଶସ୍ତ୍ର ଧରି କୋର୍ଟ ପରିସରକୁ ପଶି ଯାଇଥିଲେ। ଓକିଲ, ମହକିଲ, ଖବରଦାତା ତଥା କୋର୍ଟ କର୍ମଚାରୀମାନଙ୍କୁ ସେମାନେ ଦୁର୍ବ୍ୟବହାର ପ୍ରଦର୍ଶନ କରିଥିବା ଅଭିଯୋଗ ହୋଇଛି। ସେହି ସମୟରେ କୋର୍ଟରୁମ୍ରେ ବିଚାରପତି ସାକ୍ଷ୍ୟ ଗ୍ରହଣ କରୁଥିଲେ। ପାଟିତୁଣ୍ଡ ଶୁଣି ଉପସ୍ଥିତ ଓକିଲମାନଙ୍କ ସହିତ କଥା ହୋଇ ଜେଏମଏଫସିି ଜିଲାଜଜ ଏବଂ ଏସ୍ପିଙ୍କୁ ଫୋନ ଯୋଗେ ଘଟଣା ବିଷୟରେ ଜଣାଇଥିଲେ।
