ବଇଣ୍ଡା,୫।୫(ଡି.ଏନ.ଏ.): ଅନୁଗୋଳ ଜିଲା ଆଠମଲ୍ଲିକ ବ୍ଲକ ପେଡ଼ିପଥର ପଞ୍ଚାୟତ ପଟ୍ଟାପଥର ଗ୍ରାମରେ ବୁଧବାର ପାୱାରଗ୍ରୀଡ ପକ୍ଷରୁ ପୋଲିସ ମୁତୟନ କରାଯାଇ ୨ହଜାର ଶାଗୁଆନ, ମହୁଲ, ଚାକୁଣ୍ଡା, ପଣସ, ଆମ୍ବ ଭଳି ମୂଲ୍ୟବାନ ଗଛ କାଟି ଦିଆଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏହାକୁ ନେଇ ଗ୍ରାମରେ ଉତ୍ତେଜନା ପ୍ରକାଶ ପାଇଛି। ଆବଶ୍ୟକ କ୍ଷତିପୂରଣ ଦିଆ ନ ଗଲେ ଆନ୍ଦୋଳନ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
ପ୍ରକାଶ ଯେ, ୨୦୧୪ ମସିହାରେ ପାୱାରଗ୍ରୀଡ ପକ୍ଷରୁ ଟାଓ୍ବାର ନିର୍ମାଣ କରାଯାଇ ଫୁଲପଡାରୁ ୭୬୫ କେଭି ବିଦ୍ୟୁତ୍ ତାର ଝାରସୁଗୁଡା ଅଭିମୁଖେ ଟଣାଯାଇଥିଲା। ପଟ୍ଟାପଥର ଅଞ୍ଚଳ ଦେଇ ଏହି ବିଦ୍ୟୁତ୍ ତାର ଯାଇଥିବାବେଳେ ସେତେବେଳେ ରବି ଫସଲ ପାଇଁ ୧ ଡିସିମିଲକୁ ମାତ୍ର ୧ହଜାର ଟଙ୍କା ଲେଖାଏ କ୍ଷତିପୂରଣ ଦିଆଯାଇଥିଲା। ତେବେ ବେସରକାରୀ ଜମିରେ ଲାଗିଥିବା ଶାଗୁଆନ, ଆମ୍ବ, ମହୁଲ, ପଣସ ଆଦି ଗଛ ଗୁଡିକର କ୍ଷତିପୂରଣ ଦେଇ ନ ଥିବାରୁ ଗଛ କାଟି ପାରି ନ ଥିଲା। କିନ୍ତୁ ବୁଧବାର ଫୁଲପଡା ପାୱାରଗ୍ରୀଡ ପକ୍ଷରୁ ପୋଲିସ ମୁତୟନ କରାଯାଇ ଗଛ କଟାଯାଇଛି। କ୍ଷତିପୂରଣ ନ ଦେଇ ଗଛ କଟାଯାଉଥିବାରୁ ଏହାକୁ ଅଞ୍ଚଳବାସୀ ବିରୋଧ କରିଥିଲେ। ହେଲେ ଗିରଫଦାରି ଭୟ ଦେଖାଇ ବେଆଇନ ଭାବେ ଗଛ କଟାଯାଇଥିବା ପଟ୍ଟାପଥର ଗ୍ରାମବାସୀ ଅନୁଗୋଳ ଜିଲାପାଳ, ପାୱାର ଗ୍ରୀଡ ଜେନରାଲ ମ୍ୟାନେଜରଙ୍କୁ ଦାବିପତ୍ରରେ ଅବଗତ କରାଇଛନ୍ତି। କ୍ଷତିପୂରଣ ଯୋଗାଇ ଦିଆ ନ ଗଲେ ଆନ୍ଦୋଳନ କରାଯିବ ବୋଲି ସରପଞ୍ଚ ଭରତଚନ୍ଦ୍ର ସାହୁ, କ୍ଷତିଗ୍ରସ୍ତ ସୁଜନ ସାହୁ, ବସନ୍ତ ବେହେରା, ରସାନନ୍ଦ ସାହୁ, ଗୋକୁଳାଚନ୍ଦ୍ର ପ୍ରଧାନ, ବିପିନି ବିହାରୀ ସାହୁ, ତ୍ରିପୁର ସାହୁ, ଘନଶ୍ୟାମ ସାହୁ, ଭାଗୀରଥି ସାହୁ, ଭିକାରୀ ଖିଲାର, ଭକ୍ତ ବାରିକ ପ୍ରମୁଖ ଚେତାବନୀ ଦେଇଛନ୍ତି। ଆଠମଲ୍ଲିକ ଏସ୍ଡିପିଓ ଚିନ୍ତାମଣି ପ୍ରଧାନ, ଆଠମଲ୍ଲିକ ଅତିରିକ୍ତ ତହସିଲଦାର ଅଶୋକ ଦେହୁରୀ, ଠାକୁରଗଡ଼ ଆଇଆଇସି ପୀତାମ୍ବର ମଲିକଙ୍କ ସହ ୨ ଫ୍ଲାଟୁନ ଫୋର୍ସ ଉପସ୍ଥିତ ଥିଲେ। ଏ ନେଇ ପାୱାର ଗ୍ରୀଡ ଡିଜିଏମ୍ ଏ. ପାଢୀଙ୍କୁ ପଚାରିବାକୁ କୌଣସି ଉତ୍ତର ନ ଦେଇ ପ୍ରସଙ୍ଗକୁ ଏଡାଇ ଦେଇଥିଲେ।
