ପୁରୀ ଅଫିସ, ୧୯।୧୧: ହାଜତ ମତ୍ୟୁକୁ ନେଇ ପୁରୀରେ ଗୁରୁବାର ଉତ୍ତେଜନା ଦେଖାଦେଇଛି। ପୋଲିସ ମାଡ଼ରେ କେ. ରମେଶଙ୍କ ମୃତ୍ୟୁ ହୋଇଥିବା ସମ୍ପର୍କୀୟ ଅଭିଯୋଗ କରିବା ପରେ ଏହାକୁ ବିଭିନ୍ନ ବର୍ଗର ଲୋକେ ତୀବ୍ର ବିରୋଧ କରିଛନ୍ତି। ଅନ୍ୟପକ୍ଷରେ ଏହି ଅଭିଯୋଗକୁ ନେଇ ଆୟୋଜିତ ଖବରଦାତା ସମ୍ମିଳନୀରେ ଏସପି ଅଖିଳେଶ୍ବର ସିଂ କହିଛନ୍ତି ଏନ୍ଏଚ୍ଆର୍ସି ଗାଇଡ଼ଲାଇନ ଅନୁଯାୟୀ ଘଟଣାର ତଦନ୍ତ ହେବ। ଟିମ ଅଫ ଡାକ୍ତରଙ୍କ ଦ୍ୱାରା ଶବ ବ୍ୟବଚ୍ଛେଦ, ଫଟୋଗ୍ରାଫି ଓ ଭିଡିଓଗ୍ରାଫି ହେବ। ହାଜତ ମୃତ୍ୟୁ ନେଇ ଥାନାରେ ମାମଲା ରୁଜୁ ହୋଇଛି।
ଏସପିଙ୍କ ସୂଚନା ଅନୁଯାୟୀ କେ.ରମେଶ ନାଁରେ ଏକାଧିକ ଥାନାରେ ମାମଲା ରହିଛି। ନିକଟରେ ତାଳଚେର ଜେଲରୁ ଜାମିନରେ ଆସିବା ପରେ ବୁଧବାର ମାରଣାସ୍ତ୍ର ଧରି ଅପରାଧ ଘଟାଇବା ପାଇଁ ଉଦ୍ୟମ କରିଥିଲେ। ଖବର ପାଇ ପୋଲିସ ଟିମ ପହଂଚିବା ପରେ ତାଙ୍କ ସହ ଧସ୍ତାଧସ୍ତି ହୋଇଥିଲା। ପରେ ତାଙ୍କୁ ଥାନା ହାଜତକୁ ନିଆଯାଇଥିଲା। ଯନ୍ତ୍ରଣା ଅନୁଭବ କରିବାରୁ ତାକୁ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଯାଇଥିଲେ ହେଁ ଡାକ୍ତର ତାକୁ ମୃତ ଘୋଷଣା କରିଥିଲେ। ମୃତ କେ.ରମେଶର ହାତ,କାନ ଓ ଶରୀରରେ ଗଭୀର ମାଡ଼ ଦାଗ ଥିବାରୁ ଶେଷରେ ପୋଲିସ ବାଧ୍ୟ ହୋଇ ହାଜତ ମୃତ୍ୟୁ ମାମଲା ରୁଜୁ କରିଛି। ଜଣେ ଅତିରିକ୍ତ ଏସ୍ପି ଓ ଡିଏସ୍ପିଙ୍କ ଦ୍ୱାରା ଘଟଣାର ତଦନ୍ତ ହେବ। ଏହାକୁ ଏକ ସମ୍ବେଦନଶୀଳ ମାମଲା ଭାବେ ପୋଲିସ ଗ୍ରହଣ କରିଛି। ମୃତକଙ୍କ ବାପାଙ୍କ ଉପସ୍ଥିତିରେ ଶବର ପଂଚନମା କରାଯାଇଛି। ଅନ୍ୟପଟରେ ପୁରୀ ଜିଲ୍ଲା ଓକିଲ ସଂଘ ଏବଂ ଭାଜପା ପକ୍ଷରୁ ଘଟଣାର ତୀବ୍ର ନିନ୍ଦା କରାଯିବା ସହ ବିକ୍ଷୋଭ ପ୍ରଦର୍ଶନ କରାଯାଇଛି।