ଓ୍ବାଶିଂଟନ,୧୭।୪ : ଉତ୍ତର କୋରିଆ ଆଣବିକ ଅସ୍ତ୍ରଶସ୍ତ୍ର ପରୀକ୍ଷା କରିବା ସହିତ ଉତ୍ତେଜନାମୂଳକ ପରିସ୍ଥିତି ସୃଷ୍ଟି କରୁଛି। ଏଭଳି ପରିସ୍ଥିତିରେ ଦକ୍ଷିଣ କୋରିଆ, ଆମେରିକା ଏବଂ ଜାପାନ ଉତ୍ତର କୋରିଆକୁ ଜବାବ ଦେବା ପାଇଁ ଅନ୍ତର୍ଜାତୀୟ ସାମୁଦ୍ରିକ ସୀମାରେ କ୍ଷେପଣାସ୍ତ୍ର ପ୍ରତିରକ୍ଷା ସମରାଭ୍ୟାସ କରୁଛନ୍ତି। ଏହି ସମରାଭ୍ୟାସରେ କ୍ଷେପଣାସ୍ତ୍ର ଆକ୍ରମଣରୁ ଦୂରେଇ ରହିବା ଉପରେ ଗୁରୁତ୍ୱାରୋପ କରାଯାଉଛି।
ନିକଟରେ ଆମେରିକା, ଜାପାନ ଏବଂ ଦକ୍ଷିଣ କୋରିଆ ମିଳିତ ବିବୃତ୍ତି ଜାରି କରି କହିଥିଲେ ଯେ ଉତ୍ତର କୋରିଆର ଆଣବିକ ତଥା କ୍ଷେପଣାସ୍ତ୍ର ଆକ୍ରମଣର ବିପଦକୁ ରୋକିବା ଓ ଏହାର ମୁକାବିଲା ପାଇଁ ସେମାନେ କ୍ଷେପଣାସ୍ତ୍ର ପ୍ରତିରକ୍ଷା ଏବଂ ବୁଡ଼ାଜାହାଜ ବିରୋଧୀ ସମରାଭ୍ୟାସକୁ ନିୟମିତ କରିବାକୁ ଚିନ୍ତା କରୁଛନ୍ତି। ଆମେରିକା, ଜାପାନ ଏବଂ ଦକ୍ଷିଣ କୋରିଆର ପ୍ରତିନିଧୀଙ୍କ ମଧ୍ୟରେ ୧୩ ତମ ପ୍ରତିରକ୍ଷା ତ୍ରିପାକ୍ଷିକ ସଂଳାପ ଆମେରିକାର ୱାଶିଂଟନ ଡିସିରେ କୋରିଆ ଉପଦ୍ୱୀପ ତଥା ବ୍ୟାପକ ଅଞ୍ଚଳର ସୁରକ୍ଷା ପରିବେଶ ଉପରେ ସମୀକ୍ଷା ଏବଂ ଆଦାନ ପ୍ରଦାନ ତଥା ତ୍ରିପାକ୍ଷିକ ସୁରକ୍ଷାକୁ ଦୃଢ଼ କରିବା ପାଇଁ ଅନୁଷ୍ଠିତ ହୋଇଥିଲା। ଏଥିରେ ବିଭିନ୍ନ ପଦ୍ଧତି ବିଷୟରେ ମଧ୍ୟ ଆଲୋଚନା କରାଯାଇଥିଲା ।
ଉତ୍ତର କୋରିଆର ଏହି ଉତ୍ତେଜନାମୂଳକ କାର୍ଯ୍ୟ ପାଇଁ ଜାପାନ ଏବଂ ଦକ୍ଷିଣ କୋରିଆ ଅସନ୍ତୁଷ୍ଟ ହୋଇଛନ୍ତି। ଉତ୍ତର କୋରିଆର ବାଲିଷ୍ଟିକ କ୍ଷେପଣାସ୍ତ୍ର ପରୀକ୍ଷଣ ବିରୋଧରେ ଜାପାନ ଜାତୀୟ ସୁରକ୍ଷା ପରିଷଦର ଏକ ବୈଠକ ଡକାଇବାକୁ ଯୋଜନା କରୁଛି। ଏହା ପ୍ରଥମ ଥର ନୁହେଁ ଯେ ଦକ୍ଷିଣ କୋରିଆ, ଜାପାନ ଏବଂ ଆମେରିକା ମିଳିତ ସମରାଭ୍ୟାସ କରୁଛନ୍ତି। କିନ୍ତୁ ଅତୀତରେ ମଧ୍ୟ ଏହି ତିନି ଦେଶ ସମୟ ସମୟରେ ସମରାଭ୍ୟାସ କରି ନିଜର ସୁରକ୍ଷା ପ୍ରସ୍ତୁତିକୁ ମଜବୁତ କରିଥାନ୍ତି।