ତେନ୍ତୁଳିଖୁଣ୍ଟ,୨୭ା୫(ଡି.ଏନ୍.ଏ.): ନବରଙ୍ଗପୁର ଜିଲାର ତେନ୍ତୁଳିଖୁଣ୍ଟି, ପାପଡ଼ାହାଣ୍ଡି ଓ କୋଷାଗୁମୁଡ଼ା ବ୍ୟତୀତ ଅନ୍ୟ ୭ ବ୍ଲକରେ ଯୁକ୍ତ ୩ ମହାବିଦ୍ୟାଳୟ (ସରକାରୀ, ଅନୁଦାନପ୍ରାପ୍ତ ନ ହେଲେ ଘରୋଇ) ରହିଛି। ପାପଡ଼ାହାଣ୍ଡି ଓ କୋଷାଗୁମୁଡ଼ା ବ୍ଲକରେ ଯୁକ୍ତ ୩ ପାଇଁ ମୁଖ୍ୟମନ୍ତ୍ରୀଙ୍କ ସବୁଜ ସଙ୍କେତ ମିଳିଥିବା ଜିଲା ଯୋଜନା ବୋର୍ଡ ଅଧ୍ୟକ୍ଷ ମନୋହର ରନ୍ଧାରୀ ତଥା ଡାବୁଗାଁ ବିଧାୟକ କହିଛନ୍ତି। ତେନ୍ତୁଳିଖୁଣ୍ଟି ବ୍ଲକରେ ଉଚ୍ଚ ଶିକ୍ଷା ପାଇଁ ଯୁକ୍ତ୨ ମାଧ୍ୟମିକ ବିଦ୍ୟାଳୟ ବ୍ୟତୀତ କିଛି ନାହିଁ। ଯୁକ୍ତ ୩ ପଢ଼ିବାକୁ ହେଲେ ୪୦ କି.ମି. ଦୂର ନବରଙ୍ଗପୁର ବିନୋଦ ବିହାରୀ ମହାବିଦ୍ୟାଳୟ, ନବରଙ୍ଗପୁର ଡିଗ୍ରୀ କଲେଜ ଅବା ମହିଳା ମହାବିଦ୍ୟାଳୟରେ ନାମ ଲେଖାଇବାକୁ ପିଲାମାନେ ବାଧ୍ୟ। ଗରିବ ଶ୍ରେଣୀର ଛାତ୍ରୀଛାତ୍ର ଯୁକ୍ତ ୨ ପରେ ଦୂରରେ ଯାଇ ପଢିବାକୁ ସକ୍ଷମ ହେଉ ନ ଥିବାରୁ ବାଧ୍ୟହୋଇ ତାଙ୍କ ପାଠପଢ଼ାରେ ଡୋରି ବନ୍ଧାହେଉଛି। ଆଇଟିଆଇ କଲେଜଟିଏ ମଧ୍ୟ ଏଠାରେ ନାହିଁ। କୌଶଳ ବୃଦ୍ଧି ତାଲିମ କେନ୍ଦ୍ର ପାଇଁ ତତ୍କାଳୀନ ଜିଲାପାଳ ଶିବବ୍ରତ ଦାସ ପୁରୁଣା ନବୋଦୟ କୋଠାର ଶୁଭ ଦେଇଥିଲେ। ତାହା ଇନ୍ଦ୍ରାବତୀ କେନାଲ ତଳମୁଣ୍ଡକୁ ଜଳ ସଚନ ସୁବିଧା ଯୋଗାଇବା ଭଳି ଫଳକରେ ହିଁ ରହିଗଲା।
ତେନ୍ତୁଳିଖୁଣ୍ଟି ବ୍ଲକରେ ୨୦ଟି ଉଚ୍ଚ ବିଦ୍ୟାଳୟ ଥିବାବେଳେ କେବଳ ଗୋଟିଏ ଇନ୍ଦ୍ରାବତୀ ଉଚ୍ଚ ମାଧ୍ୟମିକ ବିଦ୍ୟାଳୟ ରହିଛି। ଏଠି କଳାରେ ୨୫୬ ଓ ବିଜ୍ଞାନରେ ୧୨୮ ସିଟ ଅଛି। ବ୍ଲକରେ ଗୋଟିଏ ଘରୋଇ ଅରବିନ୍ଦ ଉଚ୍ଚ ମାଧ୍ୟମିକ ବିଦ୍ୟାଳୟରେ ଯୁକ୍ତ ୨ ବିଜ୍ଞାନ ୬୪ ସିଟ ରହିଛି। ଜିଲା ସାକ୍ଷରତା ହାର ତେନ୍ତୁଳିଖୁଣ୍ଟି ବ୍ଲକରେ ସର୍ବାଧିକ। ତଥାପି ଏଠାରେ ଯୁକ୍ତ ୩ ଓ ବୈଷୟିକ ଶିକ୍ଷାନୁଷ୍ଠାନ ପାଇଁ ଉଦ୍ୟମ ନ ହେବା ଉଦ୍ବେଗଜନକ। ପଡୋଶୀ କଳାହାଣ୍ଡି ଜିଲାର ଥୁଆମୂଳ ରାମପୁର ବ୍ଲକରେ ଯୁକ୍ତ ୩ ମହାବିଦ୍ୟାଳୟ ପାଇଁ ମଧ୍ୟ ସବୁଜ ସଙ୍କେତ ମିଳିଛି। ତେନ୍ତୁଳିଖୁଣ୍ଟି ବ୍ଲକରେ ଅଧିକାଂଶ ଛାତ୍ରୀଛାତ୍ର ତଫସିଲଭୁକ୍ତ ଜାତି ଓ ଜନଜାତି ବର୍ଗର। ରାଜ୍ୟରେ ଯୁକ୍ତ ୩ କଲେଜ ନ ଥିବା ହାତଗଣତି ବ୍ଲକ ମଧ୍ୟରେ ତେନ୍ତୁଳିଖୁଣ୍ଟି ଅନ୍ୟତମ ବୋଲି ଉଚ୍ଚ ଶିକ୍ଷାମନ୍ତ୍ରୀ ବିଧାନସଭାରେ କହିବା ପରେ ବ୍ଲକ ବାସୀଙ୍କୁ ବେଶ୍ ଆଘାତ ଲାଗିଛି। ସ୍ଥାନୀୟ ଜନ ପ୍ରତିନିଧିଙ୍କ ଦୁର୍ବଳତା ନେଇ ଚର୍ଚ୍ଚା ହେଉଛି। ଏହା ମଧ୍ୟରେ ବର୍ତ୍ତମାନ କୋଷାଗୁମୁଡ଼ା ଓ ପାପଡାହାଣ୍ଡି ବ୍ଲକ ପାଇଁ ସବୁଜ ସଙ୍କେତ ମିଳିଛି। ଏହା କାହା ଅପାରଗତା ବୋଲି ବୁଦ୍ଧିଜୀବୀ ପ୍ରଶ୍ନ କରିଛନ୍ତି। ଏ ନେଇ ବିଧାୟକ ସଦାଶିବ ପ୍ରଧାନୀଙ୍କୁ ପଚାରିବାରୁ କହିଲେ, ତେନ୍ତୁଳିଖୁଣ୍ଟି ବ୍ଲକରେ ଆଗାମୀ ଦିନରେ ଯୁକ୍ତ ୩ ମହାବିଦ୍ୟାଳୟ ଖୋଲିବ। କିନ୍ତୁ ଚଳିତ ଶିକ୍ଷା ବର୍ଷରେ କି ଆସନ୍ତା ଶିକ୍ଷା ବର୍ଷରେ ସେ ତାହା ସ୍ପଷ୍ଟ କଲେନାହିଁ। ସୂଚନା ଥାଉକି ବର୍ତ୍ତମାନ ଯେଉଁ ବ୍ଲକରେ ଯୁକ୍ତ ୩ କଲେଜ ନାହିଁ ସେଠାରେ ନୂତନ କଲେଜ ଖୋଲିବା ନେଇ କୌଣସି ଯୋଜନା ନ ଥିବା ବିଧାନସଭାରେ ମନ୍ତ୍ରୀ କହିଥିଲେ। କିନ୍ତୁ ଡାବୁଗାଁ ବିଧାୟକଙ୍କ ନିର୍ବାଚନୀମଣ୍ଡଳୀର ଦୁଇ ବ୍ଲକରେ ନୂତନ କଲେଜ ଖୋଲିବା ପାଇଁ ସବୁଜ ସଙ୍କେତ ମିଳିଛି। ତେନ୍ତୁଳିଖୁଣ୍ଟି ବ୍ଲକ ଏବେ ଏଥିରୁ ବଞ୍ଚତ୍ତ। ଏ ନେଇ ଜିଲା ଯୋଜନା ବୋର୍ଡ ଅଧ୍ୟକ୍ଷ ମନୋହର ରନ୍ଧାରୀଙ୍କୁ ପଚାରିବାରୁ ସେ ଏ ସମ୍ପର୍କରେ ଉଚ୍ଚଶିକ୍ଷା ବିଭାଗ ଅଧିକାରୀଙ୍କ ସହ ଆଲୋଚନା କରିବେ ବୋଲି କହିଛନ୍ତି। ଏମ୍ପି ରମେଶ ମାଝିଙ୍କୁ ଯୋଗାଯୋଗ କରିବାରୁ ଆମର ଏକ କମିଟି ଗଠନ ହୋଇଛି। ଜିଲାରେ ଉଚ୍ଚଶିକ୍ଷାର ବିକାଶ ପାଇଁ ଖୁବ୍ଶୀଘ୍ର ଭଲ ଖବର ମିଳିବ ବୋଲି ସେ କହିଛନ୍ତି।