ମୁମ୍ବାଇ,୧୪ା୫:ମୁମ୍ବାଇରେ ସୋମବାର ଅପରାହ୍ନରେ ଭୟାବହ ଧୂଳିଝଡ଼ରେ ୧୪ ଜଣଙ୍କ ମୃତ୍ୟୁ ଘଟିବା ସହ ୭୦ରୁ ଊର୍ଦ୍ଧ୍ୱ ଆହତ ହୋଇଛନ୍ତି। ଆହତମାନଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରଯାଇଛି। ଘାଟକୋପର ଅଞ୍ଚଳରେ ଏକ ପେଟ୍ରୋଲ ପମ୍ପ୍ ନିକଟରେ ଲାଗିଥିବା ୧୦୦ ଫୁଟ୍ ଉଚ୍ଚତା ବିଶିଷ୍ଟ ଏକ ବିଲ୍ବୋର୍ଡ ଭୁଶୁଡ଼ି ପଡ଼ିବାରୁ ୧୪ ଜଣଙ୍କ ମୃତ୍ୟୁ ଘଟିବା ସହ ୫୯ ଜଣ ଆହତ ହୋଇଥିଲେ। ୬୨ ଜଣଙ୍କୁ ଉଦ୍ଧାର କରାଯାଇଥିବା ପୋଲିସ କହିଛି। ପୋଲିସ ସହ ଏନ୍ଡିଆର୍ଏଫ୍ ଟିମ୍ ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି। ବିଲ୍ବୋର୍ଡଟି ପେଟ୍ରୋଲ ପମ୍ପର ମଧ୍ୟଭାଗରେ ଖସିପଡ଼ିବାରୁ ବହୁ ଲୋକ ଏହା ତଳେ ଚାପିହୋଇ ଯାଇଥିଲେ। ବିଲ୍ବୋର୍ଡର ଧାତବ ଫ୍ରେମ୍ ସେଠାରେ ଥିବା କେତେକ କାର୍ର ଛାତକୁ କ୍ଷତିଗ୍ରସ୍ତ କରିଛି। ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଘଟଣାସ୍ଥଳ ପରିଦର୍ଶନ କରିଛନ୍ତି। ଘଟଣାର ତଦନ୍ତ ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଥିବା ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ କହିଛନ୍ତି। ବିଲ୍ବୋର୍ଡ ଲଗାଇଥିବା ଇଗୋ ମିଡିଆର ମାଲିକ ଭବେଶ ଭିଣ୍ଡେ ଓ ଅନ୍ୟମାନଙ୍କ ବିରୋଧରେ ମୁମ୍ବାଇ ପୋଲିସ ମାମଲା ରୁଜୁ କରିଛି। ବେଆଇନ ଭାବେ ଓ ବିନା ଅନୁମତିରେ ଉକ୍ତ ବିଲ୍ବୋର୍ଡ ଲଗାଯାଇଥିଲା ବୋଲି ପ୍ରଶାସନ କହିଛି। ଘଟଣାସ୍ଥଳରେ ଲାଗିଥିବା ଅନ୍ୟ ୩ଟି ବିଲ୍ବୋର୍ଡ ତୁରନ୍ତ ହଟାଇବା ପାଇଁ ବ୍ରିହନମୁମ୍ବାଇ ମ୍ୟୁନିସିପାଲ କର୍ପୋରେଶନ (ବିଏମ୍ସି) ବିଜ୍ଞାପନ ସଂସ୍ଥାକୁ ନୋଟିସ୍ ଜାରି କରିଛି।
ସେହିପରି ଓ୍ବାଡଲା ଅଞ୍ଚଳରେ ଧୂଳିଝଡ଼ ବେଳେ ଏକ ନିର୍ମାଣାଧୀନ ମେଟାଲ ପାର୍କିଂ ଟାଓ୍ବାର ଭୁଶୁଡ଼ି ପଡ଼ିବାରୁ ୩ ଜଣ ଆହତ ହେବା ସହ କେତେକ ଗାଡ଼ି କ୍ଷତିଗ୍ରସ୍ତ ହୋଇଛି। ବାନ୍ଦ୍ରାରେ ଗଛ ଡାଳ ପଡ଼ି ଜଣେ ପ୍ରାଣ ହରାଇବା ସହ ଅନ୍ୟ ଜଣେ ଗୁରୁତର ହୋଇଛନ୍ତି। ଧୂଳିଝଡ଼ ଯୋଗୁ ପରିବହନ ବାଧାପ୍ରାପ୍ତ ହେବା ସହ ବିମାନ ଚଳାଚଳ ସ୍ଥଗିତ ରହିଛି। ୧୫ ବିମାନକୁ ଅନ୍ୟ ଏୟାରପୋର୍ଟକୁ ପଠାଯାଇଥିଲା। ଝଡ଼ରେ ଅନେକ ଗଛ ଓ ବିଦ୍ୟୁତ୍ ଖୁଣ୍ଟ ଉପୁଡ଼ି ପଡ଼ିବାରୁ ବିଭିନ୍ନ ଅଞ୍ଚଳ ଅନ୍ଧାରରେ ରହିଛି। ଧୂଳିଝଡ଼ ଯୋଗୁ ଆକାଶ ଅନ୍ଧକାର ହୋଇଯାଇଥିଲା। ଫଳରେ ଲୋକାଲ ଟ୍ରେନ୍ ସମେତ ମେଟ୍ରୋ ନେଟ୍ଓ୍ବର୍କ ଏବଂ ଏୟାରପୋର୍ଟ ସେବା ସାମୟିକ ବନ୍ଦ କରିଦିଆଯାଇଥିଲା। ଅଧିକ ଦୂର ପର୍ଯ୍ୟନ୍ତ ଦୃଶ୍ୟ ନ ହେବାରୁ ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନ ବନ୍ଦରରେ ବିମାନ ଚଳାଚଳ ୬୬ ମିନିଟ ବନ୍ଦ ରହିଥିଲା। ଅଦିନିଆ ବର୍ଷା ଯୋଗୁ ଗରମରୁ ମୁକ୍ତି ମିଳିଥିବାବେଳେ ବିଜୁଳି ସରବରାହ ବନ୍ଦ ହୋଇଯାଇଥିବାରୁ ଲୋକେ ଅସୁବିଧାର ସମ୍ମୁଖୀନ ହୋଇଛନ୍ତି।