ଭୁବନେଶ୍ୱର,୧୬।୧୨(ବ୍ୟୁରୋ): ଓଡ଼ିଶା ଆକାଶରେ ଗୁରୁବାର ସନ୍ଧ୍ୟାରେ ରହସ୍ୟମୟ ଆଲୋକ ଦେଖିବାକୁ ମିଳିଥିଲା। ଭଦ୍ରକ, ବାଲେଶ୍ୱର, ପାରାଦୀପ ଏବଂ ପୁରୀ ଭଳି କେତେକ ସ୍ଥାନରେ ହଠାତ୍ ଆକାଶରୁ ଟର୍ଚ୍ଚ ମାରିବା ଭଳି ଆଲୋକ ଦେଖାଯାଇଥିଲା, ଯାହାକୁ ନେଇ ସାଧାରଣରେ ଆତଙ୍କ ପ୍ରକାଶ ପାଇଛି। ଏହି ଆଲୋକ କେଉଁଠାରୁ ଆସିଲା ତାହା ଠିକ୍ ଭାବେ ଜଣାପଡ଼ିନାହିଁ। ତେବେ ଏ ସମ୍ପର୍କରେ ପଠାଣି ସାମନ୍ତ ପ୍ଲାନେଟାରିୟମ ଉପନିର୍ଦ୍ଦେଶକ ଶୁଭେନ୍ଦୁ ପଟ୍ଟନାୟକ କହିଛନ୍ତି, ଏହି ଆଲୋକକୁ ନେଇ କୌଣସି ପ୍ରକାରର ଭୟଭୀତ ହେବାର କାରଣ ନାହିଁ। ମିଳିଥିବା ସୂଚନା ଅନୁଯାୟୀ, ଆଲୋକ ଦେଖାଯାଇଥିବା ସମୟରେ ଚାନ୍ଦିପୁରରେ ଅଗ୍ନି-୫ କ୍ଷେପଣାସ୍ତ୍ର ପରୀକ୍ଷଣ ହୋଇଥିଲା। ତେଣୁ ଏହି ଆଲୋକ ଅଗ୍ନ-୫ର ବୋଲି ଅନୁମାନ କରାଯାଉଛି। ପରୀକ୍ଷଣ ସମୟରେ ଆଲୋକ ଉପରକୁ ଉଠିବା ସହ ଟର୍ଚ୍ଚ ମାରିବା ଭଳି ଦୃଶ୍ୟମାନ ହୋଇଥିଲା। ସନ୍ଧ୍ୟା ସମୟରେ ହୋଇଥିବାରୁ ଅଧିକାଂଶ ସ୍ଥାନରେ ଏହା ଦେଖାଯାଇଥିଲା ବୋଲି ପଟ୍ଟନାୟକ କହିଛନ୍ତି।