ନୂଆଦିଲ୍ଲୀ,୧୩।୧୨ : କେନ୍ଦ୍ର ସରକାର ମଙ୍ଗଳବାର କହିଛନ୍ତି ଯେ ଦେଶରେ ସୋସିଆଲ ମିଡିଆ ମାଧ୍ୟମରେ ଆତଙ୍କବାଦ ବିସ୍ତାର କରିବାର ବିପଦ ବର୍ତ୍ତମାନ ବହୁତ ଅଧିକ। ଯାହା ଭାରତର ଏକତା ଏବଂ ଅଖଣ୍ଡତା ପ୍ରତି ବିପଦ ସୃଷ୍ଟି କରୁଛି। ଲୋକ ସଭାରେ ଏକ ପ୍ରଶ୍ନର ଉତ୍ତରରେ ସ୍ବରାଷ୍ଟ୍ର ମନ୍ତ୍ରଣାଳୟ କହିଛି ଯେ ସୋସିଆଲ ମିଡିଆ ଜରିଆରେ ବିଦେଶରୁ ଭାରତରେ ଆତଙ୍କବାଦୀ କାର୍ଯ୍ୟକଳାପକୁ ପ୍ରୋତ୍ସାହିତ କରାଯାଉଛି।
ସରକାରଙ୍କ ଏହି ବିବୃତ୍ତି ଏପରି ଏକ ସମୟରେ ଆସିଛି ଯେତେବେଳେ ସୋମବାର ସରକାର ପାକିସ୍ତାନ ଭିତ୍ତିକ ଓଟିଟି ପ୍ଲାଟଫର୍ମର ୱେବସାଇଟ, ଦୁଇଟି ମୋବାଇଲ ଆପ, ଚାରିଟି ସୋସିଆଲ ମିଡିଆ ଆକାଉଣ୍ଟ ଏବଂ ସ୍ମାର୍ଟ ଟିଭି ଆପ ଉପରେ ପ୍ରତିବନ୍ଧକ ଲଗାଇବାକୁ ନିର୍ଦ୍ଦେଶ ଦେଇଥିଲେ। ସରକାର କହିଛନ୍ତି ଯେ ଏହି ପ୍ଲାଟଫର୍ମ ଦ୍ୱାରା ପ୍ରଦର୍ଶିତ ଏକ ୱେବ ସିରିଜ ଭାରତର ଜାତୀୟ ସୁରକ୍ଷା ଏବଂ ଅଖଣ୍ଡତାକୁ କ୍ଷତି ପହଞ୍ଚାଇବାର ଆଶଙ୍କା ରହିଛି।
ସୂଚନା ଓ ପ୍ରସାରଣ ମନ୍ତ୍ରଣାଳୟ କହିଛି ଯେ ୱିଡଲି ଟିଭି ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣର ବାର୍ଷିକୀ ଅବସରରେ ‘ସେବକ: ଦି କନଫରେନ୍ସ’ ନାମକ ଏକ ୱେବ ସିରିଜ ପ୍ରକାଶ କରିଛି ଯାହା ଭାରତର ଜାତୀୟ ସୁରକ୍ଷା, ସାବଭୌମତ୍ୱ ଏବଂ ଅଖଣ୍ଡତା ପ୍ରତି କ୍ଷତିକାରକ ବୋଲି ଜଣାପଡିଛି। ମନ୍ତ୍ରଣାଳୟ କହିଛି ଯେ ଏହି ୱେବ ସିରିଜର ତିନୋଟି ଏପିସୋଡ ଏପର୍ଯ୍ୟନ୍ତ ରିଲିଜ ହୋଇଛି।
ମନ୍ତ୍ରଣାଳୟର ବରିଷ୍ଠ ପରାମର୍ଶଦାତା କାଞ୍ଚନ ଗୁପ୍ତା ଟୁଇଟ କରି କହିଛନ୍ତି ଯେ ସମ୍ପୂର୍ଣ୍ଣ ମିଥ୍ୟା ୱେବ ସିରିଜ ସେବକର ମୂଲ୍ୟାଙ୍କନ ପରେ ପାକିସ୍ତାନ ଭିତ୍ତିକ ୱିଡଲି ଟିଭି ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି। ୱେବ ସିରିଜରେ ଅପରେଶନ ବ୍ଲୁ ଷ୍ଟାର ଏବଂ ଏହାର ପରବର୍ତ୍ତୀ ଘଟଣା, ଅଯୋଧ୍ୟାରେ ବାବ୍ରି ମସଜିଦ ଭାଙ୍ଗିବା, ଗ୍ରାହାମ ଷ୍ଟେନସ ନାମକ ଜଣେ ଖ୍ରୀଷ୍ଟିଆନ ମିଶନାରୀଙ୍କ ହତ୍ୟା ଏବଂ ମାଲେଗାଓଁ ବିସ୍ଫୋରଣ ଭଳି ଘଟଣାଗୁଡ଼ିକର ଜାତୀୟ ବିରୋଧୀ ଚିତ୍ର ରହିଛି।