ପ୍ୟାରିସ୍,୩୦ା୧୦:୪ ବର୍ଷ ୩ ମାସ ବ୍ୟବଧାନରେ ପୁଣି ଥରେ ଆତଙ୍କରେ ଥରି ଉଠିଛି ଫ୍ରାନ୍ସର ପର୍ଯ୍ୟଟନ ନଗରୀ ନିସ୍। ସହରସ୍ଥିତ ଏକ ଚର୍ଚ୍ଚରେ ଗୁରୁବାର ଜଣେ ଆତଙ୍କବାଦୀ ୩ ଜଣଙ୍କୁ ଅତି ନିର୍ମମ ଭାବେ ହତ୍ୟା କରିଛନ୍ତି। ସେ ଛୁରାମାଡ଼ କରି ଦୁଇଜଣଙ୍କୁ ମାରିଦେବା ପରେ ଜଣେ ମହିଳାଙ୍କ ମୁଣ୍ଡ କାଟିଦେଇଛନ୍ତି। ଆକ୍ରମଣରେ ଅନେକେ ଆହତ ମଧ୍ୟ ହୋଇଛନ୍ତି। ପୋଲିସ ଆକ୍ରମଣକାରୀଙ୍କୁ ଗିରଫ କରି ପଚରାଉଚରା କରୁଛି। ନିସ୍ ମେୟର ଖ୍ରୀଷ୍ଟିଆନ ଏଷ୍ଟ୍ରୋସି ଟୁଇଟ୍ କରି କହିଛନ୍ତି, ଆକ୍ରମଣକାରୀଙ୍କୁ କାବୁ କରାଯିବା ବେଳେ ସେ ବାରମ୍ବାର ଚିତ୍କାର କରୁଥିଲେ ‘ଆଲ୍ଲାହୁ ଆକବର’। ସମ୍ପୃକ୍ତ ଅଞ୍ଚଳକୁ ସୁରକ୍ଷା ବଳ ଘେରି ରହିଥିବାବେଳେ ଆତଙ୍କବାଦ ନିରୋଧୀ ତଦନ୍ତକାରୀ ସଂସ୍ଥାଗୁଡ଼ିକ ତତ୍ପରତା ସହ ତନାଘନା ଚଳାଇଛନ୍ତି। ପ୍ରସିଦ୍ଧ ବ୍ୟଙ୍ଗ ପତ୍ରିକା ଶାର୍ଲି ଏବ୍ଦୋରେ ପ୍ରୋଫେଟ୍ ମହମ୍ମଦଙ୍କ କାର୍ଟୁନ ଓ ତୁର୍କୀ ରାଷ୍ଟ୍ରପତି ରେସେପ ତୈୟପ ଏର୍ଡୋଗାନଙ୍କ ବ୍ୟଙ୍ଗ ଚିତ୍ର ପ୍ରକାଶ ପାଇବା ପରେ ମୁସ୍ଲିମ ରାଷ୍ଟ୍ରଗୁଡ଼ିକ ମୁହଁାମୁହିଁ ଅବସ୍ଥାରେ ଥିବା ଫ୍ରାନ୍ସ ଏହି ଘାତକ ଆକ୍ରମଣକୁ ନେଇ ସ୍ତବ୍ଧ ହୋଇଯାଇଛି। ଆକ୍ରମଣ ପରେ ଫ୍ରାନ୍ସରେ ହାଇ ଆଲର୍ଟ ଜାରି କରାଯାଇଛି।
ଭୂମଧ୍ୟସାଗରୀୟ ସହର ନିସ୍ ଏହାର ବିସ୍ତୃତ ବେଳାଭୂମି ଓ ଶାନ୍ତ ପରିବେଶ ପାଇଁ ଖ୍ୟାତି ଅର୍ଜନ କରିଛି। ଏହାର ପ୍ରାକୃତିକ ଦୃଶ୍ୟରାଜି ପ୍ରତ୍ୟହ ଅଗଣିତ ପର୍ଯ୍ୟଟକଙ୍କୁ ଆକର୍ଷିତ କରିଥାଏ। କରୋନା ସଂକ୍ରମଣ ସହ ଜୁଝୁଥିବା ନିସ୍ ସହରର ମୁଖ୍ୟ ଶପିଂ ଅଞ୍ଚଳ ଜିନ୍ ମେଡିସିନ ଭେନ୍ୟୁରେ ଗୁରୁବାର ସକାଳେ ଘଟିଛି ଏକ ବଡ଼ଧରଣର ଆତଙ୍କବାଦୀ ଆକ୍ରମଣ। ନୋର୍ଟେ ଡେମ୍ ଚର୍ଚ୍ଚରେ ଶ୍ରଦ୍ଧାଳୁମାନେ ପ୍ରାର୍ଥନା ପାଇଁ ରୁଣ୍ଡ ହେଉଥିବାବେଳେ ହଠାତ୍ ଜଣେ ଆତଙ୍କବାଦୀ ଧସେଇ ପଶିଥିଲେ। ସେ ଅବିଚାରିତ ଭାବେ ଯାହାକୁ ପାଇଲେ ଛୁରାମାଡ଼ କରିଚାଲିଥିଲେ। ଛୁରାମାଡ଼ରେ ଚର୍ଚ୍ଚର ଓ୍ବାଡେନ ଓ ଅନ୍ୟ ଜଣେ ବ୍ୟକ୍ତି ପ୍ରାଣ ହରାଇଛନ୍ତି। ପରେ ସେ ଆଉ ଜଣେ ମହିଳାଙ୍କ ମୁଣ୍ଡକାଟ କରି ହତ୍ୟା କରିଛନ୍ତି। ଆତଙ୍କବାଦୀଙ୍କ ଆକ୍ରମଣରେ ଅନେକ ଲୋକ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ସୁରକ୍ଷା ବଳର ଜବାବୀ କାର୍ଯ୍ୟାନୁଷ୍ଠାନ ବେଳେ ଆକ୍ରମଣକାରୀ ମଧ୍ୟ ଆହତ ହୋଇଛନ୍ତି। ଆତଙ୍କବାଦୀଙ୍କ ଆକ୍ରମଣ ପଛର ଉଦ୍ଦେଶ୍ୟ ଜଣାପଡ଼ିନାହିଁ। ପୋଲିସ ତାଙ୍କୁ ଚିକିତ୍ସା କରାଇବା ପରେ ଜେରା କରୁଛି। ଏହି ଆକ୍ରମଣରେ ଅନ୍ୟ କେହି ସାମିଲ ନ ଥିବା ଆତଙ୍କବାଦ ନିରୋଧୀ ସ୍କ୍ବାଡ୍ ସୂଚନା ଦେଇଛି। ବର୍ତ୍ତମାନ ସୁଦ୍ଧା କୌଣସି ଆତଙ୍କବାଦୀ ସଙ୍ଗଠନ ଏଥିପାଇଁ ନିଜକୁ ଦାୟୀ କରିନାହିଁ। ସ୍ବୟଂଚାଳିତ ଅସ୍ତ୍ରଧାରୀ ପୋଲିସ ଚର୍ଚ୍ଚ ଓ ଏହାର ଆଖପାଖ ଅଞ୍ଚଳକୁ କର୍ଡନ କରିଛି।
ଘଟଣା ପରେ ପାର୍ଲାମେଣ୍ଟର ନିମ୍ନ ସଦନରେ କରୋନା ଭାଇରସ୍କୁ ନେଇ ନୂଆ କଟକଣା ସମ୍ପର୍କରେ ହେବାକୁ ଥିବା ବିତର୍କକୁ ସ୍ଥଗିତ ରଖାଯାଇଥିଲା। ସେଠାରେ ମୃତକଙ୍କ ଉଦ୍ଦେଶ୍ୟରେ ନୀରବ ପ୍ରାର୍ଥନା କରାଯାଇଥିଲା। ପ୍ରଧାନମନ୍ତ୍ରୀ ଜିନ୍ କାଷ୍ଟେକ୍ସ କହିଛନ୍ତି, ଫ୍ରାନ୍ସ ପ୍ରତି ବିପଦ ବଢ଼ିଯାଇଛି। ଏଥିପାଇଁ ସବୁ ସ୍ତରରେ ସତର୍କତା ଜରୁରୀ ହୋଇପଡ଼ିଛି। ରାଷ୍ଟ୍ରପତି ଇମାନ୍ବେଲ ମାକ୍ରଁ ଏକ ଜରୁରୀ ବୈଠକ ପରେ ଆକ୍ରମଣସ୍ଥଳ ପରିଦର୍ଶନ କରିଛନ୍ତି।
ପ୍ରକାଶଯୋଗ୍ୟ, ଅକ୍ଟୋବର ୧୬ରେ ଶାର୍ଲି ଏବ୍ଦୋ ପତ୍ରିକାରେ ପ୍ରକାଶିତ ପ୍ରୋଫେଟ୍ ମହମ୍ମଦଙ୍କ ଏକ କାର୍ଟୁନକୁ ନେଇ ବିବାଦ ସୃଷ୍ଟି ହୋଇଥିଲା। ସାମୁଏଲ ପେଟି(୪୭) ନାମକ ଜଣେ ଶିକ୍ଷକ ସ୍କୁଲରେ ଛାତ୍ରୀଛାତ୍ରଙ୍କୁ ଅଭିବ୍ୟକ୍ତିର ସ୍ବାଧୀନତା ସମ୍ପର୍କରେ ବୁଝାଇବାକୁ ଯାଇ ଉକ୍ତ କାର୍ଟୁନ ଦେଖାଇଥିଲେ। ଏହାକୁ ନେଇ ୧୮ ବର୍ଷୀୟ ଇସ୍ଲିକ୍ ଶରଣାର୍ଥୀ ଅବ୍ଦୁଲ୍ଲା ଅଂରୋଜ ତାଙ୍କ ମୁଣ୍ଡ କାଟି ଦେଇଥିଲେ। ଏହାର ଦୁଇ ସପ୍ତାହ ନ ପୂରୁଣୁ ଉକ୍ତ ପତ୍ରିକାର ପ୍ରଚ୍ଛଦ ପୃଷ୍ଟାରେ ତୁର୍କୀ ରାଷ୍ଟ୍ରପତି ଏର୍ଡୋଗାନଙ୍କୁ କଟାକ୍ଷ କରାଯାଇଥିଲା। ଏହାକୁ ନେଇ ଫ୍ରାନ୍ସ ସହିତ ମୁସଲିମ ରାଷ୍ଟ୍ରଗୁଡ଼ିକ ମୁହଁାମୁହିଁ ହୋଇଛନ୍ତି। ଏଭଳି ସମୟରେ ଆତଙ୍କବାଦୀ ଆକ୍ରମଣ ପଛର କାରଣ ଜାଣିବା ପାଇଁ ସୁରକ୍ଷା ସଂସ୍ଥାଗୁଡ଼ିକ ତତ୍ପର ହୋଇଉଠିଛନ୍ତି।
ନିସ୍ ସହରରେ ଏହା ପ୍ରଥମ ଆକ୍ରମଣ ନୁହେଁ। ପୂର୍ବରୁ ୨୦୧୬ ଜୁଲାଇ ୧୪ ରାତିରେ ବାସ୍ତିଲ ଡେ’ ପାଳନ ବେଳେ ଜଣେ ଇସ୍ଲାମିକ୍ ଷ୍ଟେଟ୍ (ଆଇଏସ୍) ଆତଙ୍କବାଦୀ ଟ୍ରକ୍ରେ ଚପାଇ ୮୬ ଜଣଙ୍କୁ ହତ୍ୟା କରିଥିଲେ। ଏହି ଅତର୍କିତ ଆକ୍ରମଣରେ ୪୫୮ ଜଣ ଆହତ ହୋଇଥିଲେ। ଶେଷରେ ୩୧ ବର୍ଷୀୟ ଆତଙ୍କବାଦୀ ଟ୍ୟୁନିସିଆ ବଂଶୋଦ୍ଭବ ମହମ୍ମଦ ଲାହ୍ବେଜ୍ ବୁହ୍ଲେଲ୍ ସୁରକ୍ଷା ବଳର ଜବାବୀ କାର୍ଯ୍ୟାନୁଷ୍ଠାନରେ ଟଳି ପଡ଼ିଥିଲେ। ସଂଯୋଗବଶତଃ ସେହିଦିନ ମଧ୍ୟ ଗୁରୁବାର ଥିଲା।