ମେଲବୋର୍ନ,୧୬।୩ : ୨୦୨୨ ମସିହାରେ ପାକିସ୍ତାନରେ ଆତଙ୍କବାଦୀ ଘଟଣାରେ ମୃତ୍ୟୁ ଘଟିିଥିବା ଲୋକଙ୍କ ସଂଖ୍ୟାରେ ଏକ ରେକର୍ଡ ବୃଦ୍ଧି ହୋଇଛି। ଏକ ରିପୋର୍ଟ ଅନୁଯାୟୀ, ୨୦୨୨ ମସିହାରେ ପାକିସ୍ତାନରେ ଆତଙ୍କବାଦୀ ଆକ୍ରମଣ ଘଟଣାରେ ୬୪୩ ଜଣଙ୍କର ମୃତ୍ୟୁ ଘଟିଥିଲା, ଯାହା ପୂର୍ବ ବର୍ଷର ୨୯୨ ମୃତକଙ୍କ ତୁଳନାରେ ପ୍ରାୟ ୧୨୦ ପ୍ରତିଶତ ଅଧିକ। ଅଷ୍ଟ୍ରେଲିଆ ଭିତ୍ତିକ ଇନଷ୍ଟିଚ୍ୟୁଟ ଫର୍ ଇକୋନୋମିକ୍ସ ଆଣ୍ଡ ପିସ୍ର ବାର୍ଷିକ ଗ୍ଲୋବାଲ ଟେରରିଜିମ ଇଣ୍ଡେକ୍ସ ରିପୋର୍ଟରେ ଏହା ଉଲ୍ଲେଖ କରାଯାଇଛି।
୨୦୨୨ ମସିହାରେ ପାକିସ୍ତାନରେ ଆତଙ୍କବାଦୀ ଘଟଣାରେ ମୃତ୍ୟୁ ସଂଖ୍ୟା ଦ୍ୱିତୀୟ ସର୍ବାଧିକ। ଆଫ୍ରିକାର ଏକ ନମ୍ବର ଦେଶ ହେଉଛି ବୁର୍କିନା ଫାସୋ, ଯେଉଁଠାରେ ଏହି ସମୟରେ ଆତଙ୍କବାଦୀ ଘଟଣାରେ ୧୧୩୫ ଜଣଙ୍କର ମୃତ୍ୟୁ ହୋଇଥିଲା। ୨୦୨୧ ମସିହାରେ, ବୁର୍କିନା ଫାସୋରେ ୭୫୯ ଜଣଙ୍କର ମୃତ୍ୟୁ ହୋଇଥିଲା। ପାକିସ୍ତାନରେ ଆତଙ୍କବାଦୀ ଘଟଣାରେ ମୃତକଙ୍କ ମଧ୍ୟରୁ ୫୫ ପ୍ରତିଶତ ସେନା ବା ପୋଲିସ କର୍ମଚାରୀ ଅଛନ୍ତି। ରିପୋର୍ଟ ଅନୁଯାୟୀ, ୨୦୦୭ ରୁ ୨୦୨୨ପର୍ଯ୍ୟନ୍ତ ପାକିସ୍ତାନରେ ଆତଙ୍କବାଦୀ ଆକ୍ରମଣରେ ୧୪,୯୨୦ ଲୋକଙ୍କର ଜୀବନ ଯାଇଛି।
ଗ୍ଲୋବାଲ ଆତଙ୍କବାଦ ସୂଚକାଙ୍କ ରିପୋର୍ଟରେ ଆଫଗାନିସ୍ତାନକୁ ଆତଙ୍କବାଦ ପ୍ରଭାବିତ ଦେଶ ବୋଲି ବର୍ଣ୍ଣନା କରାଯାଇଛି। ତେବେ ଗୋଟିଏ ଭଲ କଥା ହେଉଛି ୨୦୨୨ ମସିହାରେ ଆଫଗାନିସ୍ତାନରେ ଆତଙ୍କବାଦୀ ଘଟଣାରେ ମୃତ୍ୟୁ ସଂଖ୍ୟା ୫୮ ପ୍ରତିଶତ ହ୍ରାସ ପାଇଛି। ଆଫଗାନିସ୍ତାନରେ ୨୦୨୨ ମସିହାରେ ଆତଙ୍କବାଦୀ ଘଟଣାରେ ୬୩୩ ଜଣଙ୍କର ମୃତ୍ୟୁ ହୋଇଥିବାବେଳେ ୨୦୨୧ ମସିହାରେ ଏହି ସଂଖ୍ୟା ୧୪,୯୯ ଥିଲା। ରିପୋର୍ଟରେ କୁହାଯାଇଛି ଯେ ଆଫଗାନିସ୍ତାନରେ ତାଲିବାନ ଶାସନକୁ ଫେରିବା କାରଣରୁ ଆତଙ୍କବାଦୀ ଘଟଣାରେ ମୃତ୍ୟୁ ସଂଖ୍ୟା ହ୍ରାସ ପାଇଛି। ରିପୋର୍ଟ ଅନୁଯାୟୀ, ୨୦୨୨ ମସିହାରେ ଇସଲାମିକ ଷ୍ଟେଟ ଖୋରାସାନ ସବୁଠାରୁ ସକ୍ରିୟ ଆତଙ୍କବାଦୀ ସଂଗଠନ ଭାବରେ ଉଭା ହୋଇଛି। ଆଫଗାନିସ୍ତାନରେ, ଏହି ଆତଙ୍କବାଦୀ ସଂଗଠନ ୨୦୨୨ ମସିହାରେ ୪୨୨ଜଣଙ୍କୁ ହତ୍ୟା କରିଥିଲା।