ଲାହୋର,୨୭।୧୧: ୨୬/୧୧ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ତଥା ପାକିସ୍ତାନର କୁଖ୍ୟାତ ଆତଙ୍କବାଦୀ ହଫିଜ ସଇଦ ନିଜ ଲାହୋରସ୍ଥିତ ଘରେ ରହି ମଜା କରୁଛନ୍ତି। ପାକିସ୍ତାନ ସଂଗଠନ ଲସ୍କର-ଏ-ତୋଇବା ନେତା ସଇଦଙ୍କୁ ଚୁପଚାପ ଜେଲରୁ ବାହାର କରାଯାଇଛି। ଗୁଇନ୍ଦା ବିଭାଗର ଏକ ରିପୋର୍ଟରୁ ଜଣାପଡିଛି ଯେ, ହଫିଜ ଲାହୋରର କୋଟ ଲଖପତ ଜେଲରେ ନାହାଁନ୍ତି। ସେ ପ୍ରାୟତଃ ଘରେ ରୁହନ୍ତି ଏବଂ ଅତିଥିମାନେ ମଧ୍ୟ ତାଙ୍କୁ ଭେଟିବାକୁ ଆସିଥାନ୍ତି। କୁହାଯାଉଛି ଯେ ହଫିଜ ସଇଦ ସେଠାରୁ ଆତଙ୍କବାଦୀ କାର୍ଯ୍ୟକଳାପ ଚଳାଉଛନ୍ତି। ଗତ ମାସରେ ଜାକି-ଉର ରେହମାନ ଲାଖଭି ମଧ୍ୟ ହାଫିଜ ସଇଦଙ୍କ ଘରେ ପହଞ୍ଚି ଏକ ବୈଠକ କରିଥିଲେ। ରେହମାନ ଲସ୍କର-ଏ-ତୋଇବାର କାର୍ଯ୍ୟନିର୍ବାହୀ କମାଣ୍ଡର। ଏହି ବୈଠକର ଉଦ୍ଦେଶ୍ୟ ଆତଙ୍କବାଦ ପାଇଁ ପାଣ୍ଠି ସଂଗ୍ରହ ଉପରେ ଧ୍ୟାନ ଦିଆଯାଇଥିଲା। ହାଫିଜ ସଇଦଙ୍କ ପରି ରେହମାନଙ୍କୁ ମଧ୍ୟ ଜାତିସଂଘ ସୁରକ୍ଷା ପରିଷଦ ପ୍ରତିବନ୍ଧକ ଲଗାଇଛି। ଦୁହେଁ ୨୬/୧୧ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ଥିଲେ। ୨୦୧୯ ଜୁଲାଇରେ ହଫିଜ ସଇଦଙ୍କୁ ଗିରଫ କରାଯାଇଥିଲା। ୨୦୨୦ ଫେବୃଆରୀରେ ଆତଙ୍କବାଦ ସମ୍ବନ୍ଧୀୟ ଅର୍ଥ ଯୋଗାଡ ମାମଲାରେ ହଫିଜ ସଇଦଙ୍କୁ ୧୦ ବର୍ଷ ୬ମାସ ଜେଲ୍ ଦଣ୍ଡାଦେଶ ହୋଇଥିଲା।
