ଜମ୍ମୁ,୧୨।୫: ଜମ୍ମୁ-କଶ୍ମୀରରେ ପୁଣି ଆତଙ୍କବାଦୀମାନେ କଶ୍ମୀର ପଣ୍ଡିତଙ୍କୁ ଟାର୍ଗେଟ କରିଛନ୍ତି। ବଡଗାମ ତହସିଲ୍ କାର୍ଯ୍ୟାଳୟରେ ରାଜସ୍ବ ବିଭାଗରେ କାମ କରୁଥିବା ଜଣେ କର୍ମଚାରୀଙ୍କୁ ଆତଙ୍କବାଦୀମାନେ ଗୁଳି କରି ହତ୍ୟା କରିଛନ୍ତି। କର୍ମଚାରୀ ଜଣକ ରାହୁଲ ଭଟ୍ଟ ବୋଲି ଜଣାପଡ଼ିଛି। ରାହୁଲ କଶ୍ମୀର ପଣ୍ଡିତ ବୋଲି କୁହାଯାଉଛି। ଯିଏ ଦୀର୍ଘ ଦିନ ଧରି ରାଜସ୍ବ ବିଭାଗରେ କାର୍ଯ୍ୟ କରିଆସୁଥିଲେ। ସୂଚନାଯୋଗ୍ୟ, ଗୁରୁବାର ଆତଙ୍କବାଦୀମାନେ ବଡଗାମର ଚାଡୁରାରେ ଥିବା ତହସିଲ କାର୍ଯ୍ୟାଳୟ ଭିତରକୁ ପଶି ରାହୁଲଙ୍କ ଉପରେ ଗୁଳି ଚଳାଇଥିଲେ। ଏହାପରେ ସେମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଗୁରୁତର ଅବସ୍ଥାରେ ରାହୁଲଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ତେବେ ଏହି ଆକ୍ରମଣ ପାଇଁ ଜୈଶ ସହ ଜଡ଼ିତ ଥିବା ଆତଙ୍କବାଦୀ ସଂଗଠନ କଶ୍ମୀର ଟାଇଗର୍ସ(ଟିଆରଏଫ୍) ନିଜକୁ ଦାୟୀ କରିଛି। ଅନ୍ୟପଟେ ଆତଙ୍କବାଦୀଙ୍କୁ ଧରିବା ପାଇଁ ସୁରକ୍ଷାକର୍ମୀମାନେ ସ୍ଥାନୀୟ ଅଞ୍ଚଳକୁ ଘେରାବନ୍ଦୀ କରି ସର୍ଚ୍ଚ ଅପରେଶନ୍କୁ ଜୋରଦାର କରିଛନ୍ତି।