ଜେନେଭା,୧୭।୧୧: ଜାତିସଂଘରେ ପାକିସ୍ତାନକୁ ଭାରତ ପକ୍ଷରୁ ଚେତବାନୀ ଦିଆଯାଇଛି। ସୀମା ପାର କରି ଆତଙ୍କବାଦୀମାନେ ଅନୁପ୍ରବେଶ କରୁଥିବା ନେଇ ମିଳିତ ଜାତିସଂଘ ସୁରକ୍ଷା ପରିଷଦ (ୟୁଏନଏସସି)ରେ ଭାରତ ପାକିସ୍ତାନକୁ କଡ଼ା ଜବାବ ଦେଇଛି। ପାକିସ୍ତାନ ଆତଙ୍କବାଦୀମାନେ ଖୋଲା ବୁଲୁଛନ୍ତି ବୋଲି ମିଳିତ ଜାତିସଂଘରେ ଭାରତର ସ୍ଥାୟୀ ମିଶନର କନସୁଲ କାଜଲ ଭଟ କହିଛନ୍ତି।
ପାକିସ୍ତାନ ପ୍ରାୟୋଜିତ ଆତଙ୍କବାଦ କାର୍ଯ୍ୟକଳାପ ବିରୋଧରେ ଦୃଢ଼ ତଥା ନିର୍ଣ୍ଣାୟକ କାର୍ଯ୍ୟାନୁଷ୍ଠାନ ଭାରତ ଜାରି ରଖିବ। ଭାରତୀୟ ପ୍ରତିନିଧି ଏହା ମଧ୍ୟ କହିଛନ୍ତି ଯେ ଯେକୌଣସି ସଫଳ କଥାବାର୍ତ୍ତା ପାଇଁ ଏକ ଅନୁକୂଳ ପରିବେଶ ସୃଷ୍ଟି ହେଉନ ଥିବା ଲାଗି ପାକିସ୍ତାନ ଦାୟୀ। ତେବେ ସଫଳ ଆଳୋନା କେବଳ ଆତଙ୍କବାଦ, ଶତ୍ରୁତା ଏବଂ ହିଂସା ମୁକ୍ତ ପରିବେଶରେ କରାଯାଇପାରିବ ବୋଲି ସେ କହିଛନ୍ତି॥
କାଜଲ କହିଛନ୍ତି ଯେ ପାକିସ୍ତାନ ସମେତ ସମସ୍ତ ପଡୋଶୀ ଦେଶ ସହ ଭାରତ ସ୍ବାଭାବିକ ସମ୍ପର୍କ ଚାହୁଁଛି । ବିଭିନ୍ନ ସମସ୍ୟାର ସମାଧାନ ଭାରତ ସିମଲା ଚୁକ୍ତିନାମା ଏବଂ ଲାହୋର ଘୋଷଣାନାମା ଅନ୍ତର୍ଗତ କରିବାକୁ ଚାହୁଁଛି। ମାତ୍ର ଅନୁକୂଳ ସ୍ଥିତି ସୃଷ୍ଟି ନ ହେବାଯୋଗୁ କୌଣସି ଆଲୋଚନା ଆଗେଇବା ସମ୍ଭବ ହୋଇ ପାରୁନି। ଜମ୍ମୁ-କଶ୍ମୀରରୁ ଅବୈଧ କବ୍ଜା ପାକିସ୍ତାନ ଶୀଘ୍ର ହଟାଇବା ଉପରେ ସେ ଗୁରୁତ୍ୱାରୋପ କରିଛନ୍ତି।
ଭାରତ କହିଛି, ଜମ୍ମୁ-କଶ୍ମୀର ଏବଂ ଲଦାଖର ୟୁନିଅନ ଟେରିଟୋରୀ ସବୁବେଳେ ଭାରତର ଏକ ଅବିଚ୍ଛେଦ୍ୟ ଅଙ୍ଗ ହୋଇଆସୁଛି ବୋଲି ଆମେ ସ୍ପଷ୍ଟ କରିବାକୁ ଚାହୁଁଛୁ। ଏହାର କିଛି ଅଂଶ ପାକିସ୍ତାନ ଦ୍ୱାରା ବେଆଇନ ଭାବେ ଦଖଲ କରାଯାଇଛି, ତେଣୁ ପାକିସ୍ତାନକୁ ତୁରନ୍ତ ଏହି ଅଞ୍ଚଳ ଖାଲି କରିବାକୁ ପଡିବ।
ପାକିସ୍ତାନରେ ଆତଙ୍କବାଦୀମାନେ ସାଧାରଣ ଲୋକଙ୍କ ମଧ୍ୟରେ ମୁକ୍ତ ଭାବରେ ବୁଲୁଛନ୍ତିି। ସେଠାରେ ଅଳ୍ପସଂଖ୍ୟକ ସମ୍ପ୍ରଦାୟର ଲୋକମାନେ ହଇରାଣ ହେଉଛନ୍ତି। ସେମାନଙ୍କ ଉପରେ ଅତ୍ୟାଚାର କରାଯାଉଥିବା ଭାରତ ଅଭିଯୋଗ କରିଛି।