ଓ୍ବାଶିଂଟନ,୨।୬: ଆତଙ୍କବାଦୀମାନଙ୍କ ପାଖରେ ଆଣବିକ,ଜୈବିକ ଏବଂ ରାସାୟନିକ ଅସ୍ତ୍ରଶସ୍ତ୍ର ରହିଛି। ସେମାନେ ଏହାକୁ ସାଧାରଣ ନାଗରିକଙ୍କ ଉପରେ ମଧ୍ୟ ବ୍ୟବହାର କରିବାର ଯଥେଷ୍ଟ ଆଶଙ୍କା ରହିଛି। ଏନେଇ ଜାତିସଂଘର ସୁରକ୍ଷା ପରିଷଦର ଏକ ଆଲୋଚନାରେ ଭାରତ ଚେତାବନୀ ଦେଇଛି।
ଜାତିସଂଘରେ ଅବସ୍ଥାପିତ ଭାରତର ଜଣେ ଅଧିକାରୀ ଏ. ଅମରନାଥ କହିଛନ୍ତି ଯେ ନୂତନ ଜ୍ଞାନକୌଶଳର ବିକାଶ ସହିତ ଆଣବିକ, ରାସାୟନିକ ଏବଂ ଜୈବିକ ଅସ୍ତ୍ର ଅଧିକ ମାରାତ୍ମକ ହେବାରେ ଲାଗିଛି। ଆତଙ୍କବାଦୀ ଗୋଷ୍ଠୀର ହାତରେ ଏସବୁ ପଡ଼ିବାର ଆଶଙ୍କା ମଧ୍ୟ ବୃଦ୍ଧି ପାଉଛି। ଆତଙ୍କବାଦୀ ଗୋଷ୍ଠୀ ସହ କାର୍ଯ୍ୟ କରୁଥିବା କେତେକ ଦେଶର ଅଣ-ସରକାରୀ ବାହିନୀ କ୍ଷେପଣାସ୍ତ୍ର ଏବଂ ମାନବବିହୀନ ବିମାନ ପ୍ରଣାଳୀରେ ଦ୍ୱାରା ଆକ୍ରମଣ କରିବା ଆଶଙ୍କା ବଢୁଥିବା ସେ କହିଛନ୍ତି। ଏହାର ସମାଧାନ ସମସ୍ତ ଦେଶ ଖୋଜିବା ଜରୁରୀ ହୋଇପଡ଼ିଛି।
ଜାତିସଂଘର ଅନୁସନ୍ଧାନକାରୀ ଦଳର ରିପୋର୍ଟରେ ଅମରନାଥ କହିଛନ୍ତି ଯେ ଅନେକ ଦେଶରେ ଆତଙ୍କବାଦୀ ଗୋଷ୍ଠୀ କେତେକ ସ୍ଥାନଗୁଡିକ ନିଜ ଦଖଲକୁ ନେଇଛନ୍ତି। ସେମାନେ ମାରାତ୍ମକ ଅସ୍ତ୍ରଶସ୍ତ୍ର ବିକଶିତ କରିବା ସହିତ ଏହାକୁ ଆତଙ୍କବାଦୀ କାର୍ଯ୍ୟକଳାପରେ ବ୍ୟବହାର କରିବାର ଆଶଙ୍କା ବଢ଼ିବାରେ ଲାଗିଥିବା ସେ କହିଛନ୍ତି।
