ଓ୍ବାଶିଂଟନ, ୬।୨ : ଏବେ ଆତଙ୍କବାଦୀଙ୍କ ସହିତ ଲଢ଼େଇ କରିବା କଷ୍ଟକର ହେବାକୁ ଯାଉଛି। ଏନେଇ ଅନ୍ତର୍ଜାତୀୟସ୍ତରରେ ବିକଶିତ ରାଷ୍ଟ୍ରଙ୍କ ଚିନ୍ତା ବଢ଼ିବାରେ ଲାଗିଛି। ସୌଦି ଏବଂ ୟୁଏଇରେ ଡ୍ରୋନ୍ ଆକ୍ରମଣ ଘଟଣା ବଢ଼ିବାରେ ଲାଗିଛି। ଏହି ଦୁଇ ଦେଶରେ ପଡ଼ୋଶୀ ହୌତି ବିଦ୍ରୋହୀଙ୍କ ଆକ୍ରମଣ ବଢ଼ି ଚାଲିଛି। ଏହି ଦୁଇ ଦେଶ ନିଜର ନିଜର ବୋମାବର୍ଷୀ ଡ୍ରୋନ୍ ରଖିଥିଲେ ମଧ୍ୟ ହୌତି ବିଦ୍ରୋହୀଙ୍କୁ ନିୟନ୍ତ୍ରଣ କରିବା କଷ୍ଟକର ହୋଇ ପଡୁଛି।
ସେହିପରି ସିରିଆ ଏବଂ ଇରାକରେ ଆମେରିକା ସୈନ୍ୟ ବାହିନୀ ଡ୍ରୋନ୍ ଆକ୍ରମଣ ନେଇ ଅସୁବିଧାରେ ପଡ଼ିଛନ୍ତି। ଏଠାରେ ବିଦ୍ରୋହୀଙ୍କ ଡ୍ରୋନ୍ ଆକ୍ରମଣରେ ବହୁ ଆମେରିକା ତଥା ବ୍ରିଟେନ୍ ସୈନ୍ୟଙ୍କ ମୃତ୍ୟୁ ଘଟି ସାରିଛି। ଏସବୁ ଘଟଣା ନେଇ ଆମେରିକାର ଚିନ୍ତା ବୃଦ୍ଧି ପାଇବାରେ ଲାଗିଛି। ଭାରତରେ ମଧ୍ୟ ସୀମା ପାର୍ ଡ୍ରୋନ୍ ଅନୁପ୍ରବେଶ ତଥା ଆକ୍ରମଣ ଘଟଣା ଅଧିକ ଘଟିବାରେ ଲାଗିଛି। ପଞ୍ଜାବ ସୀମାରେ ଡ୍ରୋନ୍ ମାଧ୍ୟମରେ ଆତଙ୍କବାଦୀଙ୍କୁ ଅସ୍ତ୍ରଶସ୍ତ୍ର ଯୋଗାଣ ହେଉଥିବାର ପର୍ଦ୍ଦାଫାଶ୍ ନେଇ ସରକାର ଚିନ୍ତିତ ରହିଛନ୍ତି।
ଆତଙ୍କବାଦୀଙ୍କ ଡ୍ରୋନ୍ ଆକ୍ରମଣକୁ ଦୃଷ୍ଟିରେ ରଖି ବିକଶିତ ରାଷ୍ଟ୍ରଗୁଡ଼ିକ ପକ୍ଷରୁ ସ୍ବାର୍ମ ଡ୍ରୋନ୍ ଜ୍ଞାନକୌଶଳ ଆଧାରରେ ଏହାର ମୁକାବିଲା ଉପରେ ଗୁରୁତ୍ୱାରୋପ କରାଯାଉଛି। ଏହା ଦ୍ୱାରା ଆତଙ୍କବାଦୀଙ୍କ ଡ୍ରୋନ୍କୁ ଧ୍ୱଂସ କରାଯାଇ ପାରିବ। ଆତଙ୍କବାଦୀଙ୍କ ପାଖରେ ବୋମାବର୍ଷୀ ଡ୍ରୋନ୍ ସଂଖ୍ୟା ବଢୁଥିବାରୁ ଏହାକୁ ନେଇ ଏବେ ଯୁଦ୍ଧ କୌଶଳରେ ନୂଆ ଧାରା ଆରମ୍ଭ କରିବାକୁ ବିକଶିତ ରାଷ୍ଟ୍ରମାନେ ଉଦ୍ୟମ ଆରମ୍ଭ କରିଛନ୍ତି।