ସିଡ୍ନୀ,୨୮।୧୧ (ପି.ଟି.): ଆଗାମୀ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜ୍ରୁ ଭାରତର ସବୁଠାରୁ ଅଭିଜ୍ଞ ବୋଲର ଈଶାନ୍ତ ଶର୍ମା ବାଦ୍ ପଡିଛନ୍ତି। ସିରିଜ ବେଳକୁ ସେ ମ୍ୟାଚ୍ ପାଇଁ ସମ୍ପୂର୍ଣ୍ଣ ଫିଟ୍ ହୋଇ ନ ଥିବେ। ତେଣୁ ତାଙ୍କୁ ବାଦ୍ ଦିଆଯାଇଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସମ୍ପାଦକ ଜୟ ଶାହା କହିଛନ୍ତି। ସେହିପରି ତାରକା ଓପନର ରୋହିତ ଶର୍ମାଙ୍କ ହାମ୍ଷ୍ଟ୍ରିଙ୍ଗ୍ ଇଞ୍ଜୁରି ନେଇ ଡିସେମ୍ବର ୧୧ ତାରିଖରେ ପରୀକ୍ଷା ହେବ ଓ ଏ ନେଇ ଅନ୍ତିମ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି।
ଏକ ଅନ୍ଲାଇନ୍ ମିଡିଆ ଆଲୋଚନାରେ ଅଧିନାୟକ ଏ ନେଇ ନିଜର ଅସନ୍ତୋଷ ଜାରି କରିବା ପରେ ବିସିସିଆଇ ଏହି ଦୁଇ ଖେଳାଳିଙ୍କ ନେଇ ଅଧରାତିରେ ଶର୍ଟ ଇଞ୍ଜୁରି ଅପ୍- ଡେଟ୍ ଜାରି କରିଛି। ରିଦ୍ଧିମାନ ଶାହାଙ୍କ ସହିତ ରୋହିତ ଅଷ୍ଟ୍ରେଲିଆରେ କାହିଁକି ରିହାବିଲିଟେଶନରେ ରହିପାରିବେନି ବୋଲି କୋହଲି ପ୍ରଶ୍ନ କରିଥିଲେ। ଜୟ ଶାହା ଏହାର ମଧ୍ୟ ଜବାବ ରଖିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ପରେ ରୋହିତ ନିଜ ଅସୁସ୍ଥ ପିତାଙ୍କୁ ଦେଖା କରିବା ପାଇଁ ମୁମ୍ବାଇ ପ୍ରତ୍ୟାବର୍ତ୍ତନ କରିଥିଲେ। ରୋହିତ ଏ ନେଇ ଜାତୀୟ କ୍ରିକେଟ ଏକାଡେମୀ (ଏନ୍ସିଏ)ରେ ରିପୋର୍ଟ କରିଛନ୍ତି ବୋଲି ଶାହା ସ୍ପଷ୍ଟ କରିଛନ୍ତି। ତାଙ୍କ ପିତାଙ୍କ ସ୍ବାସ୍ଥ୍ୟାବସ୍ଥାରେ ଉନ୍ନତି ହେବାରୁ ରୋହିତ ଏବେ ବେଙ୍ଗାଲୁରୁ ସ୍ଥିତ ଏନ୍ସିଏ ଯାଇ ରିହାବିଲିଟେଶନରେ ଅଛନ୍ତି ବୋଲି ଶାହା କହିଛନ୍ତି। ଆସନ୍ତା ୧୧ ତାରିଖରେ ତାଙ୍କ ଆଘାତ ସମସ୍ୟାର ମୂଲ୍ୟାଙ୍କନ ହେବ ଓ ଏହାପରେ ଟେଷ୍ଟ ସିରିଜରେ ସାମିଲ ହେବେ କି ନା ସ୍ପଷ୍ଟ ହେବ। ଯଦି ରୋହିତ ଅଷ୍ଟ୍ରେଲିଆ ଗସ୍ତ କରନ୍ତି ତେବେ ତାଙ୍କ ପାଇଁ କ୍ୱାରାଣ୍ଟାଇନ ନିୟମ କୋହଳ କରିବାକୁ ବିସିସିଆଇ ସଭାପତି ସୌରଭ ଗାଙ୍ଗୁଲି କ୍ରିକେଟ ଅଷ୍ଟ୍ରେଲିଆ (ସିଏ) ମୁଖ୍ୟ କାର୍ଯ୍ୟନର୍ବାହୀ ନିକ୍ ହୋକ୍ଲିଙ୍କୁ ଅନୁରୋଧ କରିଛନ୍ତି ବୋଲି ଜଣାଯାଇଛି। ଏହା ହେଲେ ୧୪ ଦିନିଆ ଆଇସୋଲେଶନ ପିରିୟଡ୍ରେ ଟ୍ରେନିଂ କରିପାରିବେ। ସେହିପରି ଆଇପିଏଲ୍ ଖେଳିବା ଅବସରରେ ଈଶାନ୍ତ ଆହତ ହୋଇଥିଲେ। ସେ ସାଇଡ୍ ଷ୍ଟ୍ରେନ୍ ଇଞ୍ଜୁରିରୁ ମୁକ୍ତ ହୋଇଥିଲେ ମଧ୍ୟ ମ୍ୟାଚ୍ ଫିଟ୍ନେସ୍ ହାସଲ କରିବା ପାଇଁ ସମୟ ନେବେ। ଫଳରେ ସେ ଆଗାମୀ ଟେଷ୍ଟ ସିରିଜରୁ ବାଦ୍ ପଡିଛନ୍ତି ବୋଲି ଶାହା କହିଛନ୍ତି।