ଲଣ୍ଡନ,୬।୯: ଓଭାଲ ଟେଷ୍ଟର ପଞ୍ଚମ ଦିନରେ ଆସମାପ୍ତ ଦ୍ୱିତୀୟ ଇନିଂସ ସ୍କୋର ୭୭/୦ରୁ ଇଂଲଣ୍ଡ ଖେଳ ଆରମ୍ଭ କରିଥିଲା। ଦୁଇ ଓପନର ରୋରି ବନର୍ସ ଓ ହାସିମ ହମିଦ ଦମ୍ଦାର ପ୍ରଦର୍ଶନ କରି ଦଳକୁ ଭଲ ଆରମ୍ଭ ପ୍ରଦାନ କରିଥିଲେ। ୧୦୦ ରନରେ ଇଂଲଣ୍ଡ ପ୍ରଥମ ଉଇକେଟ ଭାବେ ବନର୍ସକୁ ହରାଇଥିଲା। ଓଭରନାଇଟ ସ୍କୋର ୩୧ରୁ ଖେଳ ଆରମ୍ଭ କରି ସେ ୫୦ ରନର ଅର୍ଦ୍ଧଶତକୀୟ ପାଳି ଖେଳି ଉଇକେଟକିପର ରିଷଭ ପନ୍ତଙ୍କୁ କ୍ୟାଚ୍ ଦେଇ ଶାର୍ଦ୍ଦୁଳ ଠାକୁରଙ୍କ ଶିକାର ହୋଇଥିଲେ। ପ୍ରଥମ ଉଇକେଟ ନେଇ ଠାକୁର ଭାରତକୁ ବ୍ରେକ୍ ଥ୍ରୁ ଦେଇଥିଲେ। ଅନ୍ୟତମ ଓପନର ହାସିବ ହମିଦ ଗତକାଲିର ଅପରାଜିତ ସ୍କୋର ୪୩ରୁ ଖେଳ ଆରମ୍ଭ କରି ୬୩ ରନ୍ କରିଥିବା ବେଳେ ସ୍ପିନର ରବୀନ୍ଦ୍ର ଜାଡେଜାଙ୍କ ଦ୍ୱାରା ବୋଲ୍ଡ ହୋଇଥିଲେ। ତାଙ୍କୁ ପୂର୍ବରୁ ଦାଓ୍ବିଦ ମଲନ ୫ ରନ କରିଥିବା ବେଳେ ବଦଳ ଖେଳାଳି ମୟଙ୍କ ଅଗ୍ରଓ୍ବାଲଙ୍କ ଥ୍ରୋରେ ପନ୍ତଙ୍କ ଦ୍ୱାରା ଦୂର୍ଭାଗ୍ୟଜନକ ଭାବେ ରନ୍ ଆଉଟ ହୋଇଥିଲେ। ଏହାପରେ ଓଲି ପୋପ୍, ଜନି ବେୟରଷ୍ଟୋ, ମୋଇନ ଅଲି ବେଶି ସମୟ ତିଷ୍ଠି ନ ପାରି ସଅଳ ପ୍ୟାଭିଲିୟନ ଫେରିଥିଲେ। ପୋପ୍ ୨ ରନ କରି ଓ ଉଇକେଟକିପର ବ୍ୟଟ୍ସମ୍ୟାନ ଜନି ବେୟାରଷ୍ଟୋ ଖାତା ଖେଳିବା ପୂର୍ବରୁ ଯଶପ୍ରୀତ ବୁମରାଙ୍କ ଦ୍ୱାରା ବୋଲ୍ଡ ହୋଇଥିଲେ। ବିନା ସ୍କୋରରେ ଅଲରାଉଣ୍ଡର ମୋଇନ ଜାଡେଜାଙ୍କ ବଲ୍ରେ ଶର୍ଟଲେଗ୍ରେ ବଦଳ ଖେଳାଳି ସୂର୍ଯ୍ୟକୁମାର ଯାଦବଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏହାପରେ ପାଳି ପଡିଥିବା ଇନ୍ଫର୍ମ ଅଧିନାୟକ ଜୋ ରୁଟଙ୍କର। ସେ ୩୬ ରନକରି ଠାକୁରଙ୍କ ଦ୍ୱାରା ବୋଲ୍ଡ ହୋଇଥିଲେ। ଅଫ୍ଷ୍ଟମ୍ପ ବାହାର ବଲ ଖେଳିବାକୁ ଯାଇ ସେ ଦୂର୍ଭାଗ୍ୟଜନକ ଭାବେ ପ୍ଲେଡଅନ୍ ହୋଇଥିଲେ। ରୁଟ୍ ଆଉଟ ହେବା ପରେ ଭାରତର ବିଜୟ ନିଶ୍ଚିତ ହୋଇଥିଲା। ୧୮ ରନ୍ କରି କ୍ରିଜ୍ରେ ଜମିଆସୁଥିବା ଅଲରାଉଣ୍ଡର କ୍ରିସ୍ ଓ୍ବକ୍ସ କିନ୍ତୁ ଅଧିକ ସମୟ କ୍ରିଜ୍ରେ ରହିପାରି ନ ଥିଲେ। ସେ ଲୋକେଶ ରାହୁଲଙ୍କ କ୍ୟାଚ୍ ଦେଇ ଉମେଶ ଯାଦବଙ୍କ ଦ୍ୱାରା ଆଉଟ ହୋଇଥିଲେ। ମାତ୍ର ୫୨ ରନ ମଧ୍ୟରେ ଇଂଲଣ୍ଡ ୬ ଉଇକେଟ ହରାଇଥିଲା। କ୍ରେଗ୍ ଓଭରଟନ ୧୦ ରନ କରିଥିବା ବେଳେ ଉମେଶ ଯାଦବଙ୍କ ଦ୍ୱାରା ବୋଲ୍ଡ ହୋଇଥିଲେ ଓ ଇଂଲଣ୍ଡର ନବମ ଉଇକେଟର ପତନ ଘଟିଥିଲା। ଶେଷ ଉଇକେଟ ଭାବେ ଜେମ୍ସ ଆଣ୍ଡରସନ ୨ ରନ କରିଥିବା ବେଳେ ପନ୍ତଙ୍କୁ କ୍ୟାଚ୍ ଦେଇ ଉମେଶଙ୍କ ତୃତୀୟ ଶିକାର ହୋଇଥିଲେ। ବୋଲିଂରେ ଭାରତ ପକ୍ଷରୁ ଉମେଶ ୩, ବୁମ୍ରା, ଜାଡେଜା ଓ ଠାକୁର ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ। ଭାରତର ରୋହିତ ଶର୍ମା ପ୍ଲେୟର ଅଫ ଦି’ ମ୍ୟାଚ ବିବେଚିତ ହୋଇଥିଲେ।
