ବ୍ରିସ୍ବେନ,୧୮।୧: ଗାବା ଗ୍ରାଉଣ୍ଡରେ ଭାରତ ପାଇଁ ସପ୍ତମ ଉଇକେଟରେ ସବୁଠାରୁ ଅଧିକ ରନ ସଂଗ୍ରହ କରି ଶାର୍ଦ୍ଦୁଳ ଠାକୁର ଓ ଓ୍ବାଶିଂଟନ ସୁନ୍ଦର ୩୦ ବର୍ଷ ତଳର ରେକର୍ଡ ଭାଙ୍ଗିଛନ୍ତି। ଏହି ଯୋଡି ୬୭ ରନକରିବା ପରେ ଏହି ସଫଳତା ପାଇଥିଲେ। ଏହି କ୍ରମରେ ଏମାନେ କପିଳ ଦେବ ଓ ମନୋଜ ପ୍ରଭାକରଙ୍କ ରେକର୍ଡକୁ ପଛରେ ପକାଇଥିଲେ। ୩୦ ବର୍ଷ ତଳେ କପିଳ ଓ ମନୋଜ ଗାବାରେ ୫୮ ରନ ସଂଗ୍ରହ କରିଥିଲେ। ସେହିପରି ୨୦୧୪ରେ ମହେନ୍ଦ୍ର ସିଂ ଧୋନୀ ଓ ରବିଚନ୍ଦ୍ରନ ଅଶ୍ୱିନ ଏଠାରେ ସପ୍ତମ ଉଇକେଟରେ ୫୭ ରନ ସଂଗ୍ରହ କରିଥିଲେ। ସେହିପରି ୧୯୯୧ରେ ପ୍ରଭାକର ଓ ରବି ଶାସ୍ତ୍ରୀ ୪୯ ଓ ୧୯୬୮ରେ ଏମ୍.ଏଲ୍. ଜୟସିହ୍ମା ଓ ବାପୁ ନାଦକର୍ଣ୍ଣୀ ୪୪ ରନ ସଂଗ୍ରହ କରିଥିଲେ। ୩୮ ବର୍ଷପରେ ଏହି ଦୁଇ ଖେଳାଳି ୭ ଓ ୮ ନମ୍ବରରେ ବ୍ୟାଟିଂ କରି ଅର୍ଦ୍ଧଶତକ ଅର୍ଜନ କରିଛନ୍ତି। ପୂର୍ବରୁ ମାଞ୍ଚେଷ୍ଟରରେ ୧୯୮୨ରେ ସନ୍ଦୀପ ପାଟିଲ ଓ କପିଳ ଦେବ ଏହି ନମ୍ବରରେ ବ୍ୟାଟିଂ କରି ଯଥାକ୍ରମେ ଅପରାଜିତ ୧୨୯ ଓ ୬୫ ରନ ସଂଗ୍ରହ କରିଥିଲେ। ସୁନ୍ଦର ୭ ନମ୍ବରରେ ବିଦେଶୀ ବ୍ୟାଟ୍ସମ୍ୟାନ ଭାବେ ଅଷ୍ଟ୍ରେଲିଆ ମାଟିରେ ସର୍ବାଧିକ ରନ୍ ସଂଗ୍ରହ କରି ୧୧୦ ବର୍ଷର ପୁରୁଣା ରେକର୍ଡକୁ ଅତିକ୍ରମ କରିଛନ୍ତି। ୧୯୧୧ରେ ଇଂଲଣ୍ଡର ଫ୍ରେଙ୍କ୍ ପୋଷ୍ଟର ସିଡ୍ନୀରେ ୭ ନମ୍ବରରେ ବ୍ୟାଟିଂ କରି ୫୬ ରନ ସଂଗ୍ରହ କରିଥିଲେ। ଭାରତର ତୃତୀୟ ଖେଳାଳି ଭାବେ ସୁନ୍ଦର ୭ ନମ୍ବରରେ ବ୍ୟାଟିଂ କରି ଅର୍ଦ୍ଧଶତକ ହାସଲ କରିଛନ୍ତି।
ଠାକୁର ଓ ସୁନ୍ଦରଙ୍କ ଏହି ପାର୍ଟନଶିପ୍ ଓ ଲଢୁଆ ପ୍ରଦର୍ଶନକୁ ଅଷ୍ଟ୍ରେଲିଆ ପୂର୍ବତନ ଅଧିନାୟକ ରିକି ପଣ୍ଟିଂ, ଅଷ୍ଟ୍ରେଲିଆ ଦ୍ରୁତ ବୋଲର ଜୋଶ ହାଜେଲଉଡ୍ ପ୍ରଶଂସା କରିଛନ୍ତି। ସେହିପରି ପୂର୍ବତନ କ୍ରିକେଟର ଆର.ପି. ସିଂ, ଇଆନ ବିଶପ, ବୀରେନ୍ଦ୍ର ସେହ୍ବାଗ ଟୁଇଟ୍ କରି ଏହି ଦୁଇ ଖେଳାଳିଙ୍କୁ ପ୍ରଶଂସା କରିଛନ୍ତି।