ଥମୁନି ଅସନ୍ତୋଷ, ତେଜୁଛି ଚାଷୀ ଆନ୍ଦୋଳନ: ମାର୍ଚ୍ଚ ୧୭ରେ କିଷାନ ମହାପଞ୍ଚାୟତ

ବରଗଡ/ସୋହେଲା,୧ା୩(ପ୍ରେମାନନ୍ଦ ଖମାରୀ/ଅଶ୍ୱିନୀ ପାତ୍ର):କୃଷି ଏବଂ କୃଷକଙ୍କ ସମସ୍ୟା ନେଇ ବରଗଡ଼ ଜିଲା ସୋହେଲାରେ ଚାଷୀ ସଙ୍ଗଠନ ଜୟ କିଷାନ ଆନ୍ଦୋଳନ ନେତୃତ୍ୱରେ ଶତାଧିକ ଚାଷୀ ବିକ୍ଷୋଭ ଶୋଭାଯାତ୍ରା ସହିତ ସ୍ଥାନୀୟ ତହସିଲ ଅଫିସ ସମ୍ମୁଖରେ ପ୍ରତିବାଦ ସଭା କରିଥିଲେ। ଏହାସହିତ ୩ଦଫା ଦାବି ନେଇ ସଙ୍ଗଠନ ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ଥାନୀୟ ତହସିଲଦାର ଶୁଭରଞ୍ଜନ ନାୟକଙ୍କ ଜରିଆରେ ଦାବିପତ୍ର ପ୍ରଦାନ କରାଯାଇଥିଲା। କୃଷିକ୍ଷେତ୍ରରେ ବ୍ୟବହୃତ ବିଦ୍ୟୁତ ବିଲ୍‌ ଛାଡ଼, କଟନୀଛଟନୀ ବନ୍ଦ, ନାନୋ ସାର ବ୍ୟବହାରକୁ ବାଧ୍ୟତାମୂଳକ କରା ନ ଯିବା ଆଦି ଦାବି କରିଥିଲେ। ଏହି ଦାବିରେ ଚାଷୀମାନେ ସୋହେଲା ଥାନାଛକରୁ ଏକ ବିକ୍ଷୋଭ ଶୋଭାଯାତ୍ରାରେ ବାହାରି ସ୍ଥାନୀୟ ତହସିଲ କାର୍ଯ୍ୟାଳୟ ସମ୍ମୁଖକୁ ପହଞ୍ଚିଥିଲେ। ସେଠାରେ ଅନୁଷ୍ଠିତ ପ୍ରତିବାଦ ସଭାରେ ବିଦ୍ୟୁତ କ୍ଷେତ୍ରର କମ୍ପାନୀକରଣକୁ ନେଇ ଚାଷୀନେତାମାନେ ଉଦ୍‌ବେଗ ପ୍ରକାଶ କରିଥିଲେ। କୃଷିକ୍ଷେତ୍ରରେ ବ୍ୟବହୃତ ବିଦ୍ୟୁତ ବିଲ ଛାଡ଼, ପ୍ରତ୍ୟେକ ପରିବାରକୁ ମାସିକ ୩୦୦ୟୁନିଟ୍‌ ମାଗଣା ବିଦ୍ୟୁତ, ବିଦ୍ୟୁତ କ୍ଷେତ୍ରର ଘରୋଇକରଣ ବନ୍ଦ, ଧାନବିକ୍ରି ବ୍ୟବସ୍ଥାରେ ମିଲର୍ସଙ୍କ ହସ୍ତକ୍ଷେପ ବନ୍ଦ, ନାନୋ ସାର ବ୍ୟବହାରକୁ ବାଧ୍ୟତାମୂଳକ କରା ନ ଯିବା ଦାବି ଉପସ୍ଥାପନ କରିଥିଲେ। ସେହିପରି ନୂଆ ଭାଜପା ସରକାର ଧାନ କୁଇଣ୍ଟାଲ ପ୍ରତି ଅଧିକ ୮୦୦ ଟଙ୍କା ଇନପୁଟ୍‌ ସବସିଡ଼ି ପ୍ରଦାନ କରିଛି ସତ, କିନ୍ତୁ ଅନ୍ୟବର୍ଷ ତୁଳନାରେ ମିଲର୍ସ, ଦଲାଲଙ୍କ ଦୌରାତ୍ମ ମଣ୍ଡିରେ ବଢ଼ିଛି ଏବଂ ଚାଷୀଙ୍କୁ କ୍ଷତି ସହିବାକୁ ପଡ଼ୁଛି ବୋଲି ସେମାନେ ଅଭିଯୋଗ କରିଥିଲେ। ଫଳରେ ଉପରୋକ୍ତ ଦାବି ସମୂହ ତୁରନ୍ତ ପୂରଣ କରା ନ ଗଲେ ଆଗକୁ ଆନ୍ଦୋଳନ ତୀବ୍ର ହେବ ବୋଲି ଚେତାବନୀ ଦିଆଯାଇଥିଲା। ସଙ୍ଗଠନର ବ୍ଲକ ସଭାପତି ସୁରେନ୍ଦ୍ର ମେହେର ପ୍ରତିବାଦ ସଭା ସଂଯୋଜନା କରିଥିବାବେଳେ ବରିଷ୍ଠ କୃଷକ ନେତା ଶିବ ପ୍ରସାଦ ପ୍ରଧାନ, ଜୟ କଷାନ ଆନ୍ଦୋଳନର ସଭାପତି ସୁଶିଲ କୁମାର ସାହୁ, ସମ୍ପାଦକ ହର ବଣିଆଁ, ଅରୁଣ କୁମାର ସାହୁ, ଚଞ୍ଚଳ ପ୍ରଧାନ, ମହେଶ୍ୱର ପ୍ରଧାନ, ଅରୁଣ ପ୍ରଧାନ, ରେବତୀକାନ୍ତ ବେହେରା, ପୁଷ୍ପରଞ୍ଜନ ସାହୁ, ତପୋବନ୍ଦ ନାୟକ ପ୍ରମୁଖ ପ୍ରତିବାଦ ସଭାରେ ଉଦ୍‌ବୋଧନ ଦେଇଥିଲେ।

କୃଷି ଓ କୃଷକଙ୍କ ସମସ୍ୟାକୁ ନେଇ ଆସନ୍ତା ମାର୍ଚ୍ଚ ମାସ ୧୭ତାରିଖ ବରଗଡ଼ ବ୍ଲକ ସୟାଁ ଖେଳ ପଡ଼ିଆରେ ରାଜ୍ୟସ୍ତରୀୟ କିଷାନ ମହାପଞ୍ଚାୟତ ଅନୁଷ୍ଠିତ ହେବ। ଏହି ପରିପ୍ରେକ୍ଷୀରେ ଶୁକ୍ରବାର ବିଜେପୁର ବ୍ଲକ ପୁଞ୍ଜିପଥରରେ ବରଗଡ଼ ଜିଲା ସଂଯୁକ୍ତ କୃଷକ ସଙ୍ଗଠନ ପକ୍ଷରୁ ଏକ ପ୍ରସ୍ତୁତି ବୈଠକ ହୋଇଥିଲା। ଧାନର ଅଭାବିବିକ୍ରୀ, କୃଷିଜାତ ଦ୍ରବ୍ୟର ସର୍ବନିମ୍ନ ସହାୟକ ମୂଲ୍ୟ(ଏମଏସପି)କୁ ଆଇନଗତ ମାନ୍ୟତା, ପ୍ରସ୍ତାବିତ କୃଷି ବିପଣନ ଏବଂ ରାଷ୍ଟ୍ରୀୟ ନୀତି ଢ଼ାଞ୍ଚା-୨୦୨୪କୁ ପ୍ରତ୍ୟାହାର, ମଣ୍ଡିରେ ସୁବ୍ୟବସ୍ଥା, କଟନୀଛଟନୀ ବନ୍ଦ, ଶୀତଳ ଭଣ୍ଡାର ନିର୍ମାଣ, କୃଷିକ୍ଷେତ୍ରରେ ବିଦ୍ୟୁତ ଦେୟ ଛାଡ଼ ଆଦି କୃଷି ଏବଂ କୃଷକଙ୍କ ସମସ୍ୟାକୁ ନେଇ ମହାପଞ୍ଚାୟତରେ ଆଲୋଚନା ହେବ। ଉକ୍ତ ମହାପଞ୍ଚାୟତରେ ସଂଯୁକ୍ତ କିସାନ ମୋର୍ଚ୍ଚାର କେନ୍ଦ୍ରୀୟ ନେତୃବୃନ୍ଦ ଯୋଗଦେବେ ଏବଂ ଏହି ସମସ୍ୟାର ସମାଧାନ ଦାବିରେ ପରବର୍ତ୍ତୀ ଆନ୍ଦୋଳନ ରୂପରେଖ ପ୍ରସ୍ତୁତ ହେବ ବୋଲି ବୈଠକରେ ସଙ୍ଗଠନର ଉପଦେଷ୍ଟା ରମେଶ ମହାପାତ୍ର ସୂଚନା ଦେଇଥିଲେ। ସଙ୍ଗଠନର ବିଜେପୁର ବ୍ଲକ ସଭାପତି ସୁବାସ ପ୍ରଧାନଙ୍କ ନେତୃତ୍ୱରେ ଅନୁଷ୍ଠିତ ଏହି ବୈଠକରେ ଗଙ୍ଗାଧର ମେହେର ମେଗା ଜଳସେଚନ ପ୍ରକଳ୍ପର ସମସ୍ୟା, ବିଦ୍ୟୁତ ସମସ୍ୟା, କୃଷିଋଣ, ସାର କଳାବଜାର ଆଦି ଉପରେ ମଧ୍ୟ ଆଲୋଚନା ହୋଇଥିଲା। ମହେନ୍ଦ୍ର ପ୍ରଧାନ, ବିନୋଦ ଚୌଧୁରୀ, ଲକ୍ଷପତି ନାଗ, ହେମଚନ୍ଦ୍ର ବିଶ୍ୱାଳ ଶଙ୍କର୍ଷଣ ବେହେରା, ଭିକାରୀ ମେହେର, ଦୁର୍ଗାପ୍ରସାଦ ଭୋଇ, କ୍ଷୀରୋଦ୍ର ପ୍ରଧାନ, କ୍ଷୀରସିନ୍ଧୁ ବଗର୍ତ୍ତୀ, ହରିବୋଲ ସାହୁ, ପ୍ରଶାନ୍ତ ଭୋଇ ପ୍ରମୁଖ ବୈଠକରେ ଉପସ୍ଥିତ ଥିଲେ।