ଜଳେଶ୍ୱର, ୧୦।୭(ରବିନାରାୟଣ ପାତ୍ର): ଚଳିତବର୍ଷ ଅଭାବୀ ବର୍ଷା ଯୋଗୁ ଖରିଫ ଧାନଚାଷ ଆଗେଇ ପାରିନାହିଁ। ଗତ ୩ମାସରେ ୭୩୪ ମି.ମି. ବର୍ଷା ହେବାକୁ ଥିବା ବେଳେ ଅଦ୍ୟାବଧି ୧୬୨ ମି.ମି.ବର୍ଷା ହୋଇଥିବା ସରକାରୀ ସୂତ୍ରରୁ ଜଣାପଡିଛି। ତେଣୁ ଲକ୍ଷ୍ୟଧାର୍ଯ୍ୟ ପୂରଣ ହେବା ଲାଗି ଆଶଙ୍କା ଦେଖାଦେଇଛି।
ସରକାରୀ ନୀତି ଅନୁଯାୟୀ ଖରିଫ ଧାନଚାଷ ଲାଗି ଗତ ମେ’ରେ ୧୨୮ ମି.ମି. ବର୍ଷା ଆବଶ୍ୟକ ଥିବା ବେଳେ ହୋଇଛି ମାତ୍ର ୨୮ ମି.ମି., ଜୁନ୍ରେ ୨୮୯ ମି.ମି. ବର୍ଷା ହେବାକୁ ଥିବା ବେଳେ ହୋଇଛି ୧୩୧ ମି.ମି. ଓ ଜୁଲାଇରେ ୩୧୭ ମି.ମି. ବର୍ଷା ହେବାକୁ ଥିବା ବେଳେ ଅଦ୍ୟାବଧି ମାତ୍ର ୩ ମି.ମି. ବର୍ଷା ହୋଇଥିବାରୁ ଚାଷୀମାନେ ଆଶା ଆଶଙ୍କାରେ ରହିଛନ୍ତି। ଜୁନରେ ସ୍ବଳ୍ପ ବୃଷ୍ଟି ହୋଇଥିଲେ ମଧ୍ୟ ଜୁଲାଇ ପ୍ରଥମ ସପ୍ତାହରେ ଭଲ ବର୍ଷା ହେବ ବୋଲି ଚାଷୀ ଆକଳନ କରିଥିଲେ। କିନ୍ତୁ ବର୍ଷା ହୋଇ ପାରି ନ ଥିବାରୁ ଜଳେଶ୍ୱର ବ୍ଲକ ଅଞ୍ଚଳରେ ଅଦ୍ୟାବଧି ମାତ୍ର ୮ଶହ ହେକ୍ଟର ଜମିରେ ତଳି ପଡିଛି। ଜଳସେଚନ ସୁବିଧା ଥିବା ସ୍ଥାନରେ ତଳି ପଡିଥିବା ବେଳେ ଅନ୍ୟ ସ୍ଥାନରେ ତଳି ପଡିପାରୁନାହିଁ। ଜୁନ ୧୦ ତାରିଖ ବେଳକୁ ମୌସୁମୀ ଓଡିଶାରେ ଦେଖାଦେଇଥାଏ। କିନ୍ତୁ ଜୁଲାଇ ୧୦ତାରିଖ ହେଲାଣି ମୌସୁମୀ ବାୟୁ ପ୍ରବାହିତ ହୋଇନାହିଁ। ଫଳରେ ଜଳେଶ୍ୱର ବ୍ଲକ ଅଞ୍ଚଳରେ ଚଳିତବର୍ଷ ୧୯୫୨୩ ହେକ୍ଟର ଜମିରେ ଧାନଚାଷ ହେବାଲାଗି ଜିଲା କୃଷି ବିଭାଗ ଆକଳନ କରିଥିବା ବେଳେ ସେଥିଲାଗି ଆବଶ୍ୟକ ତଳି ପଡିପାରିନାହିଁ। ମୋଟ ୨୦୧୫ ହେକ୍ଟର ଜମିରେ ତଳି ପଡିବାକୁ ଥିବା ବେଳେ ଅଧାଅଧି ସ୍ଥାନରେ ତଳି ପଡିପାରି ନ ଥିବା କୃଷି ବିଭାଗ ଆକଳନ କରିଛି। ବର୍ଷା ହୋଇ ନ ଥିବାରୁ ଗଡିଆ, ପୋଖରୀ, ଖାଳ, ନାଳ ଏପରିକି ସୁବର୍ଣ୍ଣରେଖା ନଦୀ ମଧ୍ୟ ଶୁଖିଲା ପଡିଛି। ବର୍ଷା ନ ଥିବାରୁ ସମଗ୍ର ଅଞ୍ଚଳରେ ଗୋରୁ ବିଲରେ ଚରୁଛନ୍ତି। ତେଣୁ ତଳି ପକାଇବା ଲାଗି ଉଠା ଜଳସେଚନ ବିଭାଗର ସମସ୍ତ ପାଣି ପଞ୍ଚାୟତ ଓ ସରକାରୀ ଭାବେ ଉଠା ଜଳସେଚନ ପ୍ରକଳ୍ପ ଚାଲୁ କରିବା ଲାଗି ସାଧାରଣରେ ଦାବି ହେଉଛି।