କଣାସ,୨୧ା୮(ବିଭୂତି ଭୂଷଣ ତ୍ରିପାଠୀ):ପୁରୀ ଜିଲା ସତ୍ୟବାଦୀସ୍ଥିତ ଉତ୍କଳମଣି ଗୋପବନ୍ଧୁ ସ୍ମୃତି ମହାବିଦ୍ୟାଳୟ (ୟୁଜିଏସ୍ଏମ୍) ଖେଳ ପଡ଼ିଆରେ ଶନିବାର ଅନୁଷ୍ଠିତ ଏକ ସମାବେଶରେ ୫-ଟି ସଚିବ ଭି.କେ.ପାଣ୍ଡିଆନ ଯୋଗଦେବାକୁ ଯାଉଥିବା ବେଳେ ଜଣେ ବ୍ୟକ୍ତି ତାଙ୍କ ଉପରକୁ କାଳିମାଡ଼ କରିଥିଲେ। କାଳିମାଡ଼ କରିଥିବା କଣାସ ବ୍ଲକ ଅନ୍ତର୍ଗତ ହରିପୁର ଗ୍ରାମର ଭାସ୍କର ଚନ୍ଦ୍ର ସାହୁଙ୍କୁ ପୋଲିସ ନିଜ ହେପାଜତକୁ ନେବା ସହିତ ପଚରାଉଚରା କରିଥିଲା। ପରେ ବ୍ୟକ୍ତିଗତ ମୁଚାଲିକାରେ ପୋଲିସ ଭାସ୍କରଙ୍କୁ ଛାଡ଼ିଦେଇଛି।
ଏ ସମ୍ପର୍କରେ ଭାସ୍କର କହିଛନ୍ତି, ଦୟା ନଦୀକୁ ଗଙ୍ଗୁଆ ନାଳ ମାଧ୍ୟମରେ ବିଷାକ୍ତ ଜଳକୁ ନ ଛାଡିବା ପାଇଁ ଭୁବନେଶ୍ୱର ମହାନିଗମ ଅଧିକାରୀ, ଡେଲାଙ୍ଗ ଓ କଣାସ ବ୍ଲକରେ ହୋଇଥିବା ଜିଲାପାଳଙ୍କ ଅଭିଯୋଗ ଶୁଣାଣି ଶିବିରରେ ପୃଥକ ଭାବେ ଦାବିପତ୍ର ଦେଇଥିଲି। ଏପରିକି ସତ୍ୟବାଦୀ ବିଧାୟକଙ୍କୁ ମଧ୍ୟ ଦାବି ଜଣାଇଥିଲି। ସେହିପରି ଅଡାଲଠାରୁ ହରିପୁର ସରସ୍ବତୀ ନଗର ପର୍ଯ୍ୟନ୍ତ ଯାଇଥିବା ମକରା ନଦୀ ବନ୍ଧ ଜଳସେଚନ ବିଭାଗର ହୋଇଥିବାରୁ ତାକୁ ଗ୍ରାମ୍ୟ ଉନ୍ନୟନ ବିଭାଗକୁ ହସ୍ତାନ୍ତର କରି ରାସ୍ତା କାମ କରିବା ଓ ଜଳିଆପଡାଠାରେ ପ୍ରତିଷ୍ଠିତ ବିଦ୍ୟୁତ୍ ସବ୍ଷ୍ଟେଶନକୁ ତୁରନ୍ତ କାର୍ଯ୍ୟକ୍ଷମ କରିବା ପାଇଁ ବିଧାୟକ ଏବଂ ଜନଶୁଣାଣି ଶିବିରରେ ଜିଲାପାଳଙ୍କୁ ଦାବିପତ୍ର ପ୍ରଦାନ କରିଥିଲି। ତେବେ ଏହା ଉପରେ କୌଣସି ପଦକ୍ଷେପ ନ ନିଆଯିବାରୁ ଅସନ୍ତୋଷ ପ୍ରକାଶ କରି ୫-ଟି ସଚିବଙ୍କ ଉପରକୁ କାଳିପକାଇଥିଲି। କୌଣସି ରାଜନୈତିକ ପ୍ରରୋଚନାରେ ଏହା କରିନାହିଁ। ୫-ଟି ସଚିବ ସମସ୍ୟା ବୁଝି ଛାଡ଼ିଦେଇଥିବାରୁ ସାଧୁବାଦ ଜଣାଉଛି ବୋଲି ସେ ପ୍ରକାଶ କରିଛନ୍ତି।