ଅହମ୍ମଦାବାଦ,୭।୨: ଆଇପିଏଲରେ ୨୦୭ ମ୍ୟାଚ୍ରେ ଅନେକ ସଫଳତା ବିଫଳତା ଦେଖିଥିବା ବିରାଟ କୋହଲିଙ୍କୁ ୨୦୧୬ ସିଜନ ଫାଇନାଲରେ ମିଳିଥିବା ପରାଜୟ ଆଜି ବି ବାଧୁଛି। ପୂର୍ବରୁ ଦୁଇ ଥର (୨୦୦୯ ଓ ୨୦୧୧) ଫାଇନାଲରେ ପହଞ୍ଚିଥିବା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ସାମ୍ନାରେ ଥିଲା ସନରାଇଜର୍ସ ହାଇଦ୍ରାବାଦ। ଘରୋଇ ଏମ୍. ଚିନ୍ନାସ୍ବାମୀ ଷ୍ଟାଡିୟମରେ ଖେଳାଯାଇଥିବା ଫାଇନାଲରେ ହାଇଦ୍ରାବାଦ ପକ୍ଷରୁ ଧାର୍ଯ୍ୟ ୨୦୯ ରନ୍ର ବିଜୟଲକ୍ଷ୍ୟ ନେଇ ଓହ୍ଲାଇଥିଲା ଆର୍ସିବି ୧୦ ଓଭରରେ ବିନା କ୍ଷତିରେ ୧୧୪ ରନ୍ କରିଥିଲା। ଏହାସତ୍ତ୍ୱେ ବାଙ୍ଗାଲୋର ଅଲଆଉଟ୍ ହୋଇଯାଇଥିଲା ୨୦୦ ରନ୍ରେ।
“ସେହି ମ୍ୟାଚ୍ର ଭାଗ୍ୟ ପୂର୍ବରୁ ଲେଖାଯାଇଥିବା ଭଳି ଅନୁଭବ ହୁଏ। ଫାଇନାଲ ବାଙ୍ଗାଲୋରରେ ଖେଳାଯାଇଥିଲା। ପୂରା ସିଜନରେ ଆମେ ଯେଉଁଭଳି ଖେଳିଥିଲୁ, ପରାଜୟ ହଜମ କରିବା ସହଜ ନୁହେଁ। ଏହା ଆମ ଦିନ ନ ଥିଲା ବୋଲି ମୁଁ କହିପାରିବି ନାହିଁ। ସେହି ଗୋଟିଏ ମ୍ୟାଚ୍, ମୋତେ ବାଧିଲା ଭଳି ଅନୁଭବ ହୁଏ। ଆମେ ପାଖରେ ଆଇପିଏଲ ଟ୍ରଫି ଜିତିବାର ସୁବର୍ଣ୍ଣ ସୁଯୋଗ ଥିଲା। ମାତ୍ର ପ୍ରତିପକ୍ଷ ଦଳର ଖେଳାଳିମାନେ ସେହି ଦିନ ଆମଠାରୁ ଭଲ ପ୍ରଦର୍ଶନ କରିଥିଲେ। ନିର୍ଣ୍ଣାୟକ ମୁହୂର୍ତ୍ତରେ ମ୍ୟାଚ୍ ସେମାନଙ୍କ ହାତକୁ ଚାଲି ଯାଇଥିଲା। ଏହି ମ୍ୟାଚ୍ ପାଇଁ ଲୋକେଶ ରାହୁଲ ମଧ୍ୟ ଦୁଃଖିତ। ସେହି ସିଜନ ପରେ ତାଙ୍କ କ୍ୟାରିୟର ବଦଳି ଯାଇଥିବା ସେ ସ୍ବୀକାର କରନ୍ତି” ବୋଲି କୋହଲି ଆର୍ସିବି ପୋଷ୍ଟକାଷ୍ଟରେ କହିଛନ୍ତି।