ଟୋକିଓ,୨୨।୭(ଏପି): ଅଷ୍ଟ୍ରେଲିଆର ପୂର୍ବ ଉପକୂଳବର୍ତ୍ତୀ ସହର ବ୍ରିସ୍ବେନ୍ରେ ଆୟୋଜନ ହେବ ୨୦୩୨ ଅଲିମ୍ପିକ୍ସ। ଏ ନେଇ ବୁଧବାର ଆନୁଷ୍ଠାନିକ ଭାବେ ଘୋଷଣା କରାଯାଇଛି। ଆୟୋଜନ ଦୌଡ଼ରେ ଆଉ କୌଣସି ସହର ସାମିଲ ନ ଥିଲେ। ଆଉ କୌଣସି ସହର ଏହି ଅଲିମ୍ପିକ୍ସ ଆୟୋଜନ କରିବାକୁ ବିଡ୍ ଦାଖଲ କରି ନ ଥିଲେ। ଫଳରେ ନିର୍ଦ୍ୱନ୍ଦ୍ୱରେ ବ୍ରିସ୍ବେନ୍କୁ ଆୟୋଜନ ଅଧିକାର ମିଳିଛି।
ଫଳରେ ଦୀର୍ଘ ୩୨ ବର୍ଷ ପରେ ଅଷ୍ଟ୍ରେଲିଆକୁ ଅଲିମ୍ପିକ ଫେରିବା ନିଶ୍ଚିତ ହୋଇଛି। ଏହାପୂର୍ବରୁ ୨୦୦୦ରେ ସିଡ୍ନୀରେ ଓ ୧୯୫୬ରେ ମେଲବୋର୍ନରେ ଅଲିମ୍ପିକ୍ସ ସଫଳତାର ସହ ଆୟୋଜିତ ହୋଇଥିଲା। ସଫଳାତର ସହ ଅଲିମ୍ପିକ୍ସ କିପରି ଆୟୋଜନ କରିବାକୁ ହୁଏ ତାହା ଆମକୁ ଭଲଭାବେ ଜଣା ବୋଲି ନିଜ ଅଫିସରୁ ୧୧ ମିନିଟର ଲାଇଭ ଭିଡିଓ ଲିଙ୍କ୍ରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ ମୋରିସନ କହିଛନ୍ତି। ଆୟୋଜନ ଅଧିକାର ପାଇଁ ହୋଇଥିବା ମତଦାନରେ ବ୍ରିସ୍ବେନ୍ ୭୨-୫ ଭୋଟ ବ୍ୟବଧାନରେ ବିଜୟୀ ହୋଇଥିଲା। ଏହାପରେ ମୋରିସନ ଦୁଇ ହାତ ଉପରକୁ ଉଠାଇବା ସହ ଦୁଇ ବୁଢା ଆଙ୍ଗୁଠି ଉଠାଇ ଥମ୍ବ୍ସ ଅପ୍ କରି ଖୁସି ଜାହିର କରିଥିଲେ। ଏଥିପାଇ ବ୍ରିସ୍ବେନ୍ରେ ଜବରଦସ୍ତ ଆତସବାଜି ଦେଖିବାକୁ ମିଳିଥିଲା। ଟୋକିଓସ୍ଥିତ ଏକ ପଞ୍ଚତାରକା ହୋଟେଲରେ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ସଦସ୍ୟମାନଙ୍କୁ ଏହାର ଲାଇଭ୍ ପ୍ରସାରଣ ଦେଖାଯାଇଥିଲା।
୨୦୨୮ ଅଲିମ୍ପିକ୍ସ ଆମେରିକାର ଲସ୍ ଏଞ୍ଜେଲେସ୍ରେ ଆୟୋଜନ ହେବ। ତେଣୁ ଅଲିମ୍ପିକ୍ସ ପ୍ରସ୍ତୁତି ପାଇଁ ବ୍ରିସ୍ବେନ୍ ୧୧ ବର୍ଷ ଉପଲବ୍ଧ ହେବ। ସେହିପରି ୨୦୨୪ ଅଲିମ୍ପିକ୍ସ ପ୍ୟାରିସ୍ରେ ଆୟୋଜନ ହେବ। ଗତ ଫେବୃୟାରୀରେ ବ୍ରିସ୍ବେନ୍କୁ ଆଇଓସି ଏକ୍ସକ୍ଲୁସିଭ ନିଗୋସିଏଟିଂ ରାଇଟ୍ ପ୍ରଦାନ କରିଥିଲା। ଅଲିମ୍ପିକ ଆୟୋଜନ ପାଇଁ ବ୍ରିସ୍ବେନ୍ରେ କେତେକ ବିଶ୍ୱସ୍ତରୀୟ ଭିତ୍ତିଭୂମି ରହିଛି ଓ ଆଉ କେତେକ ନିର୍ମାଣ ହେବ। ବ୍ରିସ୍ବେନ୍ର ଜଣାଶୁଣା ଗାବା ଷ୍ଟାଡିୟମରେ ମଧ୍ୟ କେତୋଟି ଅଲିମ୍ପିକ୍ସ ଇଭେଣ୍ଟ ଆୟୋଜନ ହୋଇପାରିବ। ୧୯୦୦ ପ୍ୟାରିସ ଅଲିମ୍ପିକ୍ସରେ କ୍ରିକେଟ ଖେଳାଯାଇଥିଲା। ଅଲିମ୍ପିକ୍ସର ଗତ ସଂସ୍କରଣ ବ୍ରାଜିଲର ରିଓ ଡି ଜେନିରୋରେ ଆୟୋଜନ ହୋଇଥିଲା। ବର୍ତ୍ତମାନ ବ୍ରିସ୍ବେନ୍ରେ ୮୪ ପ୍ରତିଶତ ଷ୍ଟାଡିୟମ ରହିଛି। ତେଣୁ ଅଲିମ୍ପିକ୍ସ ପାଇଁ ଭିତ୍ତିଭୂମିର ବିକାଶ ନେଇ ସେତେଟା ସମସ୍ୟା ରହିବ ନାହିଁ। କୋଟି କୋଟି ଟଙ୍କା ଖର୍ଚ୍ଚ କରାଯାଇ ଏକ ନୂଆ ସୁଇମିଂ ଏରିନା ନିର୍ମାଣ କରିବାକୁ ଯୋଜନା କରାଯାଇଛି। ସେହିପରି ଗମନାଗମନ କ୍ଷେତ୍ରରେ ମଧ୍ୟ ବିକାଶର ଆବଶ୍ୟକତା ରହିଛି ବୋଲି କୁହାଯାଇଛି।
