ଢେଙ୍କାନାଳ ଅଫିସ୍,୧୭ା୩: ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କାଣ୍ଡବିନ୍ଧା ଗ୍ରାମରେ ଖେଳପଡ଼ିଆ ପାଇଁ ଉଦ୍ଦିଷ୍ଟ ସରକାରୀ ଜାଗା ଜବରଦଖଲ ମୁକ୍ତ ହୋଇଛି। ଦୀର୍ଘ ୨୭ବର୍ଷ ଧରି ସେହି ଜମିକୁ କେତେଜଣ ବେଆଇନ ଭାବେ ମାଡ଼ିବସିଥିବାବେଳେ ବୁଧବାର ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଜିଲା ପ୍ରଶାସନ ପକ୍ଷରୁ ସେଠାରେ ଜେସିବି ବୁଲିଛି। ଉକ୍ତ ସରକାରୀ ଜମିରେ ରହୁଥିବା ୧୦ ପରିବାରକୁ ଉଚ୍ଛେଦ କରାଯାଇଛି। ଅନ୍ୟପଟେ ଥଇଥାନ ବ୍ୟବସ୍ଥା କରାଯାଇ ନ ଥିବାରୁ ଏହାକୁ ନେଇ ଚାପା ଉତ୍ତେଜନା ପ୍ରକାଶ ପାଇଥିଲା।
ପ୍ରଶାସନ ପକ୍ଷରୁ ମିଳିଥିବା ସୂଚନା ଅନୁଯାୟୀ, ୧୯୯୫ରୁ ଉକ୍ତ ସରକାରୀ ଜମି ଜବରଦଖଲରେ ଥିଲା। ଏ ସମ୍ପର୍କରେ ହାଇକୋର୍ଟରେ ଜନସ୍ବାର୍ଥ ମାମଲା ରୁଜୁ କରାଯାଇଥିଲା। ଖେଳପଡ଼ିଆ ନିମନ୍ତେ ଉକ୍ତ ସରକାରୀ ଜମିରୁ ଜବରଦଖଲ ହଟାଇବା ଲାଗି ଅଦାଲତ ନିର୍ଦ୍ଦେଶ ଦେଇଥିଲେ। ତହସିଲଦାର ବାଣୀ ନିବେଦିତା ସ୍ବାଇଁ, ନିର୍ବାହୀ ମାଜିଷ୍ଟ୍ରେଟ୍ ତଥା ଡେପୁଟି କଲେକ୍ଟର ପ୍ରମୋଦ କୁମାର ଦଳବେହେରା, ସଦର ଥାନାଧିକାରୀ ଅଭିନବ ଡାଳୁଆ ପୋଲିସ ଫୋର୍ସ ସହିତ ଉପସ୍ଥିତ ରହି ଜେସିବି ମେଶିନ ସହାୟତାରେ କୋଠାଗୁଡ଼ିକୁ ଭାଙ୍ଗିଥିଲେ।
ଏ ସମ୍ପର୍କରେ ତହସିଲଦାର କୁହନ୍ତି, କାଣ୍ଡବିନ୍ଧା ରାଜସ୍ବ ମୌଜାର ସଂରକ୍ଷିତ ଖେଳପଡ଼ିଆ ଜମିରେ ବେଆଇନ ଭାବେ ଜବରଦଖଲ କରାଯାଇ ଘର ନିର୍ମାଣ ହୋଇଥିଲା। ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶକ୍ରମେ ଜବରଦଖଲ ଉଚ୍ଛେଦ କରାଯାଇଛି। ଏଥିପୂର୍ବରୁ ସେଠାରେ ରହୁଥିବା ପରିବାରକୁ ନୋଟିସ୍ କରାଯାଇଥିଲା। ଥଇଥାନ ସମ୍ପର୍କରେ ତହସିଲଦାର କୁହନ୍ତି, ସମ୍ପୃକ୍ତ ବ୍ୟକ୍ତିମାନଙ୍କ ନିଜସ୍ବ ଜମି ରହିଛି। ସେମାନେ ନିଜ ଜମିରେ ଘର କରି ରହିପାରିବେ।