ଅନୁଗୋଳ ଅଫିସ, ୨୩।୫: ଅନୁଗୋଳ ପୌର ପରିଷଦର ପ୍ରଥମ ବୈଠକ ଏପ୍ରିଲ ୨୨ରେ ଅନୁଷ୍ଠିତ ହୋଇଥିଲା। ଇତିମଧ୍ୟରେ ବୈଠକକୁ ମାସେ ପୂରିଗଲାଣି। ହେଲେ ନିୟମ ଅନୁଯାୟୀ ୩ ଦିନ ପରେ ବାହାରିବାକୁ ଥିବା ରିଜୋଲ୍ୟୁଶନ ଏଯାଏ ହୋଇପାରି ନାହିଁ। ଫଳରେ ସହରର ଉନ୍ନୟନ କାର୍ଯ୍ୟକୁ ନେଇ ପୌରାଞ୍ଚଳବାସିନ୍ଦାଙ୍କ ମନରେ ନାନା ଆଶଙ୍କା ସୃଷ୍ଟି ହୋଇଛି।
ପୌରପାଳିକା ନିୟମ ଅନୁଯାୟୀ ପୌର ପରିଷଦ ବୈଠକର ୩ ଦିନ ମଧ୍ୟରେ ରିଜୋଲ୍ୟୁଶନ ବାହାରିବା କଥା। କିନ୍ତୁ ଅନୁଗୋଳ ପୌରପାଳିକାରେ ଏ ନେଇ ବ୍ୟତିକ୍ରମ ଦେଖିବାକୁ ମିଳିଛି। ୩୦ ଦିନ ପରେ ମଧ୍ୟ ଉକ୍ତ ରିଜୋଲ୍ୟୁଶନ ବାହାରିପାରି ନାହିଁ। ପୌର ପରିଷଦର ପ୍ରଥମ ବୈଠକରେ ପୂର୍ବରୁ ହୋଇଥିବା ୬୦ଟି ଟେଣ୍ଡରକୁ ନେଇ ତୁମ୍ବିତୋଫାନ ହୋଇଥିଲା। ଏହାକୁ ବାତିଲ କରିବାକୁ ଦାବି କରାଯାଇଥିଲା। ସେହିପରି ୨୧ଟି ଅଙ୍ଗନୱାଡ଼ିର ନିଜସ୍ବ ଗୃହ ଓ ୱାଟର ଏଟିଏମ୍ ସମ୍ପର୍କରେ ଆଲୋଚନା କରାଯାଇଥିଲା। ଅଚଳ ହୋଇଯାଇଥିବା ପାନୀୟ ଜଳ ପ୍ରକଳ୍ପକୁ କାର୍ଯ୍ୟକାରୀ କରିବାକୁ ବୈଠକରେ ନିଷ୍ପତ୍ତି ହୋଇଥିଲା। ସରକାରଙ୍କ ପକ୍ଷରୁ ସହରାଞ୍ଚଳରେ ଚାଲିଥିବା ଉନ୍ନୟନ କାର୍ଯ୍ୟ ସମ୍ପର୍କରେ ଆଲୋଚନା କରାଯାଇଥିଲା। ଏହି ବୈଠକ ସରିବା ପରେ ୩ ଦିନ ମଧ୍ୟରେ ତୁରନ୍ତ ରିଜୋଲ୍ୟୁଶନ ପ୍ରସ୍ତୁତ କରାଯାଇ ଜିଲାପାଳ, ରାଜ୍ୟ ସରକାର ଓ କାଉନସିଲରଙ୍କୁ ପ୍ରଦାନ କରାଯିବା କଥା। କିନ୍ତୁ ଅନୁଗୋଳ ପୌର ପରିଷଦରେ ୩୦ ଦିନ ହେବ ରିଜୋଲ୍ୟୁଶନ ଲେଖା ଚାଲୁଛି। ଏହା କେବେ ସରିବ, ତାହା କହିବା ମୁସ୍କିଲ। ଏ ନେଇ କେତେଜଣ କାଉନସିଲରଙ୍କ ସହ ସହରବାସୀ ଅସନ୍ତୋଷ ପ୍ରକାଶ କରିଛନ୍ତି। ସେମାନେ କହିଛନ୍ତି, ଓଡ଼ିଶା ପୌରପାଳିକା ସେକ୍ସନ୍ ୭୧ରେ ଉଲ୍ଲେଖ ରହିଛି କି, ବୈଠକର ୩ ଦିନ ମଧ୍ୟରେ ରିଜୋଲ୍ୟୁଶନ ବାହାର କରାଯାଇ ଜିଲାପାଳ, କାଉନସିଲର ଓ ରାଜ୍ୟସରକାରଙ୍କ ନିକଟକୁ ପଠାଯିବ। ଏହାପରେ ଉକ୍ତ ରିଜୋଲ୍ୟୁଶନ ପୌର ନିର୍ବାହୀ ଅଧିକାରୀଙ୍କ ଅଧୀନରେ ରହିବ। କିନ୍ତୁ ଏଯାଏ ପୌରାଧ୍ୟକ୍ଷ ତାହା ପ୍ରଦାନ କରି ନ ଥିବାରୁ ଆଗାମୀ ଦିନରେ ଏହାକୁ ନେଇ ପୌର ପରିଷଦରେ ବିବାଦ ଉପୁଜିବାର ଆଶଙ୍କା କରାଯାଉଛି।