ସୋନପୁର,୯।୪(ନି.ପ୍ର.): ସୁବର୍ଣ୍ଣପୁର ଜିଲାର ୩ଟି ସ୍ଥାନରେ ଥିବା ପଥକର ଫାଟକ(ଟୋଲ ଗେଟ୍)ରୁ ଦୀର୍ଘ ବର୍ଷ ଧରି ଟିକସ ଆଦାୟ ହେଉଛି। ବ୍ରିଜ୍ ନିର୍ମାଣର ଖର୍ଚ୍ଚ ବାହାରି ସାରିଥିଲେ ମଧ୍ୟ ସରକାର ଟୋଲଗେଟ୍ଗୁଡିକୁ ବନ୍ଦ କରୁନାହାନ୍ତି। ବିଧାନସଭାରେ ପ୍ରଶ୍ନ ପଚାରିଲେ ମଧ୍ୟ ସ୍ପଷ୍ଟ ଉତ୍ତର ମିଳୁନି। ସାଧାରଣରେ ଏଥିନେଇ ପ୍ରବଳ ଅସନ୍ତୋଷ ଦେଖା ଦେଇଥିଲା ବେଳେ ରାଜନେତା ଓ ପ୍ରଶାସନ ଅସହାୟ ହୋଇ ପଡିଛନ୍ତି।
ସୋନପୁର-ବିନିକା-ଡୁଙ୍ଗୁରିପାଲି ରାସ୍ତାର ଘୋଡାଧାରଠାରେ ଅଙ୍ଗନଦୀ ଉପରେ ୩୦ବର୍ଷ ପୂର୍ବରୁ ବ୍ରିଜ୍ ନିର୍ମାଣ ହୋଇଛି। ସେହି ଦିନଠାରୁ ଓଡିଶା ବ୍ରିଜ୍ ନିର୍ମାଣ ସଂସ୍ଥା ପକ୍ଷରୁ ପ୍ରତ୍ୟେକ ବର୍ଷ ଟେଣ୍ଡର କରାଯାଇ ଟୋଲ ଟିକସ ଆଦାୟ କରାଯାଉଛି। ବ୍ରିଜ୍ ନିର୍ମାଣରେ ସେତେବେଳେ ୩କୋଟି ଟଙ୍କା ବ୍ୟୟ ହୋଇଥିଲା। ବର୍ତ୍ତମାନ ସୁଦ୍ଧା ଟୋଲ ଟିକସରୁ ୯ କୋଟିରୁ ଊର୍ଦ୍ଧ୍ୱ ଟଙ୍କା ଆଦାୟ ସରିଲାଣି। ତଥାପି ମହାସୁଲ ଫାଟକ ବନ୍ଦ ହେଉନି। ଏହି ରାସ୍ତା ଦେଇ ଯାତାୟତ କରୁଥିବା ଯାନବାହାନରୁ ଯଥାରୀତି ଟିକସ ଆଦାୟ ଚାଲିଛି। ସୁବର୍ଣ୍ଣପୁର ଓ ବୌଦ୍ଧ ଜିଲାର ଅଧିବାସୀ ବୁର୍ଲା ଡାକ୍ତରଖାନାକୁ ଚିକିତ୍ସା ପାଇଁ ଚାରିଚକିଆ ଯାନରେ ଯିବା ଆସିବା ସମୟରେ ଅଯଥା ଖର୍ଚ୍ଚାନ୍ତ ହେଉଛନ୍ତି। ଫାଟକରେ ଅଯଥା ଭିଡ ପାଇଁ ରୋଗୀ ଓ ପରିଜନ ଅଯଥା ହଇରାଣ ହେଉଛନ୍ତି। ଅନ୍ୟପକ୍ଷେ ବ୍ରିଜ୍ ମରାମତି ଆବଶ୍ୟକ କରୁଥିବା ବେଳେ ସେଥିପ୍ରତି କାହାରି ଦୃଷ୍ଟି ନାହିଁ।
ସେହିପରି ସୋନପୁର ନିକଟରେ ମହାନଦୀ ଉପରେ ବ୍ରିଜ୍ ନିର୍ମାଣ ହୋଇଛି। ବ୍ରିଜ୍ ପ୍ରାୟ ୨୦ବର୍ଷ ପୂର୍ବରୁ ଉଦ୍ଘାଟନ ହେଲାଣି। କିନ୍ତୁ ହିକୁଡି ଛକରେ ଯାନବାହାନ ନିକଟରୁ ମାହାସୁଲ ଆଦାୟ କରାଯାଉଛି। ଏହି ମୁଖ୍ୟ ରାସ୍ତାଦେଇ ଦୈନିକ ଶତାଧିକ ଯାନବାହାନ ସମ୍ବଲପୁର, ବୁର୍ଲା ଓ ବୀରମହାରାଜପୁରକୁ ଯିବା ଆସିବା କରୁଛି । ଆଶ୍ଚର୍ଯ୍ୟର ବିଷୟ ସୋନପୁର ବ୍ରିଜ୍ ସହିତ ବୌଦ୍ଧ ଜିଲାର ବୌଦ୍ଧ-ଟିଆକଟା ବ୍ରିଜ୍ କାର୍ଯ୍ୟ ସମାନ ସମୟରେ ସରିଥିଲା। ବୌଦ୍ଧରେ ମହାସୁଲ ଅସୁଲି ଅନେକ ବର୍ଷ ତଳୁ ବନ୍ଦ ହୋଇଛି। ମାତ୍ର ସୋନପୁର ହିକୁଡିରେ ଟିକସ ଆଦାୟ ବନ୍ଦ ହେଉନି।
ବୀରମହାରାଜପୁର ବ୍ଲକର ସୁବଳୟାଠାରେ ସୁରୁବାଲି ଯୋରରେ ପ୍ରାୟ ୨୬ ବର୍ଷ ପୂର୍ବରୁ ବ୍ରିଜ୍ ନିର୍ମାଣ ହୋଇଛି। ଏହି ରାସ୍ତା ଦେଇ ଲୋକେ ମୁର୍ଷୁଣ୍ଡି, ବୀରମହାରାଜପୁର, ରେଢାଖୋଲ ଓ ବୌଦ୍ଧକୁ ଯିବା ଆସିବା କରିବା ସମୟରେ ଟିକସ ଦେବାକୁ ପଡୁଛି। ଜିଲାର କେତେକ ସଚେତନ ନାଗରିକ ଉପରୋକ୍ତ ବ୍ରିଜ୍ ରାସ୍ତାରେ ମାହାସୁଲ ଫାଟକ ବନ୍ଦ କରିବାକୁ ପ୍ରାକ୍ତନ ଜିଲାପାଳଙ୍କ ନିକଟରେ ଲିଖିତ ଦାବି କରିଥିଲେ। କିନ୍ତୁ କୌଣସି ସୁଫଳ ମିଳିଲାନି। ୨୦୨୨ରେ ବୀରମହାରାଜପୁର ବିଧାୟକ ପଦ୍ମନାଭ ବେହେରା ଏ ସମ୍ପର୍କରେ ଓଡିଶା ବିଧାନସଭାରେ ପ୍ରଶ୍ନ ପଚାରି ଥିଲେ। ଦୀର୍ଘବର୍ଷ ଧରି ଟିକସ ଆଦାୟ କରାଯିବା ନେଇ ବିଧାୟକ ଉଦ୍ବେଗ ପ୍ରକାଶ କରିଥିଲେ। ତଥ୍ୟ ସଂଗ୍ରହ ପରେ ଆବଶ୍ୟକ ପଦକ୍ଷେପ ନିଆଯିବ ବୋଲି ବିଭାଗୀୟ ମନ୍ତ୍ରୀ ସେତେବେଳେ ପ୍ରତିଶ୍ରୁତି ଦେଇଥିଲ୍ରେ। ମାତ୍ର କୌଣସି କାର୍ଯ୍ୟାନୁଷ୍ଠାନ ନିଆଗଲାନି। ଅନ୍ୟପକ୍ଷେ ବ୍ରିଜ୍ ନିର୍ମାଣ ସମ୍ପର୍କିତ କୌଣସି ଫାଇଲ ସୁବର୍ଣ୍ଣପୁର ଓ ବଲାଙ୍ଗୀର ପୂର୍ତ୍ତ ବିଭାଗ କାର୍ଯ୍ୟାଳୟରୁ ମିଳୁନି। ବ୍ରିଜ୍ ନିର୍ମାଣ ସମୟରେ ସମ୍ବଲପୁରରେ ବ୍ରିଜ୍ ଡିଭିଜନ କାର୍ଯ୍ୟାଳୟ ଥିଲା। ଏଭଳି ସ୍ଥିତିରେ ରାଜ୍ୟ ସରକାର ଫାଟକ ବନ୍ଦ କରୁନାହାନ୍ତି। ଲୋକେ ଟିକସ ଦେଉଥିବା ବେଳେ ଜିଲାର ରାଜନେତା ଓ ପ୍ରଶାସନ ଅସହାୟ ଅବସ୍ଥାରେ ଅଛନ୍ତି ।