ଭୁବନେଶ୍ୱର,୭ା୧(ବ୍ୟୁରୋ): ରାଜ୍ୟର ଦୁର୍ଗମ ତଥା ଆଭ୍ୟନ୍ତରୀଣ ଗ୍ରାମରେ ଇଣ୍ଟରନେଟ୍ ସେବା ମଜଭୁତ୍ କରିବା ଲାଗି କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ଗୁରୁବାର ୧୦ ଆକାଂକ୍ଷୀ ଜିଲାର ୩,୯୩୩ ଗ୍ରାମରେ ୪-ଜି ସଂଯୋଗୀକରଣ ପାଇଁ ନୂତନ ମୋବାଇଲ୍ ଟାୱାର ସ୍ଥାପନ କରିବାକୁ ଘୋଷଣା କରିଛନ୍ତି। ଆନ୍ଧ୍ରପ୍ରଦେଶ, ଛତିଶଗଡ଼, ଝାଡ଼ଖଣ୍ଡ, ମହାରାଷ୍ଟ୍ର ଏବଂ ଓଡ଼ିଶାର ମୋଟ ୪୪ ଆକାଂକ୍ଷୀ ଜିଲାର ୭,୨୮୭ ଗ୍ରାମରେ ୪-ଜି ମୋବାଇଲ ସେବା ଉପଲବ୍ଧ ହେବ। ଏହା କାର୍ଯ୍ୟକାରୀ ହେଲେ ଦୁର୍ଗମାଞ୍ଚଳବାସୀ ବେତାର ଯୋଗାଯୋଗ କ୍ଷେତ୍ରରେ ଉପକୃତ ହେବ।
ଓଡ଼ିଶାର ୧୦ ଆକାଂକ୍ଷୀ ଜିଲା ବଲାଙ୍ଗୀର, ଢେଙ୍କାନାଳ, ଗଜପତି, କଳାହାଣ୍ଡି, କନ୍ଧମାଳ, କୋରାପୁଟ, ମାଲକାନଗିରି, ନୂଆପଡ଼ା, ରାୟଗଡ଼ା ଏବଂ ନବରଙ୍ଗପୁରର ୩,୯୩୩ ଅସଂଯୋଗୀ ଗ୍ରାମରେ ମୋବାଇଲ୍ ଟାୱାର ସ୍ଥାପନ କରାଯିବ। ଏହି ପ୍ରକଳ୍ପରେ ୩,୨୧୯ କୋଟି ଟଙ୍କାର ବ୍ୟୟ ଅଟକଳ କରାଯାଇଛି। ଓଡ଼ିଶାର ବାମପନ୍ଥୀ ମାଓବାଦୀପ୍ରବଣ ୯ ଜିଲାରେ ୪୨୧.୬୬ କୋଟି ଟଙ୍କା ବ୍ୟୟରେ ୪୮୩ ମୋବାଇଲ ଟାୱାର ସ୍ଥାପନ କାର୍ଯ୍ୟ ଚାଲିଛି। ଏହି କାର୍ଯ୍ୟ ମାର୍ଚ୍ଚ ୨୦୨୩ ସୁଦ୍ଧା ସରିବ। ସେହିପରି ୧୧ ଜିଲାରେ ୨୭୨ ନୂଆ ଡାକଘର ଖୋଲିବ। ଅଦ୍ୟାବଧି ୧୨୮ ଡାକଘର କାର୍ଯ୍ୟକ୍ଷମ ହୋଇସାରିଥିବାବେଳେ ଅବଶିଷ୍ଟ ୧୪୪ଟି ଚଳିତବର୍ଷ ମାର୍ଚ୍ଚ ଶେଷ ସୁଦ୍ଧା ଆରମ୍ଭ ହେବ। ସମସ୍ତ ଡାକଘରେ ୫୪୪ ବେକାର ଯୁବତୀଯୁବକଙ୍କୁ ନିଯୁକ୍ତି ପ୍ରଦାନ କରାଯିବ ବୋଲି ସୂଚନା ଦିଆଯାଇଛି। ଏହି କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଏମ୍ପି ସଙ୍ଗୀତା ସିଂହଦେଓ ଭିଡିଓ କନ୍ଫରେନ୍ସରେ ଯୋଡ଼ି ହୋଇଥିଲେ। ବିଏସ୍ଏନ୍ଏଲ୍ ମୁଖ୍ୟ ମହାପ୍ରବନ୍ଧକ ହରିଶ ଚନ୍ଦ୍ର ମହାନ୍ତି, ବଲରାମ ପାଲ୍, ବିଜୟ କୁମାର ନାୟକ, ମୁଖ୍ୟ ମହାଡାକପାଳ ଶୁଭେନ୍ଦୁ ସ୍ବାଇଁଙ୍କ ସମେତ ୧୦ ଆକାଂକ୍ଷୀ ଜିଲାର ଜନ ପ୍ରତିନିଧିମାନେ ଉପସ୍ଥିତ ଥିଲେ।
କେନ୍ଦ୍ର ସରକାର ଦେଶରେ ସେମିକଣ୍ଡକ୍ଟର ଉତ୍ପାଦନ ବଢ଼ାଇବା ପାଇଁ ଯୋଜନା ଆରମ୍ଭ କରିଛନ୍ତି। ଓଡ଼ିଶାରେ ସେମିକଣ୍ଡକ୍ଟରର ଉତ୍ପାଦନ ପାଇଁ ପର୍ଯ୍ୟାପ୍ତ ସିଲିକା ଓ ମଧୁର ଜଳର ସୁବିଧା ରହିଛି। ଓଡ଼ିଶାର ବିକାଶ ପାଇଁ ଏକ ‘ସେମି କଣ୍ଡକ୍ଟର ୟୁନିଟ୍’ ପ୍ରତିଷ୍ଠା ପାଇଁ ଧର୍ମେନ୍ଦ୍ର କେନ୍ଦ୍ରମନ୍ତ୍ରୀ ବୈଷ୍ଣବଙ୍କୁ ପରାମର୍ଶ ଦେଇଛନ୍ତି। ପ୍ରସ୍ତାବିତ ‘ସେମି କଣ୍ଡକ୍ଟର ୟୁନିଟ୍’ ହେବା ଦ୍ୱାରା ପୂର୍ବ ଭାରତ ସମେତ ଓଡ଼ିଶା ଉପକୃତ ହୋଇପାରିବ ବୋଲି ସେ କହିଛନ୍ତି।