ଢେଙ୍କାନାଳ ଅଫିସ, ୪।୧୧: ଆମ୍ ଆଦ୍ମୀ ପାର୍ଟି (ଏଏପି) ଆଗାମୀ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଓଡ଼ିଶାର ସବୁ ଆସନରେ ପ୍ରାର୍ଥୀ ଦେବ। ଢେଙ୍କାନାଳସ୍ଥିତ ଦଳୀୟ ଜିଲା କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ରାଜ୍ୟ ପ୍ରଭାରୀ ତଥା ରାଜ୍ୟସଭା ସଦସ୍ୟ ସଞ୍ଜୟ ସିଂ ମଙ୍ଗଳବାର ଏହି ସୂଚନା ଦେଇଛନ୍ତି। ଜିଲା ଆବାହକ ପଙ୍କଜ ନାୟକଙ୍କ ସଭାପତିତ୍ୱରେ ଆୟୋଜିତ ଏହି ଖବରଦାତା ସମ୍ମିଳନୀରେ ଜିଲାର ୫୦ରୁ ଊର୍ଦ୍ଧ୍ୱ ପଞ୍ଚାୟତର ସକ୍ରିୟ ସଦସ୍ୟ ଅଂଶଗ୍ରହଣ କରିଥିଲେ।
ପଞ୍ଚାୟତ ନିର୍ବାଚନ ପାଇଁ ୬ ଜିଲାସ୍ତରୀୟ କମିଟି ଗଠନ କରିବାକୁ ପ୍ରସ୍ତାବ ଦିଆଯାଇଛି। ପଞ୍ଚାୟତ ଏବଂ ଜିଲା ପରିଷଦ ଆସନରେ ଦଳୀୟ ପାର୍ଥୀ ନିର୍ବାଚନ ଲଢ଼ିବେ। ବିନା ମଦ, ମାଂସ ଓ ଟଙ୍କାରେ ନିର୍ବାଚନ ମଇଦାନକୁ ଓହ୍ଲାଇବା ନେଇ ଦଳୀୟ କର୍ମୀ ମତ ଦେଇଥିଲେ। ଏହି ଅବସରରେ ଜିଲା କାର୍ଯ୍ୟକାରୀ କମିଟି, ପ୍ରଚାର କମିଟି, ନିର୍ବାଚନ କମିଟି, ଯୁବ କମିଟି, ମହିଳା କମିଟି, ଆର୍ଥତ୍କସ୍ଥିତି ସୁଧାର କମିଟି ଗଠନ କରାଯାଇଛି।
ରମେଶ ଚନ୍ଦ୍ର ପଣ୍ଡା, ପର୍ଶୁରାମ ମହାଭୋଇ, ବରିଷ୍ଠ ସଦସ୍ୟ ରାଜୀବ କର, ହେମନ୍ତ ଧଳ, ସନାତନ ନାଏକ, ସନ୍ଧ୍ୟାରାଣୀ ସାହୁ, ଲିଙ୍ଗରାଜ ସାହୁ, ଦେବାନନ୍ଦ ହୋତା ପ୍ରମୁଖ ବହୁ କର୍ମୀ ଯୋଗଦେଇଥିଲେ। ଏଏପିର ଆଦର୍ଶରେ ଅନୁପ୍ରାଣିତ ହୋଇ ୫ଜଣ ଦଳର ପ୍ରାଥମିକ ସଦସ୍ୟତା ଗ୍ରହଣ କରିଥିଲେ। ଓଡ଼ାପଡ଼ା ବ୍ଲକ୍ ଉପସଭାପତି ଲକ୍ଷ୍ମଣ ନାଏକ ଧନ୍ୟବାଦ ଅର୍ପଣ କରିଥିଲେ।