ନୟାଗଡ଼ ଅଫିସ୍/ରଣପୁର, ୧୪ା୧୨(ସ୍ବ.ପ୍ର.):ନୟାଗଡ଼ ସଦର ଥାନା ଯଦୁପୁରର ପରୀ ହତ୍ୟାକାଣ୍ଡକୁ ନେଇ ରାଜ୍ୟ ସରକାରଙ୍କ ଚିନ୍ତା ବଢ଼ି ଚାଲିଛି। ରଣପୁର ଥାନା ସୁନାଖଳା ଫାଣ୍ଡି ବଧିପାଟଣା ଗଁାଦାଣ୍ଡରୁ ଦିନ ଦ୍ୱିପ୍ରହରରେ ୩ ବର୍ଷର ଝିଅ ହରପ୍ରିୟା ସାହୁ(ସ୍ବାତୀ) ନ ମିଳିବା ଘଟଣା ଆତଙ୍କ ଖେଳାଇ ଦେଇଛି। ଏହା ଜିଲା ପୋଲିସର ମୁଣ୍ଡବ୍ୟଥାକୁ ବଢ଼ାଇ ଦେଇଛି। ପୋଲିସ ପକ୍ଷରୁ ୩ଟି ଟିମ୍ ତଦନ୍ତ ଜାରି ରଖିଥିବାବେଳେ ଦମକଳ ବାହିନୀ ୨ୟ ଦିନରେ ବି କୂଅ, ପୋଖରୀ ଆଦି ଜଳାଶୟ ଖୋଜି ସାରିଲାଣି। ଓଡ୍ରାଫ୍ ଟିମ୍ ଓ ପୋଲିସ ବି ବିଭିନ୍ନ ସ୍ଥାନରେ ଖୋଜାଖୋଜି ଜାରି ରଖିଛି। ପୋଖରୀରେ ଖୋଜିବା ପାଇଁ ସ୍କୁବା ଡ୍ରାଇଭରଙ୍କୁ ନିୟୋଜିତ କରାଯାଇଛି। ସେହିପରି ତଦନ୍ତ ପାଇଁ ନୟାଗଡ଼ ଏସ୍ପି ପ୍ରତ୍ୟୁଷ ଦିବାକର ୨ୟ ଥର ପାଇଁ ଗଁାରେ ପହଞ୍ଚତ୍ ତଦନ୍ତ ଜାରି ରଖିଛନ୍ତି।
ସେହିପରି ନୟାଗଡ ଶିଶୁ ସୁରକ୍ଷା ୟୁନିଟ୍ର ୩ ଜଣିଆ ଦଳ ରଣପୁରର ବଧିପାଟଣା ଗଁାକୁ ସ୍ବାତୀର ପରିବାର ଲୋକଙ୍କୁ ଭେଟିଥିଲେ। ଜିଲା ଶିଶୁ ସୁରକ୍ଷା ୟୁନିଟ ଅଧିକାରୀ ଉପେନ୍ଦ୍ର ନାଥ ବଡଜେନା, ଶିଶୁ ସୁରକ୍ଷା ଅଧିକାରୀ ସତ୍ୟ ରଞ୍ଜନ ଦାଶ ଓ ରଣପୁର ସିଡିପିଓ ଶିଶୁ ନିଖୋଜର ତଦନ୍ତ କରି ଫେରି ଆସିଛି। ଅନ୍ୟପକ୍ଷେ ଭାଜପାର ମହିଳା ମୋର୍ଚ୍ଚା ରାଜ୍ୟ ସମ୍ପାଦିକା ରଶ୍ମିରେଖା ଦାଶଙ୍କ ନେତୃତ୍ୱରେ ଏକ ଟିମ୍ ସ୍ବାତୀର ପରିବାରକୁ ଭେଟି ନିଖୋଜ ସମ୍ପର୍କରେ ପଚାରି ବୁଝିଥିଲେ। ୯ଦିନ ଧରି ନୟାଗଡରେ ରିଲେ ଅନଶନ ଭାଜପା ପକ୍ଷରୁ ଚାଲୁ ରହିଛି। ଏବେ ରଣପୁର ଶିଶୁକନ୍ୟା ନିଖୋଜ ପୁଣି ଚିନ୍ତାରେ ପକାଇଛି। ସ୍ବାତୀର ମା’ କହୁଥିଲେ ମୋ ଝିଅ ଭଲରେ ଘରକୁ ଫେରି ଆସୁ। ପରୀ ପରି ମୋ ଝିଅ ସହ ଘଟଣା ନ ଘଟୁ। ଗଁାର ସୁରେଶ କୁମାର ବେହେରା କୁହନ୍ତି, ସବୁଆଡେ ଖୋଜଖୋଜି ଚାଲିଛି। ହେଲେ କିଛି ବି ସୁରାକ ମିଳୁନି।